Read Alladian JEKHARIAH 4 Bible Online

JEKHARIAH 4 - Alladian bible

JEKHARIAH 4

¹Dekepe iro delo ngome lupo bosuna kotokide aalangkula, ipkolok urrepnam kísa bí ngom urrepto.

²Depe uddola bí ngom ííto, “No ingkoko kaadon?” Ngo poyansuto, “Uunlok monam sérak-meru dakkengko. Delokke teyodelo tél dungkeng toguko dung. Sérak-meru dakkeng delo sérak-merue kínídko dak, delokke sérak-meru miyoolo eme romlíkpeko nosole kínídko kadung.

³Sérak-meru dakkengke abe eelenlo olib esing annyiko kadung.”

⁴Delo ngo kotokidem, “E ngok RUUTUM, si atí kídí si ingkueda?” emla ííto.

⁵“Sikesim no kénmanía?” emla bí ííyansudo. Delo ngo, “Ma RUUTUM, ngo kénmang” emla poyansuto.

⁶Delo bí ngom poto, “Jerubbabel kelo RUUTUM ke agome si: Miga-miram loklang ralnam lokmang, idola ngokke Aid lokmin, emla Maglíngke RUUTUMbí podung.

⁷Dííte kídí lokke kísa bottena itumpena kídíe nokke keralok kaapayimadope nyokyé. No Kumkeng Ekum dem anípe morepyéku, delokke leelík pekolo nokke méélam yalum elíngem leelíkyém, ami kídíe, ‘Kamporudo, kamporudo!’ emla érla gogyé.”

⁸Delok teyolo RUUTUMke agome ngokkelo píítoku,

⁹“Kumkeng Ekum sokke moda supekuem Jerubbabel bí pílíkto, delokke bí kumgíng sim mopííyé. Edílo si arolíkyédí, delo ngokke ami kídíe Maglíngke RUUTUM ngomin nome bulukíng melíktune emla kényé.

¹⁰Agér-anam inam kídísi itung-hila mape ikolok, buluke aapíe amé aloodung. Idola bulu Jerubbabelme Kumkeng Ekum sim morepbom tetedope kaayé, delokke buluke aapíe ashéngyéku.” Teyong kotokide ngome poto, “Sérak-meru kínídsi, tani among sime kanggoona RUUTUM ke amig kíníde.”

¹¹Delo ngo bím ííto, “Sérak-meru dakkeng abe eelenlo olib esing annyi esi ingkueda?

¹²Delokke olib télem pílíknana uun paip annyi delokke abelokke olib esing aag annyide ingkueda?”

¹³Bí ngom ííyan sudoku, “Sikesim no kénmanía?” “Ma ngok RUUTUMe, ngo kénmang,” emla ngo poyansuto.

¹⁴Delo bí poto, “Tani among tabungke RUUTUMme agér ibidope ullenla pídélíknam ami annyie aag annyide.”