Read Alladian MATI 23 Bible Online

MATI 23 - Alladian bible

MATI 23

¹Delokrongem Jisu bí milung kídíemlang delokke bíkkíng luyilsuna kídíem poto,

²“Ukil kídíe lang delokke Pharisi kídíe Mosike ayonem pobipene dung.

³Depe ila nolu bulum mínggerupe aido, delokke buluke ponam takamem ibipe aido. Idakkom buluke inam kísape imapeka, kapeila bulu ingkuem pobodudí dem igemang.

⁴Bulu tebegna siirígem éétung delokke dem ami gordulo pyalíkdung, idakkom bulu agísue delokke lakkéng kééyi kokom lengon kítope emla imang.

⁵Buluke inam takamde ami kídíem kaayépe emla inam petome. Depe emnamde bulu agí lakjinem bottepe gela, ege nomém bodope medung;

⁶bulu duusum dakrumlo míngge kosulídung delokke kumkeng ekum kídílo aiyalumna duupekuem matadung,

⁷bulu dukan bojar kídílo yamrík irík kosulídung delokke amikídíem bulu ‘Babue’ emko sulídung.

⁸Idakkom nolum ‘Babue’ empe nammang, kapeila noluke ruutume atelko delokke nolu takame bíro kumsue

⁹delokke tani amoso sékomekom ‘Yayi’, empeko kamang, kapeila noluke Abue atelko, delokke bí teyong telo dung.

¹⁰Nolum ‘Poyilbone’, emlangkom gokpe nammang kapeila noluke poyilne atelko, de Kristo bí.

¹¹Noluke aralo botte yalumnade noluke béérange.

¹²Legade séko agíem bottepe míísududí bím amémoyé, delokke séko amépe míísududí bím bottemoyé.

¹³“Aromana ukil kídía delokke Pharisi kídía, nolu gérmang daklangka! Ami kídíem teyong amongem kaamo mape buluke mingmuem nolu pokomdung. Nolu agísue depe aamang delokke aapena kídíemte nolu aamomape idung. [20]

¹⁵“Aromana ukil kídía delokke Pharisi kídía, nolu gérmang daklangka! Nolu moopílok delokke asilok midum atelem langku penam legape among tabulo gígoodung, delokke edílo nolu akonem laayékudí, dem nolu noluke kísape pakyape doorum líísam oope imodung.

¹⁶“Mingmadola gíbona kídía! Nolu emdung, ‘Séko kumkeng ekum amín lok pésuyédí de atí are kamang; idakkom séko kumkeng ekum lokke uunlok pésuyédí, delomin bíkke pésuname arodune.’

¹⁷Nolu mingmana mide kídía! Ingkue botte yadun; uundía ma, uundem deemamona kumkeng ekum día?

¹⁸Nolu sikepete emdung, ‘Séko kumko baarilok pésuyédí bíkke pésude are kadung.’

¹⁹Nolu mingmana tani kídía! Ingkue botte yadun: amandía ma, amanem deemamona kumko baaridía?

²⁰Delok legape séko kumko baarilok pésuyédí, bí delo duuna amínlok pésudung.

²¹Delok legape séko kumkeng ekumlok pésuyédí de kumkeng ekum deloklang delo duuna amínlok pésudung.

²²Delokke séko teyong amínlok pésuyédí de Shédíke palenglok pésudung delokke delo duuna amínlok pésudung.

²³“Aromana ukil kídía delokke Pharisi kídía, nolu gérmang daklangka! Nolu takéé lokke, murkong lokke, kési képa lokke delokke ampunlokke dohombagem bidung. Depe idakkom nolu ayonlokke gomlong kídí jonnam, yaasam delokke míngke sunamem bomgap mang. Nolu méélamke agom kídar sim kerangke simteng mepakmape ige penamkuai.

²⁴Nolu mingma dola gíbona kídía! Nolu tamidem pibín pala uut simonem méddung!

²⁵“Aromana ukil kídía, delokke Pharisi kídía, nolu gérmang daklangka! Nolu bati luyuem beebíndung idola aradelo kaabo tatbue delokke míímem imeme bíísétdung.

²⁶Mingmana Pharisia! Kerape bati lokke delokke ekunglokke arangem beepotoka demílomin luyu dekom deeyéne.

²⁷“Aromana ukil kídía delokke Pharisi kídía, nolu gérmang daklangka! Nolu sunlok molnam ago kísa, de luyulo kaaname kampue idung idakkom aralo ami simang along mílí idung delokke takamde deemange idung.

²⁸Deke kísape, luyulo nolu yéjinape kaaname idung idakkom noluke arade menam yadname delokke rulnam kééname bííséddung.

²⁹“Aromana ukil kídía delokke Pharisi kídía, nolu gérmang daklangka! Nolu kaaluna mirikídí legape ago mobidung delokke deena kídí simang yupekuem leemo líkdung.

³⁰Delokke nolu sikepe podung, ‘Ngoluke buku neku longedelo ngolu duutuamílo, ngolu bulukíng kaaluna mirikídíem yilí bídkolo yébo sumayai.’

³¹Depe iname nolu kaaluna miri kídíem petna kídílokke adonge emnamem nolu agísue popéé sudung.

³²Demílo noluke bukukídí paab inamem inyok tolangku:

³³Bítpyor kídí nolu! Nolu kape kísa doorum líísamlo ajéng ipe namlokke dugge yékune?

³⁴Delok legape ngo nolum kaaluna miriem delokke kénna ami kídíem delokke poyilbona babu kídíem melíkdung. Bulum ayokonem nolu petyé delokke ayokonem pansaayé; abídem nolu noluke kumkeng ekumlo demngééyé delokke taon konlokke taon konlo monbomyé.

³⁵Delokke irepe ajéng kamape deesuna Abelme petdolokke ilangala kumkeng ekum kelang kumko baari pénsamlo noluke petnam Berakike oo Jekariahke iyyie, ajéng gemanem petnam ajénge nolukelo duuyé.

³⁶Ngo nolum aropakpe pobidung, si takam si so siirum so duuyé!

³⁷“Jirusalem, Jirusalem, no kaaluna miri kídíem petna delokke nokkíng melíknam kídíem elínglok gene, edítko rongne rogo kídarem tomdumsula agíke labbíng rumkílo gubbomnam kísape leko leko noluke ome-oo kídíem goodumsula ngo ankípene.

³⁸Kaasutola, noluke ekumem kumrompe nolukíng melíktung.

³⁹Kapeila ngo nolum podung, nolu lekoda ngom ‘Ruutumke amínlok aanade gérne’ emkuma tetengem ngom kaapang kumayé.”