Read Alladian MATI 24 Bible Online

MATI 24 - Alladian bible

MATI 24

¹Méélamdem Jisu bí kumkeng ekum delok gílen dakkuem, bíkkelo luyilsuna kídíe bím kumkeng delo písut sunam kídarem kaalíkpe emla mongnyolo aato.

²“Nolu sim atí takam sim kaadunía?” emla bí íngkíto. “Nolum ngo arorupe pobidung, elíng akone akon teyolo kumtem kumlem suyimayé; elíng miyode bényéku.”

³Jisu bí Olib dííte teyolo duuduem, luyilsuna kídíe bíkkíng aala pesuppe tatkíto. Bulu pokai, “Edílo de atíde dekepe iyéne delokke nokke angku penam delokke yéyin longe iyodde kapepak iyédí dem ngolum pobika?”

⁴Jisu bí pobito, “Sékote nolum yadmadope ansulangka.

⁵Kapeila deddína amie ngokke amínlok, ‘Ngomin Kristo bí’ emla deddínem yadyé.

⁶Nolu mimagem tatyé, delokke mimak idunaike emnam gomtíngem tatpayé, idakkom nolu kénsulangka nolu pesue emla míípenam kamang. Sikena atíkídí de kaperung aido, idakkom yéyin longe píímangada.

⁷Opín opíne akmín surepyé, delokke doolu doolunge akmín sulenyé. Among regolo díríkeno delokke mooton taron mílí iyé,

⁸Si takam si okii kilene.

⁹“Delokrongem nolum iréé sinyokolo delokke sipe kolo melíkyé, delokke nolum opín takame ngok legalok belumyé.

¹⁰Dekepe iyém bosi amie míngke lokke ngéélat suyéku delokke mirulo yadlíkyé; mipile kangki bosuyé,

¹¹delokke delo mena kotoki kídíe lenyé delokke deddína amiem yadyé.

¹²Rulnam agére bojékolok ayabosuname ansiyéku,

¹³idakkom séko edíípe yéyinlope duuyédí bí turyé.

¹⁴Delokke sim teyong yéta sokke ngiitomem tani among tabuso opín opínlo hakiipe poying gooyé, delokrongem yéyin longe pííyé.”

¹⁵“Delo edílo nolu kaaluna miri Danielke pobinam, belumrunam nyokmona atíem kaayédí sim porine tatkén sulangka.

¹⁶Delo Judialo duuna kídíe dííte kídarlo dugge langka.

¹⁷Séko agí ekum míílolo duududí de oilangkula ekum lokke atíem giilenkupe imapeka.

¹⁸Aríklo yéne enlangkula agíke ege galugem langkupe imapeka.

¹⁹De longe kídíde koogena mime delokke anyun sunna mimekídí kepe edítko peso penampe iyéne!

²⁰Noluke dugge namde Sabbath longelo demangkom dígínlo imadope kumtoka.

²¹Legade delo longedelo adír pename lendak delokke ilangala silo melope ikímanam botteruna pesonam longepe iyé.

²²Idakkom Shédí bí dem longekídí isabem andeng motung, andeng momang amílo takame nyokyinyai. Legade bíkke tonam amikídí kepe depe idokom Shédí bí longe isabbem andeng moyé.

²³“Delo longedelo akone nolum, ‘Kaatola, simin Kristo bí’ demangkom, ‘Kristo bí elo dung!’ emnako paayémílo dem arope míímapeka.

²⁴Kapeila menamlok Kristo emsune delokke mena kotoki kídíe lenyé, delokke bottena iyodem delokke irisinyuem ibola ullennam amiemte paklamílo yadyé.

²⁵Kénsu langka, moodíe píímang adape ngo nolum kerape potosubito.

²⁶“Dekepe iname ami akone nolum ‘Ee mooruk among esi bí dung’, emdakkom gímapeka; demangkom ‘Ruum arasina bí dune’, emyémílokom dem arope míímem mapeka.

²⁷Legade sanggo danlok yaarie latyémílo uadan lokom píídung, deke kísape Tanike Ue aadakkuem iyé.

²⁸Ingkolo simang kadudí delo sogume dumsuyé.”

²⁹“De ebín longe kídarde píírong pagem, doonyie rurukyé, delokke poolue angun biyimayé; takare taleng telok oletyé, delokke taleng telokke atí kídare engenyé.

³⁰Dekepe iduem Tanike Oolokke píídíku iyode taleng telo lenyé, delo tani amosokke ami takame ankí kenue iyé. Tanike Ue taleng doomug telok ralnam kala, botteruna angun ralnam kanarupe aadak kupe bulu kaasuyé.

³¹Delokrongem bí tomdum sunana muudukna bikul tapungem bíkke teyong kotoki kídílo bilíkyé, delo bulu bíkke tonam ami kídíem among kéényung konlokke kéényung konlo goodum suyéku.”

³²“Supak sim agomsim tapang anelok kéntoka; sokke aage yayii lenyékuem sokke annete lendoku, delo díyue anínkai emla kénsudung.

³³Dekepe iyém, nolu sim atí takam sim kaasuyé, yablelo anín dubong emla nolu kénsupe aido.

³⁴Ngo nolum aruem pobidung, si siirumsi, si atí takam si píímangem nyokmayé.

³⁵Among talenge nyokyé, idakkom ngokke agom kídísi nyokyimayé.

³⁶“Sékote aadípakku longem demangkom gontem kénmang, teyong kotoki kídí ekom kénmang, demangkom Uekom kénmang, idakkom Abu petome kénsudung.

³⁷Noahke yédo longe kídídelo, kape ituadí, dekepe Tanike Oolokke aadíku longemte iyé.

³⁸Legade puumu kerang longe kídídelo, ami kídíe dola tííla delokke omum nyameng ibosula delokke nyamran ila, Noahke etkunglo aado longe deloope ito;

³⁹delokke bulum puumue aabomla yuyin bommang adape bulu kape iyédí dem atí kénmangai. Dekepemin Tanike Ue aadokuem iyéne.

⁴⁰Midum annyiko aríklo yébosuyé; akonem laayé delokke akonem meyé.

⁴¹Mime annyiko delot íbosuyé; akonem laayé delokke akonem meyé.

⁴²“Delok legape orol langka, kapeila edílo noluke Ruutum bí aayékudí, dem nolu kénsumang.

⁴³Idakkom sim kéntola; ekum atue edílo yuem doppyone aayédí dem kénsu tuamílo, bí darbomsula delokke bíkke ekumem rulamayai.

⁴⁴Dekepe iname nolu leemosula duuperung aido, kapeila Tanike Ue noluke míínam sudímang moodílo angkupeke.

⁴⁵“Demílo séko ruutumke ekumlo béérang kídíem yébola bulum dodí tíídílo apim bipena míngkesuna delokke kénsuna béérange?

⁴⁶Ruutume bíkke aayékuem dekepe ibomdope paapenam béérade gérne!

⁴⁷Ngo aruem nolum pobodung, bímmin bí sérang takamem kaabom moyéne.

⁴⁸Idakkom béérade atí manako imílo bí agíe sikepe posuyé, ‘Ngokke ruutume oolko duunyokyé’,

⁴⁹emyé delo bí bíkke béérang ajonem demla delokke tíngír doírsula duuyé.

⁵⁰Béérang delokke ruutume longeko bíkke kénsumape yédungem aayéku.

⁵¹Bí bím teksin tekmínla iyéku delokke aromana opéélo bím melíkyé, delo kapnam ríínam delokke iipange koteksuna mílí iyé.”