Read Alladian SANNAM 6 Bible Online

SANNAM 6 - Alladian bible

SANNAM 6

¹RUUTUM bí Mosime poto,

²“Israel kídíem sipe polangka: Edílo milokong kone demangkom mime kone RUUTUM kepe angurusupe tolíksuna Najiritpe yédope pésuyédí,

³de amide apong tíímapeka, delokke abíd siiyé líknam tíínam bier emla aponglok katkunam potík demangkom abíd apong katak suna apongem tíímapeka. Bí onggur alangem tíímapeka delokke onggur ayéem éépelai, loreenam pelai domapeka.

⁴Bíkke Najiritpe yédung tetengem onggur esinglok lenna atoem demangkom amíem demangkom asigem domapeka.

⁵“Bíkke Najiritpe pésu aradelo yédutetedem bí dumíd emlang nammídem ngísula imapeka. Bí RUUTUM kepe apekpe Najiritpe yédu tete delo deena amikope yépe aido. Bí dumídem bodongpe gepe aido.

⁶Bíkke RUUTUM kepe apekpe Najiritpe yédu tete delo simang amíl dongko anínlo gíamapeka.

⁷Shédíke legape bíkke apekpe Najiritpe yénamke soktame kadutete deme, bí agíke ane-abu, bírme-bíro lokke siyémte, buluke anínlo gíala, dormo ayonlok bí deemang iketsupe aimang.

⁸Kapeila bíkke apekpe yédu tete delo bí RUUTUM kepe kumlíkname.

⁹“Bík keralo amiko menang asak sila bík kumlík sunam dumídem edílo deema moyédí, delo bí longe kínídko toyala, longe kíníd nana longe delo bíkke dumíd emlang nammídem ngíbín sulangka. Delo bí dormo ayonlok deeyéku.

¹⁰Longe píínyi nana longe delo bí pekí annyi mangkom perong annyiko RUUTUM ke Tombu lamgélo aala miriem bilangka.

¹¹Delo miride akonem paab amanpe delokke akonem romnam amanpe ilíkla, bíkke simangem kaarík sunam legape dormo ayonlok deebín bikupe aiyé. Delo longe delo bí lekoda dumídem kumlík sukupe aiyé.

¹²Delokke bí agísu longemte, Najiritpe kumlík sukupe aiyé. Depe irodem bíkke kerangke kumlík sutonamde agér kaimayé, kapeila bík kumlík sutonam dumídde deeyi mangkai. Depeila bí imem legape amanem toodí taktelna méro ko bomape aido.

¹³Najirit lokke apekrupe tolíksula yédíe edílo yéyin yédí, bí RUUTUM ke Tombu lamgé delo gíape aido.

¹⁴Delo bí romnam amanpe toodí taktelna méro ko atí tarí tape kamanako bomalangka. Toodí taktelna mérne ko atí tarí tape kamanako paab aman legape bomalangka, delokke atí tarí tape kamana mérko ashéng aman legape bomalangka.

¹⁵Sike sokke kékon loteng tél kana séruk ettíng bésor nalok lang tél iyél sunam kampona atang ettínglok delokke siiyé líkmanam goona ettíng lok bomala tíínam aman kelang ali-ayé amanke teyolo bomtem aalangka.

¹⁶“Sike takam sim miride RUUTUMke keralo bomala romnam aman emla paab amanem amanpe ilík bilangka.

¹⁷Delok rongem bí ali-ayé aman demlang tíínam aman deme itak sula aapélo goona ettíng kanadem laala ashéng amanpe mérdem RUUTUM kelo ipak líklangka.

¹⁸Depe irodem RUUTUM ke Tombu lamgé delo bíkke kumlík sunam dumíd dem bomla ashéng aman ipakko eme delo romtak sulíkpe aido.

¹⁹“Najiritke kumlík sunam dumíd dem ngípak surodem, miride bík alag delo keenam mér delokke laktíkko, siiyé líkyél sumanam apu-adenpe inam ettíng kolang bésorna séruk ettíngko aapé delok laala melík langka.

²⁰Depe melík rodem miride RUUTUM ke keralo leesak amanpe ilíkyé. Amanpe binam letík delang leesak líknam angkeng alop de delokke leesak tonam aman tabude deene, delokke de mirike tarope iyé. Sikepe irodem Najiritde onggur alangem tííladoku.

²¹Sikesi Najiritke igepenam idong kídíe. Idola Najirit kone agí pésunam teyolote amanko tosak suyémílo, bíkke tosak sunampe bí agérem ipíípe aido.”

²²RUUTUM bí Mosime poto,

²³“Aaron melang bík oo kídíem polangka: Nolu Israel ami teyolo utepooro agom lulígyém sikepe buluke teyolo lulíg langka:

²⁴“RUUTUM bí nok teyolo utepooroem ruubila nome kaabom daklangka.

²⁵“RUUTUM bí, agí mikmoem nok teyolo angunpe ngunbi daklangka, delokke ayang daklangka.

²⁶“RUUTUM bí nokkelo, bíkke mikmoem ngébala nokke aapí-aangem eetet modak langka.”

²⁷Delokke RUUTUM bí poto, “Edílo bulu ngokke amínem mínla Israel teyolo utepooro agomem lulíg yédí, delo ngo buluk teyolo utepooroem ruulíg biyé.”