Read Alladian MATI 17 Bible Online

MATI 17 - Alladian bible

MATI 17

¹Longké méélampe Jisu, Pitor, Jems delokke Jemske bíro Joan bulum lekope dííte teyolo saabo sukai.

²Delo buluke keralo bí ballupto. Bíkke mingmode doonyi kísa angune ikai.

³Dekepe idodelo Mosilang Elijah bínyi, Jisume luposuto.

⁴Pitor bí delo Jisume emto, “Ruutume, ngolu so duubosunam si duuji namko. Nokke míísang emílo, ngo delo duupekuem ibiyé nok kepe ako, Mosi kepe ako delokke Elijah kepe ako.”

⁵Bí depe pongo pakduem, doomug muklune bulum yéllum bomkai, delokke doomug aradelok agomko poto, “Si ngokke Ue, bím ngo ayadung; bím ngo mííyum sudung. Bím tatlangka!”

⁶Luyilsuna kídíde dem tatyédelo, bulu pesuem amolo mingmue igeto.

⁷Idakkom Jisu bí aala bulum ukkíto. “Dareplangka, pesomapeka” emto.

⁸Bulu kanggo sukuname séko meteng kaamang, Jisu petomme kaato.

⁹Bulu dííte delokke oidakkuem Jisu bí bulum sikepe poyilto, “Tanike Uem sikolokke kiirep kumang tetengem nolu ingkuem kaatodí dem séko meteng pomapeka.”

¹⁰Bíkkelo luyilsuna kídíe aala bím íngkíto, “Demílo kapeila ukil kídíe Elijah bí kerape aayérungku emkane?”

¹¹Jisu bí poyansuto, “Berokrupe pomílo, Elijah bí aala takam atíem mosingyéku.

¹²Idakkom ngo nolum podung, Elijah bí angka kubong idola bulu bím kénmape igeyéla, bulu kusiipe bím ito. Deke kísape Tanike Uemkom buluke alaglo iréé sinyola iyé.”

¹³Delo luyilsuna kídíe bí Baptist Joanke legangem podung emla tatkénto.

¹⁴Bulu ami baane delo aado kudem, amiko Jisukíng aanínla delokke bíkke keralo polenkai.

¹⁵Bí “Ruutume ngokke oo teyolo yaasam toyika” emla roguto. Bí pokai, “bí simatla botterupe kidung. Leko leko bí emelo demangkom asilo olíkdung.

¹⁶Ngo nokkelo luyilsuna kídílo bomatuai, idakkom bulu bím ipílatomang.”

¹⁷“E, arope míímana delokke bulna siiruma” emla Jisu bí pokai, “Edítpe nolukelo ngo yébo supene? Edítpe ngo nolum duubo supene? Koodem ngokkíng so bomatola.”

¹⁸Jisu bí uyuem luto, delo uyude koo delokke lentoku, delokke ila koode ekerkaku.

¹⁹Delokrongem luyilsuna kídíe Jisukíng rongngampe aala tatkíto, “Ngolu kapeilai dem monlang kumatone?”

²⁰Bí pokai, “Kapeila noluke míngkenge anyodung. Ngo nolum aruem podung, nolu ansoona tulang amí kísanako míngkeng kamílo nolu sim dííte simkom ‘Sokke elo ngétgé langka’ emmílo de arope ngétgéyé. Ingkuete nolu kepe ilamanam kamayé.

²¹Sikena atíem dobom suyimape kumnamlok pakdung.”

²²Bulu Galillo gídum sudodem, bí bulum pokai, “Tanike Uem miru kídí alaglo yadlík yébong.

²³Bulu bím petyé, delokrongem, ibum roolo bím turdokupe kiirepyéku.” Delo luyilsuna kídíde buulínge ito.

²⁴Jisulang delokke bíkkelo luyilsuna kídíde Kapernaumlo pííduem, kumkeng ekum lokke kajanang ulna kídíe Pitorkíng aala íngkíto, “Noluke babue kumkeng ekum kajanangem bidunía?”

²⁵Bí “E, bidung” embito. Edílo Pitor bí ekumdelo aatodí delo Jisu bí kerayalumpe pogekai, “Simon, no ingkoko míídun” emla íngkíto. “Ingkolok tani amosokke roja kídíe kajanang uldune buluke agí ookídí logía ma, abíd ami logía?” emla íngkíto.

²⁶Pitor bí “Abíd amilok” embito. “Demílo ookídíem mesam bidung” emla Jisu bí bím poto.

²⁷“Nolu bulu míínying madope sine paatalo gíla gakar píkto langka. Nokke kerang yalumpe píknam engodem laala nappangem kiiyatoka delo nolu abalko paayé. Dem laala bulum ngokke pelang noluke kajanape bitolangka.”