Read Alladian MALAKI 2 Bible Online

MALAKI 2 - Alladian bible

MALAKI 2

¹Maglíngke RUUTUM bí podung, “E miri kídía, sikesi nolum lulígname:

²Nolu ngok agom-aangem tatmape, noluke aapí-aangde ngokke amínem angun-abépe rínggemape iyémílo, ngo noluke teyolo pénamem melíkyé. Noluke utepooro kanam teyodelo ngo pélíkyé. Arope ngo deke teyodelo pélík tobong, kapeila nolu ngokke lulígem arorupe mínggela igemang.

³Noluke legape, noluke ome-oo kídíem itung-iréla, noluke ipaknam simon-sili kídíke tayé kídílok noluke mikmoem mollíkla, dekena tayé yoppomlo nolume gíboyé.

⁴Lebike otíng-oyin miri kídílo, ngokke daapong ibosuname duuyardope sim lulígnam sim noluke teyolo, nolu kaasu dokupe ngo lulígdung.”

⁵Ngokke agom-aangem ai-kamporupe tatbila, delokke igela idope, delokke dekepe iyémílo aina yénam emlang aapí eetedem ngo ruubi dope, Lebime ngo daapong dem ibosuto. Arope bí ngom pesola, ngome arorupe mínggela yéto.

⁶Bí agínpe aina poyil-iyil kídíem ikanbila, edílote menam agér imato. Bí ngokkíng jonnampe, delokke ai-kamporupe yémín geto. Bí deddínem paab agér bedalok gímomato.

⁷Kapeila Shédíke aro ngiitomem, mirike nabbéle mesiipe aiyé, delokke ami kídíe bíkkíng gíla tayyil-kaayilsupe aido, kapeila miri kídíde Maglíngke RUUTUMke kotokie.

⁸“Idola supak miri kídar nolu, aro bedalok gímape, gípat sudung. Noluke poyillok deddína amie tubesudung. Lebi kíng daapong ibosunam ayonem nolu betkai.

⁹Dekepeila nolumte míípakla, belumdope, delokke luge-pogedope ami kídíem ngo imoyé. Kapeila ngok bedalok nolu enmang, delok ayanpe dormo ayon lokke legí-sigalo nolu aro-sirope lengkanmang.”

¹⁰Ngoluk takamke abue atel manía? Shédí atel ngolum takam pílen manía? Ngoluke abu kídíke daapong ayon kídíeme, ngoluke arasulo loorí-sirípe mííbo sumape ikolok betbo sumanía?

¹¹Judah bí míngkengem betkai. Jirusalem lolang Israel amonglo, belumrunam atoem ikai. Mibo-miying uyuem kumsuna mimem, Judah ami kídíe mimepe laala, RUUTUM ke ayasunam Kumkeng Ekumem deemang-amo mokai.

¹²Sikepe ina ami kídíem, RUUTUM bí opín aralo duumo yimape luyulo laapak daklangka, delokke Maglíngke RUUTUM kíng Israel ami kídíke aman bomang kolo dekena ami kídíem imín gemoyimadak langka.

¹³Nolu sikepe angukon agér ekekom idung. Noluke mikside RUUTUM ke runggudem bííbomdung. RUUTUM bí noluke alag kídí delok ashéla amanem torík suyimala, delokke dekedem kaasu-tatsu lateng iyimala, nolu yagorupe kapla-rííla idung.

¹⁴“Kapei sikepe ikane?” emla nolu míídung. Legade idune, noluke yaamédu delo, noluke mimepe laanam kídílo nolu aroyimang. Nyamran ayon lokke noluke angong arope bulu ilate, nolu bulume aro mimepe aapílo geyimala, noluke lang noluke mime kídí pénsamlo hakiipe RUUTUM bí sikena agérem gérdung.

¹⁵Mimemla miloem RUUTUM bí amíl atelpe idope pímanía? Adín elang aidde bíkke manía? Kape amíl atele emkan? Kapeila bí noluke arasuloge, arorupe Shédíke amipe ina ome-ue kadope emla ito. Dekepeila noluke aralo sékoteng agí mimelo pébosunamem betmadope, nolu an-gapsulangka.

¹⁶RUUTUM Israelke Shédíbí sipe podung, “Ngo mepan bosukunamem akdung. Noluke aralo akone agí mime teyolo sikena ipusilééla atímana agér iyém, ngo kangkidung. Dekepeila nolu agísuem an-gapsulanka, delokke pésunamem igemape imapeka.”

¹⁷Noluke agom-aanglok noluke RUUTUM me apéé modung. Dekepe ilateng, “Kape kísape ngolu bím apéé modun?” emla nolu íídung. Nolu, “RUUTUM ke kangkolo atímana agér ina tabude aidung, delokke bí dekedem aipe míílíkdung,” demangkom, “Raadang aapí gena Shédí bí ingkoloi?” emla pola-ííla ikolok apéémodung.