Read Alladian MATI 2 Bible Online

MATI 2 - Alladian bible

MATI 2

¹Jisume Judia amolo orongem, Herod Rojake yédudelo, Sanggo danlok ngiitom kénnarung amieke Jirusalemlo enadola

²sikepe tatkígooto, “Judai kídílokke rojape ipena amiem ingkoloi otune? Ngolu sanggo danlo bíkke takarem[3] kaato delokke ngolu bím kumkape emla endung.”

³Herod Roja bí dem agom dem tayyéname, bílang bíkke ami Jirusalemlo duuna takame lalgoosukai.

⁴Delo bí miri ríne takam emlang ayon kénna amikídíem tomdumsula, bulum íngkíto, “Kristome ingkoloda oyéne?”

⁵Bulu, “Judialokke Bethlehemlo” emla pobito, “Kapeila dem kaaluna mirie atbitung.

⁶“ ‘Idakkom Judah amolokke Bethlehem no Judah amongem yébona kídí lokke anyongo kote améyamang; kapeila nokke aralok yébonako ngokke Israel amikídíem mér kaabomna kísape yébonako lenyé.’ ”

⁷Delokrongem Herod bí kénna kídíem tomsup supala, de takarde lenrongem edítko longe ikadí, dem berokpe bulu kelok paato.

⁸Bí bulum Bethlehemlo melíkdola “Gíkaala koo delokke legangem aipakpe makítoka, bím nolu paayémílo, ngom pokan langkuka, delo ngote gíla bím kumsupe” emla poto.

⁹Delokrongem bulu roja agomdem tatgeyéla enbomto, delo buluke sanggo danlo [4] kaatonam takarde kerang kerang gígela, koo delokke dungkolo pííla, delo teyodelo dakkai.

¹⁰Dem takardem bulu kaala ashérunge ito.

¹¹Ekum delo aaname bulu Mari melang koodem kaala, delo bím lebíng koníla kumsuto. Delo bulu agí eku sérang nyogonem ngunsula, uun, nampona alangem delokke pakyak abagem bím amanpe bito.

¹²Méélamdem, Herod kelo gíang kumang adape bulu immalo Shédíke kotokie luto subinamem tatla, angu bedalok agí amope ennyok toku.

¹³Buluke enrongkuem, Ruutumke teyong kotokikone Josephme immalo ríksula poto, “Dareptola, koo demlang bíkke anedem gíbola, Ijipt amolo duknyok gekala. Ngokke pokuma tetengem, delo duupo langka kapeila Herod bí koo dem petpe emla matadung.”

¹⁴Delo bí darepla koo demlang delokke anedem gíbola Ijipt amolo yuem ennyokboto,

¹⁵delo Herodke simang tetengem bí delo duuto. Dekepe iname Ruutumke kaaluna mirike ponam agom, “Ijiptlok ngokke uem ngo tomtoku,” emnamem apíímoto.

¹⁶Depe iduem ngiitom kénnarung ami kídíde bím agíem atí míngge mape inamdem kénsula, Herod bí séngéépe markai. Delo bí ngiitom kénna kídí delok agom retaklok tatla Bethlehemlo duuna dítag annyina miloko ojinga emnamem petyindope lulígto.

¹⁷Delo ingko agomem Kaaluna miri Jeremiah kelok sikepe pomo tuadí de apíngkai:

¹⁸“Ramalo kapnam ríínam adutko tatto, Rasel bí agí ookídí teyolo kaptíla, buluke kaimangem kaala, ashépe duulí yimape ito.”

¹⁹Delokrongem Herodke sirongem, Ruutumke teyong kotokikone immalo Josephme ríksula,

²⁰poto, “Darep tolangku, koo demlang delokke bíkke anedem gíbola Israel amolo gíka langku, kapeila koo dem petpe emla ralbomna kídíde sikai.”

²¹Depe iname bí darepla, koo demlang bíkke anedem gíbola Israel amolo gítoku.

²²Idakkom Judia amolo bíkke abu Herodke ayanem Arkila dungge dungku emnamem tayyédem bí delo gílat kupe namem pesoto. Immalo Shédíke lunoo binamem tatla bí Galil amolo gígen geto,

²³delokke delo gíla Najareth emnam taonkolo duuto. Dekepe ila kaaluna miri kídíke “Bím Najaren emla mínyé” emla pobinam agome arokai.