Read Alladian MATI 18 Bible Online

MATI 18 - Alladian bible

MATI 18

¹Depe irongem luyilsuna kídíe Jisukíng aala íngkíto, “Sékoi teyong amolo botteyalumne?”

²Bí koo aménako tomaala buluke keralo dakmoto.

³Delo bí poto, ngo nolum aruem pobidung, nolu angurupe koo aména sok kísape ikumamílo nolu edílokom teyong amolo aala mayé.

⁴Delok legape, séko sok koo ansoona sok kísape agíe amépe míísududí bímin teyong amolokke botte yalumne.

⁵Delokke séko sok kísana koo améngonem ngokke amínlok torík sududí bí ngom torík sudung.

⁶“Idakkom séko ngom arope míína koo kídí akonem paab imodudí, bíkkepe bottena anyat lííbyangko agí alíílo paklík supala siyéng asi arabelo giilum sunamde aiyado.

⁷Si tani amongke gérmang pekue, kapeila tani amoso taniem paab imona atíeke kadung! Sikena atíe kaperung aiyé, idakkom ingko amie depe imodudí pesorunam gérmade bíkkelo duuyé!

⁸Nokke alage demangkom nokke ale nom paab imodumílo, dem teepak sutola. No alag annyiko demangkom ale annyiko gedola mityimana emelo yoplík kosu pemílo, letu lakbyala turkolo aanamde nokkepe aiyado.

⁹Delokke nokke amige nom paab imodumílo, roolensula dem elpaktola. No amig annyiko gedola doorum líísam emelo yoplík kosu pemílo, turkolo mikkéla aanamde nokkepe aiyado.

¹⁰“Nolu sim koo aména sokke akonemkom míílomapeka dem kénsu langka. Kapeila ngo nolum podung teyong telo duuna buluke teyong kotoki kídíe agínpe ngokke teyong Yayike mingmuem kaasudung.

¹¹Kapeila Tanike Ue nyokna amiem mosingkupe emlamin aatone.”

¹²“Nolu ingkoko míídun? Ami akone mér sobén língkoko bommílo, delokke delok akone nyok mílo, bí íying konang demlang konang dem dííte teyolo megeyéla, gínyok nadem mata pongku mape iyélanga?

¹³Delo bí dem pangkumílo, ngo nolum aruem podung, bí duusuna íying konang demlang konang dempemílo, gínyokna ateldem ashéng yabomdung.

¹⁴Deke kísa pakpe noluke teyong Abue sok aména koo kídísok akone nyoknam demteng aipe míímang.

¹⁵“Nokke bírue nokke kangkinam ko idumílo”[17] nonyike arasulo gíla delokke bím bíkke imemem lukan bitoka. Bí nokke agomem tatyémílo, no nokke bíruem paatoku.

¹⁶Idakkom bí tatma yémílo, no midum akon mangke annyiko tomla gíbo sutoka, delomin legang takamem hakii annyi angum agomlok tatyéne

¹⁷Bí delote buluke agomem tatmang teteyémílo, mondolilo lukan langka; mondoli agom emte tatmayémílo, bím mipak amipe demangkom kajanang ulna amipe imolangka.

¹⁸“Ngo nolum aruem podung, nolu ingkuem tani amoso luyayédi, depe teyong amolokom iyé, delokke ingkuem nolu tani amoso tolíkyédí teyong amolokom tolíkyé.

¹⁹“Lekoda ngo nolum podung, nolu midum annyiko noluke aralok kumbom penam atíem lekobosula komílo, dem ngokke Teyong Yayi bí nolukepe ipííbiyé.

²⁰Kapeila ingkolo midum annyi mangke angumko ngokke amínlok duudum sududí, delo ngokom bulukíng duumíndung.”

²¹Delo Pitor bí Jisukíng aala ingkíto, “Ruutume, ngokke bírue ngokke kangkinamko imílo edítko ngo bím maab bipe aidon? Lemkínít lopía?”

²²Jisu bí poto, “Ngo nom podung, lemkínít petommang, idakla lemying kínít kolang lemkínítko.[18]

²³Delok legape, teyong amode roja lokke agí béérang kídíke ajéngem isap iyin bosupe emla inam kísadung.

²⁴Bí isabem ilenbosupe iyédem, bíkkelok jarying lííying ajéng gena amiko bíkkíng aabodo.

²⁵De amide abalem bilang tokumang iname, bílang bíkke méng ome-oo kídíem delokke bíkke bomnam sérang takamem kosula bilat dokupe ruutumde hukum bito.

²⁶Béérade bíkke keralo lebíng koníla pelaato. Bí rogudola poto, ‘Ngom donggap bipong langka, delokke ngo takamem doryéku.’

²⁷Béérang delokke ruutumde bím ayange emla mííla, bíkke ajéngem mesam bito delokke bím gímotoku.

²⁸“Idakkom edílo de béérade gílen tokudí, delo bíkkelok adoli língko ajéng gena, bíkke béérang angongko paato. Delo bí akondem gakla nyumsulpe emla ibomkai. Bí ‘Ngokke ajéngem dortolangku!’ emto.

²⁹Bíkke béérang angode lebíng koníla bím rogudola poto, ‘Ngom donggap bipotoyika, ngo nom doryérungku.’

³⁰Idakkom bí tatbimang. Dem megeyéla, bí gíla amidem bíkke ajéngem dorkuma tetengem duuyépe emla bím pateklo líkto.

³¹Delo abíd béérang kídíe kape itodí dem kaayédem, bulu airupe duuge ito delo gíla buluke ruutumdem legang takamdem pobitoku,

³²Delo ruutumde bééradem tomaato. Bí luto, ‘No mirul no, nokke ngom rogukolok ngo nokke dorkupenam ajéng emte mesam bito.

³³Ngokke nom inam kísape no nokke béérang ajonem yaasam lamanía?’

³⁴Bíkke ruutumde marla bím bíkke ajéng takamem dorkuma tetengem duuyépe emla bím pateklo meto.

³⁵“Noluke bíruem noluke aapí ainalok maab bimamílo ngokke teyong Yayikom nolum mipilem dekepe iyé,” emla Jisu bí poto.