Read Alladian SANNAM 9 Bible Online

SANNAM 9 - Alladian bible

SANNAM 9

¹Ijipt amonglok gílen rongku lokke dítak annyi nanake kerang poolo delo RUUTUM bí Mosime Sinai yépol mooruklo poto,

²“Toodí-yaamo paklo Israel kídíem Gíbong adeng-apeme imope aido.

³Adeng-apeke idong ayonlok sok poolo sokke looying kola loopinana longeke yume momí-roríem sim gíídí-siipe sim ibosulangka.”

⁴Dekepe lulíg kolok Mosi bí Israel kídíem Gíbong adeng-ape dem ibosu dope popala,

⁵bulu kerang pooloke looying kola loopi nana longeke yume momí-roríem Sinai lokke yépol-mooruklo deme ibosuto. Mosime RUUTUM ke lulígnam tabungem bulu ibosuto.

⁶Idola delo longe delo buluke ayokone, milokong ko gíímangla, bík simang amílem uknam legape deemape ila, dem gíídí-siipe dem ikan mínmato.

⁷Depeila bulu Mosime pokanto, “Gííma-siimo legape ngolu deemang kai idola abíd Israel kídíke akampe RUUTUM me aman bikolo ngolum kape lutumkan?”

⁸Mosi bulum, “Ngoluke legape RUUTUM bí ingkona poyil kodí pobiyéne dem ngo matapong. Nolu toya polangka,” emla poyansuto.

⁹Delo RUUTUM bí Mosime poto,

¹⁰“Israel kídíem sipe polangka: Edílo noluke akone demangkom noluke otíng oyine gííma-siimo legape deemape iyédí, demangkom mootenglo en-gong gígoola yégoyédi, depe idagakom bulu RUUTUM ke Gíbong adeng-apeme ilado.

¹¹Bulu poolo annyi lokke looying kola loopi nana longeke yume momí-roríem adeng-ape deme ibosulado. Bulu kosana neyi-neyang lokla siiyé líkmanam ettíng lok doyél sula mérdem dobosupe aido.

¹²Bulu taro delok alongem atí dírpe aimang, delokke roh akon loope dongong atí memapeka. Edílo bulu Gíbong adeng-ape dem igeyédí delo bulu adeng-apeke idong takamem igelangka.

¹³Idola dormo ayonlok deemang-amo atí kamana kone delokke en-gong gígoomape idolate Gíbong adeng-apeem imape amikone iyémílo, dekeme agí amipe hanyimapeka. Kapeila toodí paklo de amide RUUTUM kíng amanem boma bimato. De amide agí paab ajéngem gesuyé.

¹⁴“Noluke aralo mibo-miying kone RUUTUM ke Gíbong adeng-apeme imín gepe mííyémílo, de gíídí-siipeke idong ayonlok imín gepe aiyé. Nolu agí ami keepe lang mibo-miying keepe gíídí-siipe iyonem idong atelpe bompe aido.”

¹⁵Ingkona longelo RUUTUM ke Tombu dem motodí, delo doomuge bííbomto. Yume lokke ila roh loope Tombu delokke doomug dem eme kísape kaato.

¹⁶Dekepe iyarla Tombu dem longeme doomuge bííbomla, yueme eme kísape kaatíto.

¹⁷Edí-edílodí doomugde Tombu teyong delok gyabín yékudí delo Israel kídíe byakto, delokke edí-edílodí doomugde gyangala duubom yékudí, delo bulu notko ila duuto.

¹⁸RUUTUM ke lulígyém Israel kídíde byakto delokke bíkke lulígyém notko ila duuto.

¹⁹Edílo doomugde Tombu delok gyabínmape deddína longem dakbom yédí, dekena longe loope bulu byakmape notko atel delo RUUTUM ke agomem tatla duutíto.

²⁰Lekonem doomugde longe ayokon petom legape Tombu delo kato. Depe idagakom bulu RUUTUM ke lulígnampe byakto delokke bíkke lulíg nampe notko ila duuto.

²¹Lekonem doomugde yumelok ila roh petomlo kato. Delote, edílo doomugde roem gyabín yédí, bulu byaklen mínto. Longe dokom yoh dokom edí-edílodí doomugde gyabín lenyédí delo bulute byakmín geto.

²²RUUTUM ke Tombu teyolo doomugde loonyi kope demangkom poolo kope demangkom dítak kope duuyé mílote Israel kídíe dekepe notko ila duumín geto, delokke byaklenmato.

²³RUUTUM ke lulígyém bulu notko ila duuto, delokke RUUTUM ke lulígyém bulu byaklento. RUUTUM ke Mosi kíng lulígnampe RUUTUM ke agomem bulu tatla igeto.