Read Alladian NAHUM 2 Bible Online

NAHUM 2 - Alladian bible

NAHUM 2

¹E Ninebi, nome benmíkpena mirue nok teyolo mimak iyabomkai. Líísak etor yapgo kídíem kaabomtola! Bedu-bedang kídíem dagbomtola! Mimak leemoeme irusutola!

²(Israel me miru kídíke líímangada delokke kímte-remteme, RUUTUM bí anípe ruurep bidakku.)

³Miru kídíke maglíng kídíe yalína tamkung kídarem bomdung, delokke takame akampe yalína ege-galugem gedung. Bulu mimak ipe iruudung! Buluke guré-gaari kídíe eme asir kísa asirdung! Buluke guré kídí dete erdung!

⁴Guré-gaari kídíde, bedung-bedang kídílo letengem duggoola, luune gíídang kídílo dukkut-duklat sudung. Bulu eme dorna meru kísape latdung, delokke yaari garpe gardung.

⁵Yégebona migíng kídíem gogato; duga dungem bulu tubesuto. Miru kídarde líísak etorlo lomangto, delokke tuppen nana siipong legape tamkungem tamlíkto.

⁶Korong danke eyab kídíe siyyakai, roja dungko ekumdem pesoríanname bííbomkai.

⁷Rani deme patek sobomkai; bíkke béérang kídíde pekí kísa ríngkai, delokke ankílok angkeng kídíem kítsukai.

⁸Bénla asie biipak lenna paatang kísa Ninebi lok amie lomlenkai. “Gímapeka! Gímapeka!” emla bulu gogdung; idola sékokom aalat sukumang.

⁹Baldín kídíem lííto! Uun kídíem lííto! Luune si murkong-ekuserange bíísétdung!

¹⁰Ninebi me nyokmokai, atí kamoyimang, bénla byakruknampe imoto! Pesolok aapí kídíe yolgekai, lebínge ralyimala dankai, delokke mikmoe rukkai.

¹¹Agíke ome-uem tííbo doboko, myomur simyo ketpom kísana doolungde ingkoloi? Ingkoloi myomur murbo elang murne gígola, buluke ome-oo kídíke atí pesomape yégo suko moolop kísape ituana Ninebi doolungde?

¹²Myomure simonem umla agíke mime legapelang ome-oo legape adínem tarongpe rekmík bila, bíkke ketpom delo simon adínpe bíísét mokai.

¹³Ralya yalumna RUUTUM bí podung, “Ngo noluke mirue! Ngo noluke guré-gaari kídíem emelok gupakyé. Mimaklo noluke sipaying kídíem siyin moyé, delokke angukon ami kídílok edítko nolu lííla bomtokudí, dem takamdem ngo nolukíng laabínyéku. Noluke kotoki kídíke agom-aangem tatbi yimayé.”