Read Alladian JEKHARIAH 12 Bible Online

JEKHARIAH 12 - Alladian bible

JEKHARIAH 12

¹Israel kídí legapesi RUUTUMke agome. Sékodí taleng kuppo sime iyatodí, sékodí tani among sime pílentone, delokke sékodí tanike aralo aidem ruulík todí, de RUUTUM de sikepe podung:

²“Ngo Jirusalemme, dunggo bomna ami kídí legape tíngír sumona apong bati kísape imoyé. Jirusalemme mimak iyabomnam kísape Judah among emte iyabomyé.

³Delo longe delo Jirusalemme tani amongke miru opín kídíe rego mipílok gargo bomyéme, ngo Jirusalemme níngét lamanam líídung kope imoyé. Bíme níngkína tabude agílo tarí-tape kadupe isuyé.

⁴Delo longe delo guré miyong emla delo duuna maglíng takamem akén-ayén yimape imola tummoyé. Judah among teyolo ngo airupe kanggap bomyé. Idola miru opín kídí takamke guré kídíem ngo mikmang moyé.

⁵Deme kaala Judah lokke kebang ruutum kídíe, ‘Jirusalemke ami kídíe pakdorung. Kapeila Maglíngke RUUTUM bí buluke Shédíe,’ emla buluke aralo yidge bosuyé.

⁶“Delo longe delo Judah lokke kebang ruutum kídíem, esing kumpom aralo eme dorna peking kísa, delokke aam ampom aralo asék meru kísape imoyé. Bulu kéényung regolo gargoola dunggoo bomna miru opín kídíem gukutyé. Idola Jirusalemke dumíd atel kote gudílmape bí edíírupe duusuyé.

⁷“Dabidke ekumlo duunelang Jirusalemlo duune, Judah amiem pemílo gai-gakong yaape míísumadope, RUUTUM ngo Judah amiem kerayape mopítyé.

⁸Delo longe delo, Jirusalemlo duuna kídí aralokke ralma yalumna amie Dabid kísa idope, delokke Dabidke ekumlo duuna kídíe Shédíke kísa ila, buluke keralo gígebona RUUTUMke kotoki kísape idope RUUTUM bí Jirusalemlo duuna kídí takamem kaabomyé.

⁹Delo longe delo, Jirusalemme mimak iyang kína opín tabungem ngo nyokyin moyé.”

¹⁰Dabidke otíng-oyin lolang Jirusalemlo duuna kídí teyolo ayang yaasamnam emla kumsunam aapí-aangem ngo purlíkyé. Buluke gíníng lok níknam ngome, bulu kaasula, oo atel petompe idola sinem kape kísa kabbom-rííbomdudí, dekekísa ibomyé, delokke oo obíyalum nyoknem kape kísa yagorupe ankí bomdakdí, deke kísape ankí along bomyé.

¹¹Delo longe delo Megiddo Yiibe lokke Hadad Rimmonlo yagorupe pokén yimanam kapnam-ríínam kísape Jirusalem lokke kapnamde iyé.

¹²Kapnam-ríínamde among delo opín-erang supe ila, buluke mime kídíete buluke arasulo isula iyé; Dabidke erang kídíde, delokke buluke mime kídíe, Nathanke erang kídíde, delokke buluke mime kídíe,

¹³Lebike erang kídíde, delokke buluke mime kídíe, Shimmeike erang kídíde, delokke buluke mime kídíe,

¹⁴delokke abíd-abíd erang kídíde, delokke buluke mime kídíe.