Read Alladian JEKHARIAH 9 Bible Online

JEKHARIAH 9 - Alladian bible

JEKHARIAH 9

¹RUUTUM kelok agom lenna agom si Hadrak amongke mirupe ila, Damaskas doolunglo duulíkyé. Kapeila RUUTUMke amige tani takamem kaayindung, delokke Israel opín teyong looteng kaadung.

²Dekepe kaanamde Hadragem rísuna Hamath lolang, ato-siro takamem ijiiruna Tur kelang Sidonke ami kídí loteng kaadung.

³Tur bí agíem língkum etor torgoosula edíng alongkai. Bí baldín emlang uunem demul kísa laadumsula, dekede bedang yupyang kísape ikai.

⁴Idola bíkke bomnam ekuserang kídí takamem RUUTUM bí laabín langkula siyénglo elpakyé, delokke bíme emelok gunyok yéku.

⁵Deme kaala Ashkelon bí pesoyé, delokke Gaja doolunge lang Ekron doolunge, atí míídíí suyimape dan-geyé. Gaja bí bíkke rojem nyokmoyé, delokke Ashkelon bí kumruk-moorukpe iyéku.

⁶Ngo Philistain kídíke míngkímem gatsékla, Ashdod doolungem mibo amipe bííbom moyé.

⁷Ngo buluke nappalok iyyiem laalenla, buluke iipang pénsamlok deemana donamem laalenyéku. Bulukelok laapek lennam ami kídíde Shédíke amipe ila, Judah among loteng ruutum agérem gérgoo boyé. Jebus ami kídí kísape Ekron doolung lokke ami kídíe iyéku.

⁸Idola ngok ekumeme línggoona maglíng kídí loge ipítyé. Edílokom ngok ami kídí teyonglo irééna amie ikumyimayé, kapeila ngo agísue supak kaabom sudungku.

⁹“E Jayonke mime kídía; E Jirusalemlo duuna mime-ome kídía, yagorupe ashéla erlangka! Kaatola, noluke rojabí nolukíng aadak. Bí deenam emlang turnamem bomala aapí-aang remyak runape ila, gado kolo, taktelna gado oo kolo duula aadak.

¹⁰Ngo Ephraim among loge guré-gaari kídíem laabínyé, delokke Jirusalem among loge mimak guré kídíem langkutyé. Delok teyonglo mimak iyyi takamem díryinyé. Opín-buang tabulo aapí eetetkunam legangem bí pokan gobiyé. Bíkke among yétae siyéngkon lokke ila siyéng konlope ila, Euphrates korong lokke ila among duurí lope kayé.

¹¹Nolu kepedan, ngokke daapong iyyie nolukíng kanam legape, asi kamana arunglok noluke patek sonam ami kídíem melen yéku.

¹²Depeila monnyoknam ami kídía, aapíe erpe mííbom dokula aalat sulangkuka. Supakkom ngo polendung; noluke adírnam legape nolume adu annyi kope ngok utepooroem nolukíng ruulík biyéku.

¹³Iyyiem pugarnam kísa Judahme ngo pugarla, Ephraimme delo yokmope taklíkyé. E Grik ami kídía, miram kídíke yoksa kísa noluke mirupe Jayonke ami kídíem ngo urrepyé.

¹⁴RUUTUM bí agí ami teyolo lengkansula yaari garpe bíkke epugem apyé. Ruutum Shédíbí bikulem mutla, sokko danlok gumnam meyatpe ina asarlok saayé.

¹⁵Maglíngke RUUTUM bí agí ami kídíem tamtepe ikapla, miru kídíem bulu ikumla nyokmoyé. Miru kídílo bulu elíng iyyipee lokte ikumla, tíngír suna ami ugna kísape mimaklo bulu ngomla, miru kídíke iyyieme biimoyé. Dekede runggu teyolo pélíknam simon-sili iyyi biilenna kísape, demangkom ipaknam adínke iyyiem eguglok sugla runggu delokke kéényung appi deloope bíídope sukbílíknam kísa iyé.

¹⁶Dekena longe pííyém, mér kaabomna, airupe kaabomna kísa, RUUTUM buluke Shédí bí bulume mopítyé. Dumluplo lunggu tadoge asirnam kísa among delo bulu asirla yéyé.

¹⁷Delo bulu kampo-tayyo aloorupe iyéku. Among delokke ali-aam kídíe, onggur alang kídíe, mimum-yaamé kídíem bojé along moyéku.