Read Alladian HAGGAI 2 Bible Online

HAGGAI 2 - Alladian bible

HAGGAI 2

¹Delok dítak delokke poolo kíníd nana lokke looying annyi kolang lootelnana longe delo RUUTUM bí lekoda kaalu miri Haggai kelok agomem políktoku.

²Bí Judah lokke gobonor Jerubbabelme, miri írne Joshuame, delokke takam ami kídíem polangka emla Haggaime políkto,

³“Noluke aralo kerangke Kumkeng Ekumde edítko kangkím tuadí deme supakpe míngge kén-ge sunako kadun? Supakke mokunam sim nolu kape kaadokun? Si noluke amig kangkolo atí kopete kamana kísa imanía?

⁴Depe idakkom, supak lokke nolu sékokom aapíe bengal mapeka. Agérem ralnampe gérlangka, kapeila ngo nolukíng duumíndung.

⁵Edílo nolu Ijipt among lokke gílen tokudí, ngo nolukíng agínpe duumín geyé emla togesuto. Ngo supakpete nolukíng duumíndung, dekepeila nolu peso mapeka.

⁶“Ool dooyimape, ngo lekoda teyong among emla tani amongem, moopíemla siyéng asiem ngendan yéku.

⁷Ngo opín-buang tabungem ikumla, delokke buluke gumíng- dogíngem ngunkutla so bomayéku, delo Kumkeng Ekum si mirem ekurange bíísétyé.

⁸Taleng kuppo sokke tabung baldín delang uunde ngokke.

⁹Anípe morepkunam Kumkeng Ekum si kerangke dempemílo kangkím yayé, delokke ngo ngokke ami kídíem jénam-remnam emla eetet ashéngem delo biyé.” Ralya yalumna RUUTUM bí podung.

¹⁰Dariaske dítak annyinape roja dodo delokke poolo konangke looying annyi kolang loopinana longe delo Ralya yalumna RUUTUM bí lekoda kaalu miri Haggaime lupotoku.

¹¹Bí poto, “Sim legang sim miri kídíe kape lubiyédí, dem tatkítoka,

¹²‘Lukíko, amikone tosaklíknam adín díntopko bíkke ege genam delok sumbomla bomdoku. Delokke bí bíkke ege genam delok ingkona ettíngem, monyunam donamem, apongem, olib télem, demangkom ingkona donam kídíem itetmílo, de donam takam dem tosaklíknampe iyin moyénía?’ ” Edílo legang sim tatkítodí delo miri kídíde, “Ma, dekepe imayé,” emla poyansuto.

¹³Delo Haggai tatkítoku, “Lukíko, amikone simang amílko ukkíla deemangkai. Delo bí sikena donam kídí sokke ingkona emte ukkíyémílo, dekepe inamde dekedemte deemang moyédí?” Miri kídíde poyansuto, “Em, deke deteng deemayé.”

¹⁴Delo Haggai poto, “RUUTUM bí sike akampakpe sok among sokke ami kídí silang buluke paalen-ilennam atí takame idung emla podung; dekepe inam legape runggulo buluke binam takam atí kídarde deemang.”

¹⁵RUUTUM bí podung, “Silo lokke ila nolukelo ikupenam legang kídíem míngíng langka. RUUTUM ke Kumkeng Ekum so elíng teyonglo elíngko leelík kumangadape,

¹⁶nolu kape kísa ituane? Noluke língko annyi kilogramko aliem paayé emla míngkolok, nolu língko atel kilogram petomko aliem paato. Nolu litar língkoko paape emla onggur alang epumlo aadoem, nolu litar íying appi petomko paato.

¹⁷Ngo pamkina asarem muddope melíkto, delokke noluke ngiilík kínam ali-ayé takamem líípakdope tapíem omoto, idolateng nolu míílat sukumang.

¹⁸Siloke poolo konang lokke looying annyi kolang loopi nana longe si, Kumkeng Ekum sokke morep kukeng kídíem iyindí longe. Supak lokke ila, kape kísana atíe iyéne deme kangíng-mííngíng langka.

¹⁹Ali-ayé kamape terong-terak idakkom, delokke onggur ane kídíe, tapang ane kídíe, dalim ane kídíe, olib esing kídíe ayé éngkumang adadokom, supak lokke nolume ngo utepooroem biyé.”

²⁰Poolo delokke looying kolang loopinana longerung delo, RUUTUM bí Haggai kelok lennyinape agomko,

²¹Judah lokke gobonor Jerubbabel me podope bito: “Ngo teyong among emla tani amongem epín modakbong,

²²delokke among yéta kídíem líípak bila, buluke mite-mirem ralnamem nyokmoyé. Ngo guré-gaari kídíem delo dem dugbomna ami kídíem kuppakyé; guré kídíde siyinyé, delokke dugbomna kídíde akone akonem petmínsuyé.

²³Delo longe delo ngokke béérang, Jerubbabel nome ngo laayé, delokke ngokke amínpe ruutum bodope ngo nome ullenyé. No ngokke mííbala ullennam amie.” Ralya yalumna RUUTUM bí poto.