Read Alladian JEKHARIAH 13 Bible Online

JEKHARIAH 13 - Alladian bible

JEKHARIAH 13

¹“Delo longe delo Dabidke ekum-erang legapelang Jirusalemlo duuna kídí bulu takamke deemang-amoem, delokke paab kídíem arbíndope asi sirungko buklenmoyé.

²Delo longe delo, among soge mimang emnam ato-siro kídíke amín kídíem míípang suyimadupe ngo nyokmoyé,” emla Maglíngke RUUTUM bí polendung. “Ngo deemangna uyu kídí emlang buluke miri kídíem among deloge laabínyé.

³Dekepe ngokke irongemte kaaluna uyu agom ponako kayémílote, dekena amidem ona ane-abue, ‘No RUUTUM ke amínlok menam agom ponam legape sipe aido,’ emla amidem lula, ami delokke kaalu agom podungem, bíkke agí erangsude bíme mokayé.

⁴Dekena longe pííyém, menampe kaalugoona miri kídíde agíke kaarí-kaanyo kaanam teyolo annying suyé, demangkom kaaluna amipe igotyéku, delokke yatgo dokupe amíd kana kaalu miri egem gekumayé.

⁵Delo bí sikepe pogeyéku, ‘Ngo kaaluna miri komang, ngo arík ina komin. Ngo koo siisang lok ila arík ina komin.’

⁶Delo ami akone bíme, ‘Nokke angkeng tarí kídíde kapeda?’ emla íngkínako kamílo bí, ‘Ngokke angong ekum kolo mino tarí kídar sim iket sutone,’ emla man-gong geyé.”

⁷Maglíngke RUUTUM bí podung: “E yoksano, gerepla ngokke anínpakso duuna mér kaabomna bím mimakpe iyabomto. Mér kaabomna bím pakato, delo mér kídíe dukpan-dukran suyé. Delo améngona kídí teyolo ngok alage mirolpe iyabomyé.”

⁸RUUTUM bí sipe polendung, “Among tabuso adu angum lokke adu annyi amiem paka-níkkala siyinyé; idola adu angumnana amie turyé.

⁹Sim turna ami kídísim ngo emelo bomayé; baldínem deedope yolnam kísape bulume ngo iyé, delokke uun em ikangnam kísape bulume ngo ikayé. Bulu ngokke amínem gogyé, delokke ngo buluke kumnamem poyan subiyé. Ngo poyé, ‘Bulu ngokke amisue,’ delo bulute, ‘RUUTUM bí ngoluke Shédíe,’ emyéku.”