Read Alladian MIKAH 7 Bible Online

MIKAH 7 - Alladian bible

MIKAH 7

¹Ngo gérmang runako! Kenodula esing kídílo siipí-siiyéem, delokke onggur anelo onggur ayéem paamana ami kísadung ngo. Onggur takam emla ngamnarung tapang ayéem pílkut tubong.

²Among delo ami aina atel kote kaimang, sékokom Shédí kelo deenampe yéna kaimang. Mipile mokape mííla moodíko toyabomdung. Mipile agíke aní-bíroem petpe emla mata tayinla yédung.

³Bulu takame loorímana agér igangem kénkak aloodung. Opis migom kídíe lang kebang ruutum kídíe sépsu-paasu kodung. Mite-mirem amie bíkke míínampe migomem políkdung, dekepe bulu lekope ruubo sudung.

⁴Buluke aralokke milo arda gaiyalumna, delokke deeya yalumna dekom mepak penam ííng kídí kísadung. Kape kísape Shédí bí kaalu miri kídílok, bulume ingéngyéku emla buluke kaabomna kídílok lutor bituadi, de longe de píngkai. Supak bulu míílal lalgo sudung.

⁵Nokke kumríem aro míímapeka, demangkom angong emte míída sumapeka. Nokke agí mime emte popenam ansula polangka.

⁶Siro meyumke longe kídí so oo kídíe buluke abu kídíem midepe míípakla, ome kídíe buluke ane kídíem akmín sudung, delokke nyameng kídíe buluke ayo ane kídíem lumín sudung. Agíke ekum erangsue agíke miru kídípe isudung.

⁷Idokom ngo RUUTUM me kaayang yatí bomyé; ngo edíírupe míngke sudola, ngome mopítkupena Shédíme toyayé. Ngokke Shédí bí ngokke kumsunamem tatbiyé.

⁸Ngoluke miru kídíe ngoluke teyolo ngilkang bompenam legang kamang. Ngolu oletto, idokom ngolu lekoda gerep yéku. Ngolu supak kaamo aralo duudung, idakkom RUUTUM bí ngolume angunem biyéku.

⁹Ngolu RUUTUM ke keralo paab imemem ito, dekepeila ngolu supak bíkke marla ajéng adír binam sim anyongko doojémla donggepe aikai. Idokom iyinlo bí ngolukepe ralge biyéku, delokke ngolukelo imem ilíknam kídíem ijon biyéku. Bí ngolume angunlo gílen boyéku; ngolu bíkke ngolume mopít kunamem kaapayé.

¹⁰Delo ngoluke miru kídíe séko bulu ngolume lupu-lulédola, “Ingkoloda RUUTUM noluke Shédíbí?” emla íítuadí, bulu sim kaala annying yéku. Bulume ikumpala, bedu-bedang kídílo yupyang kísape inamem ngolu kaapayé.

¹¹Jirusalemlo duuna ami kídía, luune sokke líísak etor kídíem anípe morepdíku moodíe píídakku. Dekepe idoku delo noluke among yétaem ngétban biyéku.

¹²Noluke ami kídíe among kéényung regolok aadum suyéku: sanggodan lokke Assiria lok, sokkodan lokke Ijipt lok, Euphrates amonglok, sikong-mokong siyéng kídí lokkela mooteng-teenyoke dííte kídí lokke píídum suyéku.

¹³Idola tani among si, so duuna kídíke loorímana agér inam legape yépol mooruk amope iyéku.

¹⁴RUUTUM, nokke tomlennam ami kídíkepe, no mér kaabomna kope iboika. Bulu mongku-mooruklo duudagakom, moone-moolume bulume donggoo bomdung. Mennying-konnyingke inam kísape, Bashan lokke lang Gilead among lokke ardana neyi-neyang kakolo dogoodope, bulume gímotoika.

¹⁵RUUTUM, nokke ngolum Ijipt among lok bomlen dakkuem itonam kísape, ngolukepe irisinyo kídíem ibikuika.

¹⁶Bosi-dadí opín kídíe dem kaayé, delokke bulu deddípe ralduakom agíem míísaasula annyingyé. Mííram sukolok buluke nappang kídíem pokapsuyé, delokke nyorung kídíem tumísuyé.

¹⁷Bulu tabí kísape metbu amolo eeyé; buluke líísak ekum kídílok pesolok dande-deredola bulu lenyé. Bulu peso-reyub dola RUUTUM ngoluke Shédíke keralo aayé.

¹⁸E RUUTUM, nokke kísana anguyang shédí kamang; turla duuna, nokke ami kídíke paab kídíem no mesam bidung. No agínpe marla duuyarmang, idola ngolume nokke agínpe ayanamem lengkan sunamlo no ashésudung.

¹⁹Lekoda ngoluke teyolo no ayang yaasam suyéku. No ngoluke paab kídíem ale rumkílo tujémla, siyéng asi layi-langkikna rumkíng belo menyok líkyé.

²⁰No konnying-mennyingkai ngoluke buku kídílo pébisunampe, Abraham kelang Jakobke otíng-oyin, nokke ami kídílo, nokke aronam emlang duuyarna ayangem lengkanyéku.