Read Alladian JEKHARIAH 3 Bible Online

JEKHARIAH 3 - Alladian bible

JEKHARIAH 3

¹Kaarí-kaanyo konkolo RUUTUMke kotoki keradelo miri írne Joshuame dakdupe, delokke Joshuake arotkon delo bíme lujétpe banji-banmangme dakdupe RUUTUM bí ngome lengkanto.

²Delo RUUTUM ke kotokide banji-banmangme luto, “Banji-banmang nome RUUTUM bí ludung. Jirusalemme agíkepe ulsuna RUUTUM bí banji-banmang nome ludung. Si ami si emelok laalen kunam asék kísana komino.”

³Depe ido delo Joshua bí teyong kotoki keradelo ege angín eke gela dakdo.

⁴Delo teyong kotokide bím daggo bomna teyong ami kídardem, “Bíkke genam ege angínna kídar dem bítbínto,” emla políkto. Depe popala bí Joshuame lupoto, “Kaatola, nokke paabem ngo laabínto, delokke nome ngo anína ege kídarem gedope biyé.”

⁵Delo ngo poto, “Bík dumpo delo deena dumelko bulume kellík moto.” Delo bulu bíkke dumpo delo deena dumelko kellíkla, ege aníem píllíkto; depe idudem RUUTUM ke kotokide anínlo daktíto.

⁶Dekepe irodelo RUUTUM ke kotokide Joshuame sipe lulíkto,

⁷“Maglíngke RUUTUMbí sikepe podung: No ngokke bedalok gímílo, delokke ngokke mííbomnamem igebimílo, no ngokke Kumkeng Ekum emlang kebang ikoem kaabomna ruutumpe iyé, delokke supakke so dagna teyong ami kídíso yérík-dakrík bosula nanaem nome ngo biyé.

⁸E miri írne Joshua no, tatgaptola; delokke bíkke miri írgíngpe imín gena tabung nolu tatgaptola, nolu aina yékupenam lokke iyodem yégena amie. Ngo ngokke béérang Aag emnam bím lengkanyé.

⁹Joshuake keraso ngo mikmo kíníd gena dabu atelko leedung. Dabu delo ngo akorko paketlíkyé, longe lootel loge ngo sok among sokke paabem laabínyé.

¹⁰Delo longe delo mipil-miyoope nolu agí kumrí-donggongem, agí-agí onggur esing kídí, delokke donam tapang esing baganlo, dobo tomla ibosuyéku.”