Read Alladian MATI 15 Bible Online

MATI 15 - Alladian bible

MATI 15

¹Delokrongem Pharisi kídí elang ukil kídíe Jirusalemlok Jisu kíng aala lukai,

²“Kapeila nokkelo luyilsuna kídíe abu kídílokke yénam ayonem iyimane? Bulu buluke alagem kerape laksuk sumape dodung!”

³Jisu bí poyansukai, “Kapeila nolu agíke luyilnamem bomsupe Shédíke ngiitomem betkane?

⁴Kapeila Shédíbí potuai, ‘Nokke ane abuem míngge langka delokke séko agí abuem demangkom anem, béésuyédí bím simorupe aido.’

⁵Idakkom nolu ludung, ‘Ami akone agí abuem demangkom anem, igul lanana ekurang kadolateng, “Si Shédíke” emla poyémílo,

⁶bí agíke abuem [13] míngge penam kamang,’ emdung. Sikepe nolu agíke luyilnamem mesiisupe Shédíke ayonem mepakdung.

⁷Nolu aromana kídía! Isaiahke noluke legangem polupoor binam si poyin bitung:

⁸“Si ami kídí si ngom buluke nabbéllok mínggedung, depe idokom buluke aapíe ngokkelok mootedung.

⁹Bulu emmumpe ngom kumsudung; buluke luyilde tanike ayonlok pobiname!”

¹⁰Jisu bí milung dem bíkkíng tomnín sudola poto, “Tatgap langka delokke kénlangka.

¹¹Ingkuedí tani nappalok aadudí de bím ‘Deemang’ momang, idakla ingkuedí nappalok lendune, demin bím ‘Deemang’ modune.”

¹²Delo luyilsuna kídíe bíkkíng aala sikepe íngkíto, “Pharisi kídíe dem tadrongem míínyidung dem no kéndunía?”

¹³Bí poyansuto, “Ngokke teyong Yayike lelíkmanam asul takamdem appír lokkai bupakyé.

¹⁴Bulum metoka bulu mingmadola gíbone.[14] Mingmane mingmana terengem gíbomílo, annyi dekai deerulo olíkyé.”

¹⁵Pitor bí pokai, “Dem luyiisunam agomdem ngolum pobeng bikui.”

¹⁶“Nolu supak peteng tatkén manía” emla Jisu bí bulum luto.

¹⁷“Ingkue nappalo aadudí de akiilo tokdung delokke delo amíllok gípak dungku dem nolu kénmanía?

¹⁸Idakkom nappalok lenkuna atí kídíde aapí ainang lokmin lendune, delokke dekede taniem ‘Deemang’ modung.

¹⁹Legade aapí-aang lokmin míísi mííngo, petka moka, abír ajon, mime milo belum bekam agér, doppyo tíísi, melí yaddong, lukang pokang takamsi lendune.

²⁰Sike simin tanime ‘Deemang’ emmone; idakkom laksuk sumape donam delok bím ‘Deemang’ momang!”

²¹Dem amodem megeyéla, Jisu bí Tur lolang Sidonlo gílat sukaku.

²²Delo amodelo duuna Kanaan mimekone bíkkíng aala, gokto, “Ruutume, Dabidke Ue, ngom yaasam toyika! Ngokke omem urome duubomla pesorupe kidung.”

²³Jisu bí gompil kokom poyansumang. Dekepe ila bíkkelo luyilsuna kídíe bíkkíng aala sikepe roguto, “Bím melík tokuka, kapeila bí ngoluke méélamlo goktí míndung.”

²⁴Bí poyansuto, “Ngom Israel mér sobén nyokna kídí lomin melíktune.”

²⁵Delo mimede pííla bíkke keralo peladola pokai, “Ruutume, ngom igulru toyika!” emla bí roguto.

²⁶Jisu bí delo poyansuto, “Koo kídí lokke dotkéyem laabínla buluke ekiilo yobbinamde aimang.”

²⁷“E, Ruutum” emdola bí pokane, “Idokom ekiie ruutumlokke apim ekunglok pimpil olet nemkom dodo.”

²⁸Delo Jisu bí poyansukai, “Mime, nokke míngkenge bottedung! Nokke roguem tatbidung.” Delokrongem bíkke omede delokke ila aikaku.

²⁹Méélamdem Jisu bí delokke gílangkula Galil sine ayirlo pííto. Delokrongem bí etpalo saala delo dungaato.

³⁰Milungko bíkkíng aala, lebyanem, mingmanem, lebéénem, agom pokénmana midem delokke abíd abíd amiem bulu Jisuke alelo aaboto, delo bí bulum ukkíla ipítoku.

³¹Edílo agom pokén mane polen tokudí, lebééne aikakudí, lebyane gílen kakudí delokke mingmane kangka kudí, delo amie sai emla míngkai. Delokrongem bulu Israel lokke Shédíme yidgeto.

³²Jisu bí bíkkíng luyilsuna kídíem poto, “Ngo sim amikídí sim ayang kaapa sudung; bulu ngokkíng longum kokai yémín gekolok dope tíípenam kayimang. Ngo bulum kenodope melík língkumang demamílo bulu bedalo molayimape iyé.”

³³Bíkkelo luyilsuna kídíe poyansukai, “Siddína milung sim donam bidope so mootengko amoso ingkolok ettíngem píídope paayéne?”

³⁴“Lub rotie edítko nolu kadun” emla Jisu bí íngkíto. Bulu “Lub kínít kolang engo améneke anyongko kadung” embito.

³⁵Bí mibamdem amolo duulangka emto.

³⁶Delokrongem bí lub roti kínít demlang engodem laato, delo bí yidgerongem, bí dekedem penla luyilsuna kídíem bito, delo bulu amikídíem orto.

³⁷Bulu takame dola tííla kiidarto. Méélamdem luyilsuna kídíde dongong tíngongem laadum sukuname aapé bíína kínítko ido.

³⁸Mime kíangko kídíem lutak sumape sankíname dona kídíe midum éjar appiko.

³⁹Méélamdem Jisu bí milung dem mepan surongkuem, bí etkunglo rengaala Magaden ayirlo entoku.