Read Alladian SANNAM 8 Bible Online

SANNAM 8 - Alladian bible

SANNAM 8

¹RUUTUM bí Mosime poto,

²“Aaronme sipe polangka: Edílo no sérag kíníd dem leelík yédí, delo sérag dakkengke kerang dakpom alumdem angune ngunkanpe aido.”

³Mosime RUUTUM ke lukampe Aaron bí sérag kídídem dakkengke kerang danpe idope ilíkto.

⁴Sérag dakkedem RUUTUM ke Mosime lenkannam adupe demjépnam uunlok leerílok ila appun punkolope molíkto.

⁵RUUTUM bí Mosime poto,

⁶“Israel ami kídí aralok Lebi kídíem ullenla, dormo ayonlok bulum deebín langka.

⁷Bulum deebíndope no sikepe ilangka: Buluke teyolo arkutnana asidem píkkatpala, bulum amíl tabungem ngíbín sumolangka delokke buluke ege-galugem etkutsumola bulum deengkut sumolangka.

⁸Depe irodem ettíng ímíknamlo tél hoyélsunam ali-ayé amanem bomtaksula rupangko bomamolangka, delokke paab amanpe rupangkon koteng no bomalangka.

⁹Delo no RUUTUM ke Tombu keralo Lebi kídíem aabola, Israel tabungem gogdum sulangka.

¹⁰No RUUTUM ke keralo Lebi kídíem aabola, Israel kídíe buluk alagem Lebi kídí teyolo leelígpe aiyé.

¹¹Depe irodem RUUTUM ke agérlo bulu gérlendope Israel kídí gooralok Lebi kídíem Aaronbí leesak amanpe RUUTUM ke keralo bipe aido.

¹²“Rupang kídíke tukkulo Lebi kídíe buluk alagem leelígrongem, rupang kondem RUUTUM ke keralo paab amanpe delokke rupang kondem Lébi kídíke ipítnam legape romnam amanpe ilík langka.

¹³Aaron kelang bík oo kídí keralo Lebi kídíem dagmo geyéla bulum leesak amanpe RUUTUM kelo ilík langka.

¹⁴Sikepe no Lebi kídíem Israel kídí gooralok angupe ingu sulangka. Depe irodem Lebi kídíde ngokkepe iyé.

¹⁵No Lebi kídíem deebín mola, bulum leesak amanpe ilík rodem, bulum RUUTUM ke Tombulo agérem ilen mope aido.

¹⁶Bulu ngokkepe Israel aralok apíírupe bingu supename. Israel mime aralok oge yalumnam oo ayanpe bulume ngo langu sudung.

¹⁷Israel aralokke milokong oge yalum namde tani dokom taro dokom ngokke. Edílo ngo Ijipt amonglo oge yalumnamem mokatodí, delo ngokkepe bulume rungu suto.

¹⁸Depeila Israelke oge yalumnam oo ayanpe ngo Lebi kídíem langu sudung.

¹⁹Israel kídíke aralo, RUUTUM ke Tombu agérlo idope Israel kídíke ayanpe delok teyolo edílo Israel kídíe Deena Alop anín delo gíayédi, delo atímange bulukíng kamadope, delokke deke delok bulum ipít dope, Lebi kídíem Aaron kílang bík oo kídílo amanpe ngo bidung.”

²⁰RUUTUM ke Mosime lulígnampe, Mosi delokke Aaronla bík oo kídíde delokke Israel maglíng tabunge Lebi kídí teyolo agérem gérlíkto.

²¹Lebi kídíde agíem deebín sula buluk ege-galugem etbín suto. Depe irodem bulum deebínla, ipít agérem ila RUUTUM ke keralo leesak amanpe bulum Aaron bí kumlíkto.

²²Dekepe irodem Aaron kelang bík oo kídíke kaadu-tattok aralo yéla, RUUTUM ke Tombu agérem idope Lebi kídíe aayinto. RUUTUM ke Mosime lulígnampe Lebi kídí teyolo bulu agérem gérlíkto.

²³RUUTUM bí Mosime poto,

²⁴“Lebi kídílo sikepe idonge kayé: Takying annyi kola takngona demangkom dem mineyana Lebi miyongde RUUTUM ke Tombu ekumlo agérlo ipe aido.

²⁵Idola takying pilngo rodem buluke iyasunam agér-anamlo asoope duulang kula agér iyikupe aimang.

²⁶Bulu RUUTUM ke Tombu agérlo buluk bíro kídíem igul-sanggulla ilado, idola bulu agísue aro agérem iyimapeka. Sikepe no Lebi kídí teyolo buluke agér anamem ruupan subilangka.”