Read Alladian JEKHARIAH 5 Bible Online

JEKHARIAH 5 - Alladian bible

JEKHARIAH 5

¹Ngo lekoda kaadusula kaato kuname, ngok kerapak delo yopna títbumnam kitabko kaato.

²Teyong kotokide ngome, “Ingkoko kaadun?” emla íído. Ngo bíme, “Ngo yopna títbumnam kitabko kaadung; de bodonge mitar konang nako, delokke apee mitar appi kolang arotnako,” emla poyansuto.

³Delo bí ngome poto, “Among tabuso atímape aapena pénam agomem kitabso atlíktung. Kitab sokke arotkonlo, doppyoo-tíísina kídíem among sok nyokyinmoyé emla attung, delokke arotkonlo pésudola menam agom luna kídíemte nyokyinmoyé emla attung.

⁴Maglíngke RUUTUM bí, sim pénam agom sim melenlíkyé emdung. Delokke si doppyoo-tíísina ekum takam lolang, pésudola menam agom luna ekum takamlo aayé. Si pénam agom si buluke ekum kídí delo duulíkyé, delokke ekum kídí delokke esing-elíng kídí takamem nyokmoyé.”

⁵Delo ngome luposuna teyong kotokide aalangkula pokai, “Kaatola! Atíkonko píídak!”

⁶“Si íngkokoda?” emla ngo ííto. Bí pobikai, “Si sopurko, delokke si among tabung sokke ami kídíke deemang-amoem kaanana sopure.”

⁷Delo sopurke pakranglok pínam ikapnana deme lekya yédeme sopur aradelo mimeko duudope kaato.

⁸Teyong kotokide pokai, “Si mime si atírumana em lengkandung.” Depe emgeyéla mimedem sopur aradelo níímap líklangkula, ikapnana deme sopur nappang teyodelo ikap líktoku.

⁹Dekepe ido delo ngo kaangonla kaatoname mime annyiko, delubore pettang kísa alap edíína gela ngokke danpe yobadope kaato. Bínyi sopurdem laarepla, among taleng pénsamlo yobbomkaku.

¹⁰Ngome luposuna teyong kotoki deme, “Sopur deme bínyi koloda yobbom dakkune?” emla ngo ííto.

¹¹Delo bí pobido, “Mime deme ekumko mobipeko Babilon amonglo. Edílo ekumdem moyin yédí, delo sopurdem kumsudope mepekolo meyé.”