Read Alladian MATI 20 Bible Online

MATI 20 - Alladian bible

MATI 20

¹“Kapeila teyong yétade among akone rokompakpe gíla agí onggur aríklo agér gérpena ami tomna kísadung.

²Bí bulum longem adolipe bidope emla lubo supala bulum agí onggur aríklo melíkto.

³Konang bajilo bí gíla kaatoname abíde pesikoret ipomlo atí imape dakdo.

⁴Bí bulum poto, ‘Nolukom gíla ngokke onggur aríklo agér itolangka, delokke ngo nolum bibaa bibaape bisupe.’

⁵Delo bulu enkai. Bí lennyinape, doonyi kaadusudo pagemlang delokke angum bajilo gílangkula iyang iyape itoku.

⁶Pilngo bajilo bí gílangkula kaaname abíde yéman tetedung. Bí bulum íngkíto, ‘Nolu kapeila so longe rubungem agér imape yémankane?’

⁷‘Kapeila sékote ngolum ríkrap tomna kamang’ emla bulu poyansukai. Bí bulum poto, ‘Nolukom ngokke onggur aríklo gíla agér gértolangka.’

⁸“Adenge pííyédem, onggur arík atode ekum ruutumdem pokai, ‘Agér ina kídíem tomla buluke irem, méélam yalumpe tomnam kídíem bitoka.’

⁹Pilngo bajilo agér ilenna amikídíe adolipe mipile paato.

¹⁰Kerayalumpe tomnam kídíem bidíe pííyédem, bulu bojéyape paape emla míítuai. Depe ilate bulukom mipile adolipe paato.

¹¹Bulu dem paayédem, among atodem lugekai.

¹²Bulu pokai, ‘Si méélamyape tomnam ami kídísi gonta petomko agér gérto, depe ilate no ngolum doonyi pamkilo agér gérbona kídíke akampe bulumteng bitung.’

¹³“Idakkom bí, akondem poyansuto, ‘Angonga, ngo nom imemmang. Nokke irem adolipe idope tobo sumanía?

¹⁴Nokke irem laala gíka langku. Ngo méélampe tomnam amisim nolum binam kísape bipe míídung.

¹⁵Ngokke poisarlok ngokke mííbape ilamanía? Demangkom no ngokke bidar namsim nesudunía?’

¹⁶“Depeila méélame kerayé, delokke kerange méélamyé,” emla Jisu bí poto.

¹⁷Jisu bí Jirusalemlo gídagem, bí midum íying kolang annyi luyilsuna kídíem tomngu sugeyéla bulum poto,

¹⁸“Ngolu Jirusalemlo endak, delo Tanike Uem miri ríne kídí lolang delokke ukil kídílo yadlíkyé. Bulu bím simoyé,

¹⁹delokke bím mipak gooralo ipusiléé dope melíkyé, demngéémola delokke pansaala meyé. Longum napenalo bím turdokupe kiirepyéku!”

²⁰Delokrongem Jebedike ménge bíkke oo annyiem gíbola Jisukíng aala, peladola bím tatkíto.

²¹“No ingkuem mííbomdun?” emla Jisu bí bím tatkíto. Bí pokai, “Ngokke oo annyi sokke akone nokke lakbík danlo delokke akone nokke lakké danlo nokke amolo duudope itoyika.”

²²“Nolu ingkuem tatkídudí, dem nolu kénsumang”, emla Jisu bí bulum poto. “Nolu ngokke tíípenam batilo tíílayénía?” emla Jisu bí íngkíto. “Ngolu tíílayé” emla bulu poyansuto.

²³Jisu bí pokai, “Nolu ngokke batilo tííyé aro, idakkom ngokke lakbíklo demangkom ngokke lakkélo duupenamde ngokkelo kamang. Si jéga kídarsi ngokke Yayike iruu binam amikídí kepemin kadune.”

²⁴Edílo midum íyingde dem tattodí, bulu bíro annyi teyodelo míínyingkai.

²⁵Jisu bí bulum tomdum supala poto, “Nolu kénsudung Mipaklokke kebang ruutum kídíe buluke ruutumpe idung, delokke buluke miro kídíe bulum lubo pobodung.

²⁶Nolukelo depe kamang. Dempenem noluke aralo séko botte lídudí de noluke béérape ipe aido,

²⁷delokke kerang línade noluke abílpe iperung aido,

²⁸kapeila Tanike Uekom igul kosukape emla aamang, idakla igulkape emlamin, delokke bíkke turnamem miti miling takam legape repít subi nadokupe emlamin aatone.”

²⁹Jisulang bíkkíng luyilsuna kídíe Jeriko doolungem mepala gídakkuem deddína miti maklínge bíkkíng gímín geto.

³⁰Mingmana ami annyiko bedang tugéplo dungai, bulu Jisu bí gídak emnamem tayyédem, “Ruutume, Dabidke Ue, ngolum yaasamtoika” emla gokto.

³¹Milude bínyim asoope duulangka emla luto, idakkom bulu pakyape, “Ruutume Dabidke Ue, ngolum yaasam toyika” emla gokto

³²Jisu bí dakpodola “Nonyi ngom nolukepe ingkoko imope míídun?” emla bulum tatkíto.

³³“Ruutume” emla bulu poyan sudola “Ngolu amige mikdar lídungku,” emto.

³⁴Jisu bí bulum ayang míípa sukai delokke bínyike amigem ukkíbito. Menang asak bínyi migdar langkula bíkkíng gímín geto.