Read Alladian JEKHARIAH 2 Bible Online

JEKHARIAH 2 - Alladian bible

JEKHARIAH 2

¹Delok rongem ngo kaadu sutoname kínana rímoko alaglo bomna amiko ngo kaato.

²Bím ngo, “No kolo gídakne?” emla ííto. Delo bí ngome, “Jirusalem ke bortak emla bodongem ngo kíkípe gídak,” emla poyan sudo.

³Delo ngom luposuna kotokide gílenkai, delokke kotoki konkone bíme kaarík supe aato.

⁴Aana kotoki dem bí poto, “Dugla, kínana rímo bomna yaamé koo esim sikepe polangka, ‘Deddína tani elang simon-sili kanam legape Jirusalem de yapgo etor atí kamana doolung kope iyé.

⁵Kapeila ngo agísue doolung delokke eme yapgo etorpe iyé, delokke arang delokke angun-abépe iyé. Sikepe RUUTUM ngo polendung.’ ”

⁶RUUTUM bí bíkke ami kídíem poto, “Ngo nolume rego takamlo yépit-yéyitmoto. Idola supak, monnyoknam kídí nolu, Babilon loge duknyokla Jirusalemlo aalat sutolangku.

⁸Ingkona amie nolume itung-irédudí, bí ngokke mííbang yalumnamem itung-irédung.” Dekepeila Maglíngke RUUTUM bí ngome sim agom sim, bíkke ami kídíem líítona opín-buang kídíem podope melíktung:

⁹“RUUTUM bí agísue nolume mimak iyé, delokke noluke béérang kídípe leko ituana ami kídíe nolume lííyéku.” Edílo si arolíkyédí, mipile ngome Maglíngke RUUTUM bí melíktung emla kényé.

¹⁰RUUTUM poto, “E Jirusalem lokke ami kídía, ashéngla miri lulangka! Ngo noluke pénsamlo duupe aadak!”

¹¹Delo longe delo deddína opín-buang kídíe RUUTUM kíng aala bíkke amipe iyin yéku. Bí noluke pénsamlo duumín geyé, delokke delo longe delo nolu, bí ngome nolukelo melíktung emla kényé.

¹²Dekepe iyékuem lekoda deena among delo Judah amongde RUUTUMke atek ekurang supe ila, delokke Jirusalemde bíkke takam luune kídí aralok yagorupe ayasunampe iyéku.

¹³Tani takama, RUUTUM ke keralo eetet-dengompe duulangka, kapeila bí bíkke deena dungkolok aadung.