Read Alladian SANNAM 36 Bible Online

SANNAM 36 - Alladian bible

SANNAM 36

¹Josephke oo Manassehke oten Makirke oo Gilead erang lokke miro kídíe Mosi kíla abíd Israel miro kídílo aala bulu poto,

²“RUUTUM bí nome asi-among sim lotorilok ila ordope, delokke bí ngoluke erang Jelophehad ke ekurangem bík ome kídíem bidope lulígto.

³Idola sim kénsupe aido, bulu angukon opín-buanglo milo gímílo, buluke asi-amongde opín-buang delokke asi-amongpe iyé. Depe imílo ngolum panlíknam asi-amongde anyoyé.

⁴Jubli dítaklo, edílo kotonam ekuserang takam dem ipít langkula ato sulo aasuyékudí delo, Jelophehadke ome kídíem bomna opín-buang delo, buluke asi-amongde ila bulu kepe iyaryé. Depe imílo, ngoluke buku-neku asi-amongpe ikuna buluke asi-among de ngolu keelok nyokyaryé.”

⁵Delo RUUTUM ke lulíg kolok Mosi bí, Israel kídílo sim agom sim poto, “Joseph keelok lenna opín-buang kídí buluke agom kídí si arodung.

⁶Jelophehadke ome kídíde agí-agíke míínam supe milolo gílado. Idola agíke buku-nekuke opín-odong aralo gísupe aido.

⁷Israel aralo, opínkon lokke asi among dem opín konlo bilamayé. Kapeila agí-agíke buku-neku asi-among dem Israelke mipil miyonge yége-dagge supe aiyé.

⁸Asi-amongem yébom-dagbom suna ome miyongde, bíkke abuke edung-erang aralo milo bomsupe aiyé. Depe imílo, Israel aralo mipil miyongpe agí-agíke buku-neku asi-amongem yébom-dagbom suyé.

⁹Opínkon lokke opín konlo buku-nekuke asi-amongem bilamayé, kapeila Israel opín miyongde, agí agíke yége-dagge sunam asi-amongem bomyar supe aido.”

¹⁰RUUTUM ke Mosi kíng lulígnampe Jelophehadke ome kídíde ito.

¹¹Depeila Jelophehadke ome kídí, Mahlah, Tirjah, Hoglah, Milkah delokke Noah bulu agíke abu bíro kídíke oo kídíem milope bomsutoku.

¹²Bulu Josephke oo Manasseh opín-buang arasulo nyamran ibosuto. Depeila buluke asi-amongde agíke abu lokke edung-erang opín sulo duuyar sukai.

¹³Sim ayon kídí simlang idong kídí sim, Jeriko lokke Jordan korong rotkonlo Moab yiibelo, Israel kídíem RUUTUM bí Mosi keelok bito.