Read Alladian MIKAH 6 Bible Online

MIKAH 6 - Alladian bible

MIKAH 6

¹Israel teyolo kebang sim tatgap langka. E RUUTUM, gerepla nokke kebangem lukantola; dííte-moopang kídíem nokke lunamem tatmotola.

²Dííte kídí nolu, among sokke duuyarna dungkeng kídí nolu, RUUTUMke kebangem tatgap langka! RUUTUM bí bíkke ami kídí teyolo kebang lupenamko kadung. Bí Israel kídíem aklíla lupenamko kadung.

³RUUTUM bí podung, “Ngokke ami kídía, nolume ngo ingko koda itone? Kapekísa noluke eget tebegna kope ngo ikan? Ngom poyan sulangla.

⁴Ngo nolume Ijiptlok laalentoku; nolum ngo abílpe ikolok mopíttoku; ngo nolume gílen bodokupe Mosi, Aaron, delokke Miriam bulume melíkto.

⁵Ngokke ami kídía, Moab lokke roja Balakke nolume ipe emla míírutuanam em, delokke Beorke oo Balaam bí kape kísape bíme poyan sutuadín deme míípa sutola. Akasia notkolok ilenla Gilgal loope, bedanglo endungem inam atí kídídem míípasutola. Sike kídar sim míípa sutola, delo nolum mopítpe ngokke inam kídíem nolu kénsuyé.”

⁶RUUTUM teyong amongke Shédíme kumsupe ngokke aayém, ingkokoi ngo bomla aapene? Ngo dítak atelna gai yalumna ruo kídíem romnam amanpe bidope boma míloya?

⁷Ngo mérem deddín éjarem, demangkom olib télem biyyin yimana asi korong kísape bomabikolok, RUUTUM aipe mííyédí? Ngokke paab imem sunam legape ngokke oge yalumnam kooem bíkkelo tosak sulík mílodín?

⁸Ma dekepemang, RUUTUM bí ngolum deena yédongem pobitung. Ngolukelok bíkke mííbomname si: aroem ipe aido, duuyarna ayangem lengkanpe aido, delokke ngoluke Shédí kelo aapíe remel dola yébosupe aido.

⁹RUUTUM me pesonamde ainame. Bí luune dem gogdung, “Luune so gídumsuna ami nolu tatgaptola!

¹⁰Loorímana ami kídíke ekum kídílo buluke mela-yatla paanam murkong-ekuserang kídíe kadung. Bulu yatna ruunanalok inadung. Dekena dem ngo yagorupe kangkidung.

¹¹Yatna sapnana kídílok, delokke bekkínana kídílok inana ami kídídem ngo kapekísa mesamyén?

¹²Noluke miremna ami kídíe opan ami kídíem itung-irédung, delokke nolu tabung mena-yatne.

¹³Deke legape noluke paab imem sukolok noluke gérmang penam emla nyokpenam legangem ngo ilen dubong.

¹⁴Nolu doyé, idokom aange apíímayé; noluke kenode duudan teteyé. Nolu ekuserang atí kídíem laala bomyéku, idokom dekedem nolu mesiilamayé; noluke mesing kínam emte ngo mimaklo inyokmoyé.

¹⁵Nolu aliem lelíkyé, idokom ali-ayéem gatkumayé. Nolu olib ayélok télem kétlenyé, idokom dem tél dem edílokom nolu agér gérna lamayé. Nolu onggurlok apongem ilenyé, idokom edílokom tíípamayé.

¹⁶Kapeila roja Omri kelang bíkke oo roja Ahabke deemana agér gérnam yékor-dakkor yéyonlok nolu yémín geto. Nolu buluke séguem bomdan teteto, dekepeila ngo nolume nyokmoyé, delokke takame nolume míípakyé. Rego takamlo ami kídíe nolume belumnam kope kaayé.”