Read Alladian JEPHANIAH 1 Bible Online

JEPHANIAH 1 - Alladian bible

JEPHANIAH 1

¹Ammonke oo, Judah lokke roja Joshiahke longelo Hejekiahke onam Amariah, bíkke onam Gedaliah, bíkke onam Kushi, delokke bíkke onam Jephaniah kelo RUUTUMke agome pííto.

²RUUTUM bí poto, “Tani among sokke ato takamem ngo nyokmoyé.

³Tani tabung emla simon-siliem, kebung-pettang kídí emla ei-engo kídílope nyokyin moyé. Bíírík mana takamem ngo nyokyinmoyé. Ngo tani opín takamem nyokmola, delokke séko memkom turdope duumomayé. Ngo RUUTUM sikepe polendung.

⁴“Ngo Judah lolang Jirusalemlo duuna ami takamem ajéngpe adírem biyé. Baal uyume kumsuna kídí takamem idu-sibyang anyongkote kaimadope ngo ipak pakyinyé, delokke sékote uyu mimang kumsuna kídíke miri kídíem míípasuyimayé.

⁵Séko bulu míílong teyolo rengon saala doonyiem, pooloem, delokke takar kídíem kumsududí, bulume ngo nyokyinmoyé. Séko bulu ngome kumsu dolate uyu Molekke amínlok pésula idudí, bulum takamkom ngo nyokmoyé.

⁶Séko bulu ngom míngke suyimape, míngkengem mepak sududí, delokke ngokkíng aamape, demangke bulume sutlíkbodope ngome komadudí, bulum tabungem ngo nyokmoyé.”

⁷RUUTUM ke bisardí longe píídak; dekepeila bíkke keralo eetet- dengompe duulangka. RUUTUM bí bíkke ami kídíem ipaklo ilíkpe emla iruudung, delokke Judah em líídope miru kídíem gogatung.

⁸RUUTUM bí podung, “Delo peddo longe delo, ngo migom-mite kídarem, delokke rojake oo kídíem, delokke mibo ami kídíke ege-galuk genam ségupe gemín gena kídíem nyokmoyé.

⁹Delo longe delo séko bulu uyu kumsula, delokke doppyola buluke ruutum lokke ekumem gebíng dope petdudí, bulume ajéngpe adírem biyé.

¹⁰“Delo longe delo,” RUUTUM bí podung, “Jirusalem lokke Engo Lamgélo ami kapdud-ríídudem tatpaayé. Delo ulo gogla kapnamem Jirusalem luune lokke moobuk danlo tatyé, delokke dííte kídílo béndud bottenako tatpaayé.

¹¹Jila-bajar duupomlo duuna nolu ulo-gogla kaptola! Kapeila bési-bépar ina kídíe kaimang, baldín bekkíbona takamem nyokmoto!

¹²“Delo moodí delo ngo eme meruko bomla Jirusalem me matagooyé. Séko bulu agísue agísulo aang píísula, delokke míítesula, agí arasulo, ‘RUUTUM bí aina kote, delokke atímana kote imayé,’ emla pobosududí, dekepe míína buluke teyolo ngo ajéngpe adírem biyé.

¹³Buluke gumíng-dogíng ekurang kídíem kurukbiyé, delokke ekum kídíem bénpakbiyé. Buluke morep bomnam ekum kídí delo bulu edílote duumayé, demangke buluke lelíkbomnam onggur ríkséng kídí delokke onggur alang emte tíípamayé.”

¹⁴RUUTUM ke botteruna longe píínín dung, de menarupe píínín dubong. De longede yirí-pedínam longe kope iyé. Miga-miram kídíe teng míngkén yimang adírlok ulo gogla kapyé.

¹⁵De longede yagorupe itung-irédí, adírla míngkén-mííyén yimadí, bénpakla nyokmodí, ruage ila rongngamdí, doomug mukkange ila kaamoe kyagem ina longe kope,

¹⁶mimak bikul kídí muddude, delokke líísak etor yapgo torgoosunam luune kídí emla kedonna tongi kídíem mimak iangbomna sipaying kídílokke mimak ngomdud lok bíísétpe muuyamna longe kope iyé.

¹⁷RUUTUM bí podung, “Dekena bottena adír kídíem tani opín kídíke teyolo, mipil tanie mingmana kísape memgosudope melíkyé. Bulu deddína paabem ngokke mirolpe ito, depeila supak buluke iyyie asi kísape biilenyé, delokke simang kídíe yaala amolo doojéyé.”

¹⁸Delo longe delo edílo RUUTUM bí bíkke marnamem lengkan yédí, delo buluke baldín, delokke uun takame bulume mopít lamayé. Tani among tabung sim RUUTUMke marnamlok eme gunyokyé. Delo bí menangem, tani amongso duuna takam teyolo yérí longem melíkyé.