Read Alladian JEPHANIAH 3 Bible Online

JEPHANIAH 3 - Alladian bible

JEPHANIAH 3

¹Deemape, míípu-míílumna, agíke ami kídísuem mirolpe rolbomla itung-iréna luune Jirusalem bí nyokdak.

²Bí RUUTUM me tatbimang, demangkom bíkke iyilnamem torík sumang. Bí RUUTUM kelo míídasumato, demangkom bíkke igulem matamoto.

³Bíkke migom kídíe ngírkímna myomur simyo kísa idung; bíkke kebang ruutum kídíe, rokomloope along kídíemte doomomape, kenola dokut-dolutna sipyang kídí kísadung.

⁴Kaalu miri kídíe míngge-igemape ila, yatkup-palatdung, miri kídíe deenem deemang dope ibít-ikatdung, delokke Shédíke ayonem ipella agíke mííbang supe agérem gérdung.

⁵Idokom RUUTUM bí supak pekom luune so duumín gedung. Bí agínpe aina deena agérem idung, atímana agérem edílote imang. Rodíke bí deenampe yéjinamem bík ami kídílo boma bidung. Depeilate loorímana ami kídíe annying kamape atímana agérem gérduteteng.

⁶RUUTUM bí podung, “Ngo takam opín-buang kídíem nyokyinmoto; ngo buluke luune kídíem nyokmola, buluke líísak etor kídíemla, tongi kídarem bénromdope meto. Luune delo ami duuyimang; bene-bepongde séri-momikai, delokke ami atelkote delo duuna kaimang.

⁷Dekepe irongem ngokke ami kídíe ngom míngge pesola, ngokke poyil yilkampe iyéku, delokke bulu ngokke poyilnam sim edílokom mitpan suyikumayé emla ngo míítuai. Idola ool dongkumape bulu kerangke akampe loorímape yékaku.”

⁸RUUTUM bí podung, “Toyang langka, ngokke gerepla opín-buang kídíem marla ludíku longedem toyalangka. Ngokke marnamlokke ralnamem bulume anpaasumodope, opín-buang daadiemla among yéta kídíem goodumsupe emla ngokke aapíe míngkai. Ngokke marnam eme tani among takam sim emepe ukpakyé.

⁹“Delo ngo among kídí sokke ami kídíem míílat sumoyéku. Buluke deenam aapílok, abíd uyu kídíem kumyimape, ngom petom kumsuyéku. Bulu takam ngokke míínampe igeyéku.

¹⁰Mooteng-teenyo Sudan amonglo duuna, duupit-duuyitmonam ngokke ami kídíeteng ngome aman bipenam kídíem bomabiyéku.

¹¹Ngokke ami kídía, delo moodí delo, ngome nolu mirolpe rolbomtuai emla annying penam kaimayé. Ngo kekímpe míngkímsuna mipilem laapakyé, delokke ngokke deena dííte delo ngome nolu lekoda mirolpe rolbomyimayé.

¹²Ngo ngokkíng igul legape aana, eetet remelna, delokke ngokke míínampe ina kídíem delo duumoyé.

¹³Israel ami kídíe séko bulu nyokmape turyédí, bulu sékomete imem iyimayé, menam-yatnam poyimayé, amiem ikupkítope iyimayé. Bulu jéla-remla, aiyope duula, peso adír kamape yénamem yéyéku.”

¹⁴Israelke ami kídía, ashénglok gogtoola miri lulangka! Arope aapílok míídola, ashélangka Jirusalem no.

¹⁵RUUTUMbí nolum ajéngpe adír bipenamem mepakto. Bí noluke miru kídí takamem laapakto. Israelke Roja, RUUTUM bí nolukíng duudung; nolu supak peso bomnam kaimang.

¹⁶Delo longe delo Jirusalem me sikepe poyé, “Pesomapeka E Jayon. Nokke alag kídíem lakbyang moyimapeka.

¹⁷RUUTUM noluke Shédíbí nolukíng duudung, bíkke ralname nolum ikumnamem bidung. RUUTUM bí nolum aipe mííla ashéngyé, delokke bíkke ayalok nolume aní yénamem biyé. Bí noluke teyolo miri lula,

¹⁸gíídí-siipelo ami kídíke ashénam kísape ashéyé.” RUUTUM bí podung, “Ngo noluke nyokpenam adír emlang, Abíd-akat deemang kídíem laabínto.

¹⁹Supak de idí moodíde aaníndung! Nolume míílumna kídíem ngo adírem biyéku. Ngo lebyana takamem ipítyéku, delokke monnyoknam kídíem ekumlo langaayéku. Buluke annying ayanpe agíl-apyoem biyéku, delo tani among tabunge bulum yidgeyéku.

²⁰De idí moodíde aaníndung! Ngo noluke gípit-gíyitna ami kídíem ekumlo laadum suyéku. Tani among takam so nolume ngo amín kadope, delokke yitgedokupe imoyé. delokke lekoda nolume jémo-remmoyéku.” Sikepe RUUTUM bí podung.