Read Alladian JEKHARIAH 8 Bible Online

JEKHARIAH 8 - Alladian bible

JEKHARIAH 8

¹Maglíngke RUUTUM ke agome ngokkíng sikepe pííto:

²“Maglíngke RUUTUM sikepe podung. Ngo Jirusalemme, bíkke ami kídíem ngokke yagorupe ayasunam legape igulpe míítíbomto. Delokke si ayang si ngome bíkke miru kídí teyolo marmoto.

³Ngo ngokke deena doolung Jirusalemlo aalat sulangkula delo duuyéku. Delo Jirusalemme arona doolunge emyé, delokke Maglíngke RUUTUMke dííteme, deena dííte emla manyé.

⁴Lekoda mijing-ejoe alag kídílo banggén bomla Jirusalemke gíídang kídílo dunggooyéku.

⁵Delokke doolung delokke bene-bepong kídí delo, milokong koo kídíelang mime koo kídíe imanla bíísét bomyéku.

⁶“Si agom kídí si supakke duuna ami kídí legape tarí-tannyonam agom kope iyépe, idola de ngokke legape ilamanam agommang.

⁷Ngokke ami kídíem umnyok bomkuko among kídílok ngo mopít yéku,

⁸delokke bulume sanggo loklang anggolok Jirusalemlo duudokupe langaayéku. Bulu ngokke amipe iyé, delokke ngo, bulume deenam loklang jonnam bedalok yébo dolangkula buluke Shédípe iyé.

⁹“Aapíe mííduk langka! RUUTUM ke Kumkeng Ekum lokke mokengem pílendakkuem kaaluna miri kídí lokke agom potonam kídíem supak nolu tatsudungku.

¹⁰Dekena longe kera delo ami emlang simon-sili kídarem agér ire bipenam kamatuai, delokke sékoteng agíke miru kídílok mopísula eetetpe duumatuai. Ngo ami kídíem mirolpe rolmín sumoto.

¹¹Idola supak ngo sok among sokke turla duuna kídíem angu ségulok ibomdungku.

¹²Bulu buluke ali-ayé kídíem eetetpe yédola lelíkyéku. Buluke onggur ane kídíde onggur ayéem ééyéku, amonge ali-ayé kídíem garsabiyéku, delokke delo pedonge alummayé. Ngo sim utepooro takam sim ngokke among lokke turla duuna ami kídíem biyé.

¹³E Judah kelang Israelke ami kídía! Kerang longe kídí delo mibo-miying ami kídíe akone akonem, ‘Judah lolang Israello aalíkna adír kísapakne nokkíng aalík daklangka!’ emla pélíkbosutuai. Idola ngo nolume mopítyéku, dekepe irongem dekena mibo-miying ami kídíe akone akonem, ‘Judah kelolang Israel kelo aana utepooro kísapaknem nolu paadak langka!’ emla pobosuyéku. Delok legape aapíe mííduklangka, delokke pesomapeka.”

¹⁴Maglíngke RUUTUM bí podung, “Edílo noluke buku kídíe ngome marmotodí, ngo buluke teyolo atung-arééem ruulíkto, delokke ngo angu aapí gekumato, idola ngokke ipe míínam kídíem ito.

¹⁵Idola supak ngo Jirusalem kelang Judahke ami kídíem utepooro ruulíkkupe emla mííbomdung. Dekepeila pesomapeka.

¹⁶Nolu sim ségu kídar sim igelangka: Noluk aralo aro agomem pobosulangka, kebang ekumlo eetet míípoem bomana jonna bedalokla, aro agomlok kebangem baabo sulangka.

¹⁷Kumrí-donggong teyolo atímana rukup-ruulatnam agér kídíem imapeka. Pésudola menam hakii bimapeka. Ngo mela-yatla, jonna pénsam kebang agom lumana, delokke írmí-ormo ina ami teyolo kangkidung. Sikepe RUUTUM ngo polendung.”

¹⁸Delo Maglíngke RUUTUMke agome ngokkíng lekoda píítoku.

¹⁹“RUUTUM bí sipe podung, ‘Judah ami kídí legape, poolo appinana, pilngonana, kínídnana, delokke íyingnanalo domape nyonamde erapruna, ashérunam gíídí-siipepe iyéku. Dekepeila aroemlang aapí eetedem nolu mííbomlangka.’

²⁰“Maglíngke RUUTUMbí sipe podung. Deddína gai-gaina doolung kídí loge, ami kídíe Jirusalemlo píídum sula idí longe píídak.

²¹Delo longe delo doolungkon lokke amie doolung konke amilo aala, ‘Ngolu Maglíngke RUUTUMme kumsukape delokke bíkke utepooroem paadope gídak. Kaju nolukom ngolukíng gímín getola!’ emla pobo-lubosuyé.

²²Delo longe kídí delo miga-miramna ami kídíe, gai-gakona opín kídíe Maglíngke RUUTUMme kumsukape, delokke bíkke utepooroem pangkape emla Jirusalemlo píídum suyé.

²³Delo longe kídí delo, angu-angu agom pona opín kídílokke midum íyinge Jihudi ami atello aala, Jihudi ami delokke ege genamem ukdola, ‘Ngolumkom nokke gíkolo gíbo langka. Kapeila Shédíbí nolukíng yémín gedung emla ngolu tatdung,’ emyé.” Si RUUTUMke ponam agome: