Read Alladian NAHUM 1 Bible Online

NAHUM 1 - Alladian bible

NAHUM 1

¹Elkosh doolung lokke Nahumke, Ninebi legangem, kaarí-kaanyo kolo kaala agom ponam kídíem atkumnam legange si.

²RUUTUM Shédí bí nenako; bíme ipéésunem bí ingéédung. RUUTUM bí miru teyolo aklíla edo rayan sudungku.

³RUUTUM bí marpomanako, idola bí miga-miramrunako delokke imemem ajéng inako. Gumnam-meyat asarde bíkke bedange, bíkke ale demulde doomuge.

⁴Bí siyéngem ugbomla asi kaimadope imone, delokke korong kídíem lula oomokune! Bík keralo Bashan ke aríge ruggedung, Karmel dííte moorukpe igedung, delokke Lebanon ke appun kídíe san-gedung.

⁵Bík keralo dííte kídíe taronpe ton-gedung; delokke díítum kídíe yolgedung. Among kédénge lang tani amoso turna takame, bík keralo dan-gedung.

⁶Bíkke aklíng marlídem, sékoda dakka sulayén? Bíkke marnam aapíe eme meyope dorlendung, lííne-lííreng kídíete bíkke keralo sullipe igedung.

⁷RUUTUM bí aine; ankí-keno moodílo bík amiem bí mopítdung, bíkkíng duusi suneme bí aipe kaasidung.

⁸Bíkke miru kídíeme puumu botteruna kope engaa bomla apíípe nyokmodung. Bím akna kídíem, buluke sikana kídílo, bí monlíkdung.

⁹Nolu RUUTUM ke mirupe ingkue keda ruubosudun? Bí nolum nyokyin moyé. Sékokom bíme lekoda akkumang.

¹⁰Taanyum-tatké yééna, delokke ereena ammung kísape, tíngír suna nolum rompakyé!

¹¹E Ninebi, nokke lok atírumape miru-hogong agérem ruutína, RUUTUMke mirupe ruusupna amiko lento.

¹²Sikepe RUUTUM bí bíkke ami Israelem podung: “Assiria kídíe miga-miramla, deddína mití-milíngpe idokom, bulume ikumla, nyokmoyéku. Ngokke ami kídía, ngo nolume adírmoto, idola ngo dekepe lekoda ikumayé.

¹³Supage ngo noluke teyolok Assiria kídíke ruutum bomnamem laabín langkula, nolume yééna íkoli kídar dem benpak biyé.”

¹⁴Assiriake ami kídí teyolo RUUTUM ke kebang agome si: “Noluke amínem bomyar gepena nolu otíng-oyin kamayé. Noluke uyu kídíem kumpom kídílokke mimang kídíem ngo nyokpak moyé. Nolukepe ngo agoko irubomdung, kapeila nolu turla duubaamang!”

¹⁵Kaatola, tatporuna ngiitomem bomana kotokiko dííte kídí telok tokdak! Bí ikumnam legang aina agomem pobikape tokdak! Judah ami kídía, noluke adeng-ape kídíeme ila noluke Shédí kelo biyé emla togesunamem bilangka. Atímana amie edílokom noluke amongem aabom yimayé. Bulume apíírupe nyokyin moto.