Read Alladian JEKHARIAH 11 Bible Online

JEKHARIAH 11 - Alladian bible

JEKHARIAH 11

¹“E Lebanon, nokke sidar esing kídíem eme gukut dope, nokke eyabem siyya bilangka.

²E siinang esing kídía, kapla-rííla ilangka. Kapeila gai-gakorupe ina sidar esing kídíe oletla nyokkai. E Bashan lokke rotne esing kídía, kaplangka. Kapeila moonamrupe inem pabínto.

³Mér kaabomna kídíke kapnamem tatgaptola; buluke tami kakoem nyokyin moto! Myomur kídíke ugnamem tatgaptola; Jordan rubung lokke moonam kídíe kaimangkai.”

⁴RUUTUM ngokke Shédí bí sipe podung: “Pakadope iyod líknam mér kídíem kaabom langka.

⁵Bulum rena kídíe atí ajéng dorkumape paka katídung. Bulume kona kídíe, ‘Ngo miremkai! RUUTUMme yidgedo!’ embo sudung. Bulum kaabomna kídíete buluke teyolo atí ayang kamang.”

⁶RUUTUM bí sikepe podung, “Ngo among sokke ami kídí teyolo ayang kayimayé. Ngo mipil-miyongem, agíke kumrí-donggolo mirolpe rolmín sumola, agíke roja kídí aralo yéyin moyé. Bulu asi-amongem yébomla bulume itung-iréyé, delokke ngo bulume ipít yimayé.”

⁷Depeila ngo pakadope iyod líknam mér kídídem kaabomto. Delo ngo banggén annyiko bomto. Banggén konem, Ayang yatek sunam emto delokke banggén akondem, Lekobosu emto. Depe igeyéla, ngo mér kídíem kaabomto.

⁸Poolo atel aralo ngo aklíla, kaabomna midum angum konem lupaktoku. Mér kídí dete ngome ansu abuula ikolo, ngote bulume kaabom kolok aapíe apéng gekai.

⁹Depeila ngo luto, “Ngo nolum kaabomnape iyimayé. Sina nyoknem simo-nyokmotoka. Turkína kídí noluke arasulo, akon adínem akone domínsula yébosulangka.”

¹⁰Delo ngo Ayang yatek sunam emnam banggén dem, opín takamke teyolo daapong ibosunamem kullat sudolangkula dírto.

¹¹Delo longe delo deme kullat sukukolok, ankang aloosuna mér kídíde, RUUTUMke agomlok dekede ikai emla ngome kaana kídarde kénkai.

¹²Ngo bulum poto, “Nolu aiyé emla míído mílo ngokke yérem bilangka; delokke mííma mílo yéredem bimadokom aiyé.” Dekepeila bulu ngome baldín nogdi íying angumko bito.

¹³Delo RUUTUM bí ngome, ngokke yérepe buluke gairupe bito míínam abal deme, “Kiilíng peking pína delo deme yoplíktoka,” emla poto. Dekepeila ngo baldín nogdi íying angumdem RUUTUMke Kumkeng Ekumlo bomla kiilíng peking pína teyodelo yoplíkto.

¹⁴Depe irongem Lekobosu emnam banggén dem dírla Judah kelang Israelke bíro kumsu lekobosuem dírpan suto.

¹⁵Delo RUUTUM bí ngome potoku, “Mér kaabomna bopol kolokke leesi-lemoem lekoda no getoku.

¹⁶Kapeila ngo ami kídí teyolo, nyokna mérem mata manako, koo-kíangem kaasi-tatsila imanako, tarí-tape genem ai-kampope kaabi manako, idola deke delokke ayanpe ngelna mér kídí delokke adínem dolatla, buluke gordung amíl-amoem pamík-pamíkla ina mér kaabomnako ruurepyé.

¹⁷Dekena agér kamana mér kaabomnade reyubna adírem paala nyokdak! Kapeila bí agíke mér kídíem mepaksuto. Mimage bíkke ralnam takamem nyokmoyé. Bíkke alag kídíe sanpakyé, delokke bíkke mikbíge mikmayé.”