Read Alladian MIKAH 1 Bible Online

MIKAH 1 - Alladian bible

MIKAH 1

¹Jotham, Ahaj, delo Hejekiah bulu Judah among lokke rojape idu delo, Moreseth among lokke kaalu miri Mikah kelo, RUUTUM bí sim agom sim bito. RUUTUM bí Samari kelang Jirusalemke legang takam sim Mikahme pokanto.

²Takam amie tatlangka, tani among so dungkína tabung amie sim tatgap langka. Kedon yalumna RUUTUM bí nolume akla hakii biyé. Tatgaptola! Bíkke deena Kumkeng Ekum lokke bí podung.

³RUUTUM bí bíkke deena mooloplok aadung; bí tokla dííte ponyuk kídílo magooyé.

⁴Delo kape kísape mutkyone emelo yoldudí, dekekísa bíkke rumkílo dííte kídíde yolyé; de yiibe kídílo, etpang lok asie bittoknam kísa yultokyé.

⁵Sikepe takamsi Israel ami kídíke paab agér inam legape, delokke Shédíke mirolpe rolnam legape iyé. Israel ami kídíke mirolpe rolnam sim sékome tolíkyéne? De Samari luune sudemangía? Séko Judah amolo uyu mimang kumsunam daiem geyéne? De Jirusalem bí agísu manía?

⁶Dekepeila RUUTUM bí podung, “Ngo Samarime bénla doopomna kope ila, onggur arígem ilíkpeko taayana amongkope imoyé. Ngo luune sokke bénla doojé-dooyéna kídíem yiibe belo purpakyé, delokke luune sokke mokeng kídíem kaadope imoyé.

⁷Sokke are kanamrupe mííbomnam uyu mimang kídíem demmíkyé; sokke kumpom kídílo notii kídíem binam ato ekurang tabungem emelo rompakyé, delokke sokke uyu mimang takame míípaknam uupomkope iyéku. Samari bí sim takam sim ardadope igenam idong kídí delok paato, delokke supak bíkke miru kídíe sikesim kumpom notii kídí kepe moole konkolo bomla inayéku.”

⁸Delo Mikah poto, “Sokke legape ngo ankí-adírla rííyé. Ngokke aapí kinamem lengkansupe, ngo ale leraape, delokke amíl mílípe gígooyé. Ngo ménsurung kísape uuyé, delokke ostrik pettang kísape adírlok jérgooyé.

⁹Samarike taríde gééyi kumayé, delokke Judah bí dekepakpe kiyé pakbong; ngokke ami kídíke dungko Jirusalem lokke lamgé loope nyokname píngkai.”

¹⁰Ngolume ikumnamem Gathlo ngoluke miru kídíem pokan mapeka; kapdope nolu, bulume kangko sumapeka. Beth Leaprah lokke ami kídí nolu, aapí míngkén yimanamem pemuklo longgoola lengkan sulangka.

¹¹Shaphir lokke ami kídía, amíl araape, annyingla mibo amonglo gínyok gekala. Jaanan lokke ami kídía, noluke dungko luune delok gíkan sulen mapela. Edílo nolu Bethejel lokke ami kídíke ankí uloem tatyédí, delo among delo tosik sukeng kaimang emla nolu kényé.

¹²Maroth lokke ami kídíe aikunamem míídír bomsula toyayé, kapeila RUUTUM bí Jirusalem lokke lamgé loope atung-arééem bomangkai.

¹³Lakhish lokke ami kídía, guré-gaari kídílo guré kídíem sogedope koklíktola. Nolu Israelke paab imemem kanggesula, Jirusalem em paab imem sumoto.

¹⁴Dekepeila, supak Judah lokke ami kídía, Moreseth Gath luunem gípan sukunana agomem potola. Israelke roja kídíe Akjibke luune delok atí igul paamayé.

¹⁵Mareshah lokke ami kídía, noluke doolungem ikumpena mirukolo, RUUTUM bí nolume melíkyé. Israelke ruutum kídíe gínyokla, Adullam among delo bupíklo duunyok geyé.

¹⁶Judah lokke ami kídía, noluke ayarunam ome-oo kídíke legape adírlok noluke dumídem ngíkut sutola. Sogum kídí lokke kísape tuklok dope ngíkut sulangka, kapeila noluke ome-oo kídíem rotbínla mirue gínyok bomyéku.