Read Alladian JEKHARIAH 7 Bible Online

JEKHARIAH 7 - Alladian bible

JEKHARIAH 7

¹Darias rojake dítak appinape roja dodo delokke Kisleb emnam poolo konangke loopinana longe delo RUUTUMke agome Jekhariah kíng pííto.

²Bethel doolunglok ami kídíe Sharejer melang Regemmelek me, delokke bínyike ami kídíem metak sulíkla Maglíngke RUUTUMke Kumkeng Ekumlo RUUTUM kelok utepooroem kodopelang,

³miri kídí emlang kaaluna miri kídíem sim agom sim íngkídope lulígto: “Ngolu deddína dítak kerapekai iyar bomnam idongpe sime igedola, poolo pilngo moodí-moodílo ankí-adírla, domang-tíímape nyodan tetemíloa?”

⁴Delo Maglíngke RUUTUMke agome ngokkíng pííto:

⁵Bí poto, “Among tabung sokke ami kídí emlang miri kídíem polangka. Edílo bulu dítak íying kíníd simkai, poolo pilngona lolang poolo kínídnalo, moodí mipíem ankí-adírla nyola itodí, de tabude ngome yidge-rínggela inampe imato.

⁶Delokke edílo bulu dola-tííla itodí, dekede buluke agí aangem píísunam legape ito.

⁷Edílo Jirusalemem dungaabomla, delokke ayir-agongke doolung kídílo lekope yagorupe jétodí, delokke Negeb among lolang anggodanke dííte lebe kídílo ami kídíe duuyin aabomtodí, delo sikena RUUTUMke agomem kerangke kaaluna miri kídíe lukan-pokan bigemanía?”

⁸Jekhariah kíng RUUTUMke si agom si pííto:

⁹“Deddína longe kerape ngokke ami kídíem ngo sim lulígnam sim bituai: ‘Deepítnam bedalok yébolangka, noluke aralo ayangem yalen bosula asampe ayange kabosulangka.

¹⁰Mime meyéng kídíem, delokke ane-abu sinyonam ome-uem, nolukíng duumín gena mibo kídíem, demangke pííram-samoona takamem míílumla iréémapeka. Delokke noluke aralo akone akonem adírmotope emla aapílo ségu ruulen mapeka.’

¹¹“Idola ngok ami kídíde aapí-aange tolla, atí agom tatmape, nyorungem pikap sula, buluke lamku kídíeme geka sula yétíto.

¹²Buluke aapí kídíem bulu dabu kísa tolmola ayonke agomem tatmape, delokke kerangke kaaluna miri kídíke nappalok ngokke Aide lulígnam agom-aang kídíemte bulu tatperumang igeto. Dekepeila Maglíngke RUUTUM bí buluke teyolo yagorupe marto.

¹³Bulu ngokke podoem tatgap bimanam legape, buluke kumdoem ngoteng tatbimato.

¹⁴Ngo bulume gumnam asar kísa, angu opín-buang kídílo dunggoodope mutpan-mutran sugoolíkto. Sim aina moone among sime ami atel koteng duubom yimadupe giiruk-byakruknam amongpe imoto.”