Read Alladian MALAKI 3 Bible Online

MALAKI 3 - Alladian bible

MALAKI 3

¹Maglíngke RUUTUM bí poyansudung, “Kaatola, ngokke kerang-kerape ngokke bedangem irung gedope, ngom agér ibinem ngo lulígyé. Delo noluke kaata-tatí bomnam RUUTUM bí menang asak bíkke Kumkeng Ekumlo aayé. Noluke míítí bomnam kotokide pííla ngokke daapong ayonem lupa biyé.”

²Idola sékoda bíkke aadíku longedem donggap gelayén? Bíkke lengkan suyéme, sékoda dakka sulayén? Kapeila bí kampodope gubínna eme kísape iyé, demangkom deemangem arkutna sabon kísa iyé.

³Bí baldínem yolla kampodope ina kísa iyé. Bí Lebi kídíem deemo langkula, uun delokke baldínem imonam kísa, kampodope imoyéku. Delomin deenampe aman bomangkuna amie RUUTUM ke keralo kayékune.

⁴Yéruktonam longe kísa, Jirusalem kelang Judah ke aman bomanam kídíem RUUTUM bí torík suyéku.

⁵“Ngo nolum íngkí-bengkíkupe noluke pénsamlo aayéku. Delo jadu-montrong ina kídíem, abír-ayo ina kídíem, menampe hakii bina kídíem, agér ireem bimape yadna kídíem, mime meyéng emlang ane-abu kaimanem irééna kídíem, mibo-miyingem atímape iríkna kídíem delokke ngome pesomana kídíem, ngo hakii bidola aimangem lengkanyéku.” Sikepe Maglíngke RUUTUM bí polendung.

⁶“Ngo angupe ikup-ilatna RUUTUM mang. Depeila Jakobke otíng-oyin nolu, nyokyinmayé.

⁷Noluke buku-neku longe lokke ila, ngokke idong-iyon kídíem igemape, delokke mesiimape nolu yédung. Ngokkíng aalat sutokula, delo ngote nolukíng aalatsuyéku. Idola nolu, ‘Kapekísa ngolu aalat suyékun?’ emla íídung.

⁸Tanie Shédíme yadla yénía? Idola nolu ngome yaddung. ‘Ngolu nome kape kísa yaddun?’ emla nolu íídung. Íying sanpek lolang aman kídí legalo nolu ngome yaddung.

⁹Nolu opín takam nolu pénam aralo kadung. Kapeila nolu takam ngome yaddung.

¹⁰Ngokke Kumkeng Ekumlo donam kadope íying sanpek tabungem kumsunglo bomalangka. Ngo teyong amo lokke eyabem iyabila, nolu mebo supeko kaimadupe, deddína utepooroem ruulík biyédí, ruulík bimayédí, deme nolu kéndope ngome ikang kítola.

¹¹Ngo noluke ali-ayéme takom-tarugem domomayé, delokke noluke siipí-siiyé kídíe yaamayé, demangkom sumayé.

¹²Delo opín takame nolume utepooro kane emyé, kapeila noluke asi amode ardana moone amope iyé.”

¹³RUUTUM bí podung, “Nolu ngokke teyolo atírumana gomké em luto. Depe ilate, ‘Kape kísa ngolu nome gomké luton?’ emla nolu íídung.

¹⁴Nolu sikepe lupo bosudung, ‘Shédíme agér ibinam si asame. Bíkke míínampe agér-anam tabungem ibila, Maglíngke RUUTUM ke keralo kapla-rííla igong gela ikolok ingko koda ainem paangkan?

¹⁵Idola ngolu kaadung; míngkímsula yéna kídíe ashéla yédo, atímape yéna kídíe miremla, gerepdo, delokke séko bulu Shédíme lakkéng sutla ikangla idudí, bulute yépípe sudung.’ ”

¹⁶Delokrongem RUUTUM me pesona kídíe buluke aralo agom-aangem pobosuto, delokke buluke pobosunam tabungem RUUTUM bí tatgapla kaayinbito. Bíkke keralo, míípang genana kitabkolo RUUTUM me pesona, delo bíkke amínem mínggena kídíke legí-sigangem atkumto.

¹⁷Maglíngke RUUTUM bí poto, “Si ami kídarsi ngokkepe iyé. Ngokke agér gérdí longe pííyém, bulu ngokke atekrupe mengusunam amipe iyé. Abu agom tatna oo teyolo kapekísa abue ayasududí, delok kísa buluke teyolo ngo ayasuyé.

¹⁸Delo nolu lekoda, deena ami kelang deemanake, delokke Shédíme agér ibina kelang ibimana buluke rísonem kaapayéku.”