Read Alladian MATI 16 Bible Online

MATI 16 - Alladian bible

MATI 16

¹Pharisi kídíelang Sadduki kídíe Jisukíng aala bím aang ikaape emla taleng telok iyodko ibidope pokíto.

²Bí sikepe poyansuto, “Yume ito, nolu emdo, ‘Talenge dooreyéku, kapeila taleng si líídung’;

³delokke rue ito, ‘Silo gumyé, kapeila taleng si líídung delokke kaamue idung.’ Talengem kaala kape iyédí dem pogangem nolu kéndung, dekom iyod moodíem nolu pobikénmang.

⁴Mirulna delokke abír ina siirume irisinyo iyodem matadung, idakkom séko mekom Jonahme iyod binam kékondelo iyod bimayé.” Jisu bí delo bulum megeyéla gítoku.

⁵Sine paatang dem bulu koodo delo luyilsuna kídíe ettíngem mesuto.

⁶“Ansulangka” emla Jisu bí bulum potosubito, “agíem Pharisi kídí kelang Sadduki kídíke siiyé lokke ansulangka.”

⁷Buluke aralo agí agísue dem legadem pobosudola pokai, “Ngolu ettíngem bomang malamino.”

⁸Buluke lupo sunamdem Jisu bí talla luto, “Nolu míngkeng pííramna kídía kapeila noluke aralo ettíng kamang emla potí bosukane?

⁹Nolu supakpete kénmanía? Lub roti pilngo lok éjar pilngo ami legape edít aapé bíínako nolu paatone dem míípang sukumanía?

¹⁰Delokke lub roti kínítlok éjar appi ami legape edít aapé bíínako nolu paatone?

¹¹Kapeila nolu tatkén mane, depe emnamde ngo ettíng legangem pomapía? Pharisi kídí delokke Sadduki kídíke siiyélokke nolu agíem ansulangka,” emlamin podune.

¹²Delomin ettínglo siiyé líknam legangem bí pomangai idola Pharisi kídí kelang Sadduki kídíke luyil agom legang emmin podune emnamdem bulu kénsu kakune.

¹³Méélamdem Jisu bí Kaisaria lokke Philippi amolo pííduem, bí bíkkelo luyilsuna kídíem íngkíto, “Tanike Uem amie séko emdun?”

¹⁴Bulu poyansukai, “Ayokone Baptist Joan bí, ayokone Elijah, delokke attungkone Jeremiah, demangkom kaaluna mirikonko,” emkai.

¹⁵Bí íngkíto, “Nolu kape emdune? Ngom nolu kape emdune?”

¹⁶Simon Pitor bí polenkai, “No Kristomin,[15] Turna Shédíke Ue.”

¹⁷Jisu bí pokai, “Joanke oo Simon, no gérne, kapeila dem tanilok nom berok bimang, idakla teyong telo duuna ngokke Yayimin berok bitune.

¹⁸Delokke ngo nom podung, Pitor, no línggenko, delokke so lííduso ngokke mondoliem ngo molíkyé, delokke sinam eteng dem ikum lamayé.

¹⁹Ngo nom teyong amolokke sabiem bilíkyé, ingkuem no tani amongso luyadudí teyong amolokom luyayé delokke no tani amoso ingkuem tolík dudí dem teyong amolokom tolíkyé.”

²⁰Delokrongem bíkkelo luyilsuna kídíem Kristo emnam agomdem sékomete pobimapeka emla bí pogapsuto.

²¹Delokke ilangala Jisu bí bíkkíng luyilsuna kídíem bíkke Jirusalemlo gíla mirokídí, rínekídí delokke ukilkídí alaglo bím iréé sinyola, bím mokala, delokke bíkke ibum roolo gerep kupenamem polen subito.

²²Delo Pitor bí gípek bosudola bím luto, “Depe imayé, Ruutume! Nome edílokom depe imayé.”

²³Jisu bí ngéngkut sulangkula Pitorme luto, “No soitanno ngokke keralo duumapeka! No ngokke tupsu pekue; no Shédíke arang aapíem gemang, idakla tani aapí emmin gedune.”

²⁴Delokrongem Jisu bí bíkkíng luyilsuna kídíem pokai, “Séko ngokkíng aape míídudí, bí agí aapíem mepaksula agíe kross em bomsula ngokke méélamlo gímín gepe aido.

²⁵Kapeila séko agí turnamem[16] mesiisupe míídudí bí dem menyoksuyé, idakkom séko ngokke legape turnamen menyok sududí demoko dem paayéne.

²⁶Tanie tani among tabung sim paalateng agí aidem nyokmo dumílo bíkke ingkoko laabe kadun? Demangkom bíkke aid ayanem tanie ingkoko biyan suladun?

²⁷Legade Tanike Ue bíkke teyong kotoki kídíem yébosula bíkke Abuke angun ralnamlo aadak kubong delokke delomin mipilem mipil ikorlok amanem biyékune,

²⁸Ngo nolum aropakpe podung, so dakna ayokone Tanike Ue bíkke amolo aadokupe kaasuma tetengem simape duune kayé.”