Read Alladian MIKAH 3 Bible Online

MIKAH 3 - Alladian bible

MIKAH 3

¹Tatgaptola, nolu Israelem yégebona kídía! Nolu jonna kebang legí-legangem kénpenape idung.

²Idola nolu ainem belumdung, delokke nolu atímanem aipe míídung. Nolu turdupe ngok ami kídíke asig-ayoem sékla, along kídílok adín kídíem séklendung.

³Ngokke ami kídíem nolu dodung. Nolu buluke asig-ayoem séklenla, buluke along kídíem dírla, delokke pekinglo keenyupe adín kídíem tekmíkdung.

⁴RUUTUM kíng noluke kapgu-rogu sudíku moodíe píídak, idola bí nolume poyan sumayé. Bí noluke kumnam kídíem tatbimayé, kapeila nolu deemana agérem ito.

⁵Abal bina kídíem eetetnamem pébisula, delokke bimanem mimaklok porítna kaalu miri kídíe ngokke ami kídíem yatbomdung. Sikena kaaluna miri kídíem RUUTUM bí podung,

⁶“Kaaluna miri kídía, noluke longe gíyinpak dakbong; doonyie nolukelo olup dakbong. Nolu ngokke ami kídíem gímem bonam legape, nolu kaalunam kaarí-kaanyo kídíem paayimayé, delokke atíkoteng poto sulabiyimayé.”

⁷Yépenam longe kídíke legangem potosuna kídíe, dekede arolíkmanam legape annying namem paayé. Bulu takam annyingem paayéku, kapeila Shédí bí bulume poyan sumayé.

⁸Idola ngokkíng dan RUUTUM bí bíkke aid emlang ralnamem bíísétpe melíktung, delokke jonna deena yéyonem kadope, delokke Israel ami kídíem buluke paab kídíem sutkan bilanana aapí míídugem bidung.

⁹Ngokke ponamem tatgaptola, E Israel ke yégebona, jonna deena kebangem belumpe míílatla, aroem menampe imokuna kídara.

¹⁰Nolu Shédíke luune Jirusalemem iyyi yibal lolang loorí mana isi-sio teyolo molík bomdung.

¹¹Luune sokke migíng, ruutum bona kídíe rekosula agérem ibidung, miri kídíete are paanam legape ayonem ngiitom bodung, delo kaaluna miri kídíe abal laala buluke polu-poor agom kídíem podung. Delokke bulu tabung RUUTUM bí bulukíng duumíndung emla togedung. “Edílokom ngolukíng adírname aamayé. RUUTUM bí ngolukíng duumíndung,” emla bulu podung.

¹²Dekepe ikolok, noluke legape, Jayon me arík kísape aallok durbubyé, Jirusalem me kumrom doopom kope iyé, delokke Kumkeng Ekum díítumde moonam kope iyé.