Read Alladian MATI 19 Bible Online

MATI 19 - Alladian bible

MATI 19

¹Jisu bí atí kídíem poyinrongem, bí Galilem megeyéla Jordan rotkonlo Judia amolo gíkai.

²Deddína mibame bíkkíng gímín geto delokke bí bulum delo ipítoku.

³Delo Pharisi kídíeke aala bím ikang darkaape emla ito. Bulu íngkíto, “amie atí atí legalok agíke mimem mepan suladokunía?”

⁴Bí poyansuto, “Kerayalumpe pílenne ‘bulum milo pelang mimepe píto

⁵delokke delok legalok agí ane abuem megeyéla agíke ménglo milue duubosuyé delo annyide adín atelkope iyé’ dem nolu porimanía?

⁶Depe iname bulu midum annyikope iyimang, idakla dínbíng atel pemin ibosukane. Delok legape Shédí bí ingkuem idum sutudí dem sékokom ipan sumapeka.”

⁷Bulu tatkítoku, “Demílo kapeila Mosike ngiitome milue agíke mimem mekunana kakot bigeyéla delo mimem metokuka emkane?”

⁸Jisu bí poyansukai, “Mosike nolum méngem mepan sudokupe tolík binam legade nolu aapí angkam gekolokmin. Idakkom kerape depe kamangai.

⁹Ngo nolum podung sékodí, ketbo doobo belum penam kékonlo agí méngem mepan sulangkula delokke mimekonko laayékudí bí abír ine.”

¹⁰Luyilsuna kídíde bíkkíng aala pokai, “Milo méng legade dekepe idumílo, milo méng laamade aiyado.”

¹¹Jisu bí poyansuto, “Mipile sok agomsok ilamang, idakla séko bulum sikepe idope ruutudí, bulu petommin ilayéne.

¹²Kapeila ayokonem ane olen lokkekai mumbalpe otung; ayokonde tani isunam mumbale; akon akone teyong yéta kepe agíem agíe mumbalpe mesudung. Séko dem toladudí dem tolado.”

¹³Delokrongem koo aména kídíem Jisuke alage buluke teyolo leetan líkla bulum kumbidope bíkkíng aaboto. Idakkom luyilsuna kídíe bulum aabona kídíem luto.

¹⁴Jisu bí pokai, “Koo aména kídíem so ngokkíng aamotoka, delokke bulum luya mapeka, kapeila teyong amode buluke kísana tanike.”

¹⁵Bí buluke teyolo alage leetanla lubéé líkpala delokke gíto.

¹⁶Depe iduem amiko Jisukíng aala tatkíto, “Babue, duuyarpena turnamem paadope, ngo ingkona aina atíem iperung aidon?”

¹⁷“Kapeila no ngom aina atí legangem tatkídune” emdola Jisu bí poto, “Aina atíde Atel petomko. No turpekolo aalídumílo ngiitomem igetoka.”

¹⁸“Ingkona ngiitomem” emla amide íngkíto. Jisu bí pobito, “Ami petmapeka, abír imapeka, pyoomapeka, menam hakii bimapeka,

¹⁹nokke ane abuem míngge langka, delokke ‘Noluke kumríem agí kísape ayalangka.’ ”

²⁰De amide pokai, “Sim takam sim ngo idung, ingkuem ngo supak peteng pííramdune?”

²¹Jisu bí pobito, “No arorulok yépe míídumílo, gílangkula nokke sérangem opan kídíem ortolangku, delokke delomin no teyong amolo miremyéne. Delokke kaju ngokkíng gímín getola.”

²²Yaamé amide dem tayyéname, buulangala gíkaku, kapeila bí ekurang kana rungkuai.

²³Delokrongem Jisu bí bíkkíng luyilsuna kídíem poto, “Ngo nolum aruem pobidung, mirem amikepe teyong amolo aanamde bomram runame.

²⁴Lekoda ngo nolum pobidungku, mirem amie Shédíke amolo aapemílo, uut simone pesi arulok pessul namde ipoyaname.”

²⁵Luyilsuna kídíde dem tayyédem, bulu abah emla míídola íngkíto, “Demílo sékoda mopít kosulayéne?”

²⁶Jisu bí bulum kaasudola pokai, “Tanilok si ilamaname, idokom Shédí kelok takam atíem iladung.”

²⁷Pitor bí bím poyansuto, “Ngo atí takamem megeyéla nokkíng gímín gedung! Demílo ngolu ingkuem paapene?”

²⁸Jisu bí bulum poto, “Ngo nolum aruem pobidung, Tanike Ue bíkke angun ralna palenglo duuyékuem, atí takame anípe batyéku delo nolu ngokkíng gímín genakídí nolu Israel lokke íying kolang annyi opínem bisar dakla nolukom íying kolang annyi umkélo duuyé.

²⁹Delokke agí ekum kídíem demangkom bíro kídíem demangkom bírme kídíem demangkom abuem demangkom anem demangkom ome-uem demangkom arík anam kídarem ngokke legape mepaksuna mipíde lííyi língope laabem paayéku delokke turyarna yénamem ruutum dogeyé.

³⁰Idakkom deddíko kerang nekom méélam yéku, delokke méélam nekom kerayéku.