Read Alladian MATI 27 Bible Online

MATI 27 - Alladian bible

MATI 27

¹Rokomope, rínekídí takame lang ami mirokídíe Jisume petdope luyin bosuto.

²Bulu bím yééla gílenbola gobornor Pilatkíng gílíkto.

³Bím yadna Judas bí Jisume mokadope poyinbosu namem kaayédem, bursurunge ikaane balying angumdem rínekídí lolang miro kídídelo bilattoku.

⁴“Ngo paab ito, kapeila ngo paab kamana taniem simodak” emla bí pokansuto. “De ngolu kepe ingkokone? De nokke agérsuemin” emla bulu poyansuto.

⁵Dekepe iname Judas bí poisar dem kumkeng ekum delo elpak tolangala gíkaku. Delo bí gílangkula agísue paksul sukaku.

⁶Ríne kídíe poisar kídardem tídum sudo langkula pokai, “Ayon lokke agompe sim abal kumsulo mekan kumang, kapeila si iyyi renana murkonge.”

⁷Dekepe iname bulu murkodem angu ami kídíke goluupe peking kédeng amodem rena dope tolík bosuto.

⁸Dekepe ilamin sim supaklope iyyi aríge emdune.

⁹Delokrongem Kaaluna miri Jeremiahke pobinamde apíngkai: “Bulu íying angum abalko laala, Israel amikídie bím relen nadope lubosuto,

¹⁰delokrongem bulu dem, ruutumke ngom pobinampe, kédeng peking aríkdem renato.”

¹¹Depe irongem Jisu bí gobornor, Pilatke keralo dakto, delo Pilat bí bím íngkíto, “No Judai ami kídílokke roja arua?” “E, de nokke ponampakde,” emla Jisu bí poyansuto.

¹²Ríne kídíelang miro kídíe bím ajéng luket yédem bí agom poyansumang.

¹³Delo Pilat bí bím tatkíto, “Bulu deddína atíem nom ajéng luket líkdung dem no tatsu manía?”

¹⁴Jisu bí agom poyan sumang teteng. Gompil koteng poyan sumang iname gobornorde kape ikarunai emla mííto.

¹⁵Depe yédudelo Gíídí doman longelo gobonorde ami kídílokke mííbaanam pateklo duuna akonem melen líkkunam ayon kadungai.

¹⁶Depe idudelo Barabba emnam atírumana amiko patek delo dungai.

¹⁷Mibamde dumsuduem Pilat bí bulum tatkíto, “Sékome nolukíng ngom nolu melen límodokun: Barabba mía, Kristo emnam Jisumía?”

¹⁸Legade, menam kootír lokmin bulu Jisume bíkkíng melíktune emla bí kénsuto.

¹⁹Pilat bí bisarko umkélo duudungem, bíkke méngde sim agom sim melíkto, “Dem ajéng kamana amidem atírung imapeka, kapeila bíkke legalok ngo siyoke immalo maanyingko maato.”

²⁰Idakkom rínekídí delang miro kídíde milungdem Pilat bí Barabbame melendokupe delokke Jisu medan pansaadope kotoka emla porulíkto.

²¹“Sok annyi sokke sékome nolu ngom nolukíng melen dokupe emla míídune?” emla gobornorde tatkíto. “Barabbame” emla bulu poyansuto.

²²“Demílo Kristo emnam Jisume ngo kape iyén?” emla Pilat bí tatkíto. Bulu takame pokai, “Bím pansaatoka.”

²³“Kapeila? Ingkona imemko bí itune?” emla Pilat bí íngkíto. Idakkom bulu botteyape, “Bím pansaatoka” embomkai.

²⁴Delo Pilat bí podan tete tokom loorí yimang, ebín botte nakomin ipaa latyéne emla kaasu yédem, bí asiko bomala milung keradelo laksuk subito. “Sim ami sim ngokke atí ipenam kamang” bí emsuto. “De noluke agérsuyé” embito.

²⁵Ami takamde pokai, “Bíkke maadumem ngolukílang ngoluke ome-oo kídí teyolo duumo langka.”

²⁶Delokrongem bí Barabbame bulukíng melen líktoku. Idakkom Jisu medan bí demngéé mopala pansaadope melíkto.

²⁷Delokrongem gobornor lokke sipayinge Jisume kebang ekumlo bomato delokke delo lamkang kope bím daggong bomto.

²⁸Bulu bíkke ege galugem pítbín geyéla yalína egeko bím píllíkto,

²⁹delokrongem taang dumlupko bíkke dumpolo luplíkto. Bulu bíkke lakbík alaglo banggénko laklíkto delokke bíkke keralo peladola luyéé lulééla luto. “Judai kídíke Roje turyar langka” emla bulu luto.

³⁰Bulu bím takil suklum pala banggénem laala bíkke dumpolok lennyi lengumko demto.

³¹Buluke iyéé siléé rongem, bulu egem pítbín geyé langkula bíkke agí ege galugem bím pítlíktoku. Delokrongem bulu pansaape emla bím gílenboto.

³²Buluke gílen dagem Kureni lokke simon, emnam amiko ríksuto, delo bulu bím kross dem joodorupe lulíkto.

³³Bulu Golgotha emnam amongkolo pííto (depe emnamde tuklong Among).

³⁴Delo bulu kosaana atílok onggur alanglo soyél sugeyéla bím bito; idakkom dem yakkí geyéla, bí dem tíímato.

³⁵Bulu bím pansaarongem, bulu bíkke egem luturi sola orpansuto.

³⁶Delokrongem duudola, bulu bím kanggap bomto.

³⁷Bíkke dumpong teyodelo bulu buluke ajéng luket líknamem sikepe atlíktung, SIMIN JISU, JUDAI KÍDÍ LOKKE ROJE.

³⁸Doppyona annyiko, akonem bíkke lakbík danlo delokke akondem bíkke lakké danlo lekope pansaato.

³⁹Gípatna kídíe bím dumponge mamang kiddola lupu luyééla luto.

⁴⁰Bulu sikepe luto, “No kumkeng ekumem bénpak geyéla delokke longumlok mokupene, no agíe mopít sutolangku! No Shédíke Uemílo kross delokke oitolangku!”

⁴¹Dekepe ríne kídí elang, ukil kídí elang delokke miro kídíe lupu luyééla bím luto.

⁴²Bulu pokai, “Bí abídem mopítdo, idola bí agíe mopít sulamang! Bí Israel lokke roje! Bím supak krosslokke oisumotoku, delo ngolu bím arope mííyé.

⁴³Bí Shédíkíng míídasudo. Supak bí míísa dumílo Shédí bí bím mopít yékupe, kapeila bí ‘Ngomin Shédíke Ue’ emsuto.”

⁴⁴Dekepe pansaanam doppyona annyi deteng bím lupu luyééla luto.

⁴⁵Méélamdem doonyi kaadu sulokke ila yutok raadang lope, among tabude kaamokai.

⁴⁶Yutok raadadelo Jisu bí “Eloi, Eloi, lama Sabaktani” emla ulo gokkai depe emnamde “Ngokke Shédía, ngokke Shédía, no ngom kapeila menyok sukane?” emname.

⁴⁷Delo ayirlo dakna kídíde dem tatgeyéla, bulu poto, “Bí Elijahme tomdung.”

⁴⁸Menang asak akone dukla siipyakko laatoka. Bí dem kuuna onggur alanglo ballík geyéla asékkolo ilíkpala Jisume tííyépe emla bito.

⁴⁹Idakkom abíde poto, “Bím petom melíkto. Elijah bí bím laasing kakupe tokyédí dem kangkílaju.”

⁵⁰Delokrongem Jisu bí lennyinape bottepe ulo gogyédelo, bíkke an-gunge bínkai.

⁵¹Depe idodelo kumkeng ekumlokke eyab donkom nana egede teyong lokke rumkílope sérkékai. Mooton tarone tonto delokke lííbare barto.

⁵²Ago kídare bényakai delo sikabona bosi borang deena ami kídíem turmotoku.

⁵³Bulu ago kídarlokke lenlangkula, Jisuke gerep rongkuem bulu deena taonlo gílangkula deddína ami kídíem lengkan sutoku.

⁵⁴Edílo sipaying ruutum delang bíkkíng yémín gena sipaying Jisume dakbomna kídíde mooton taron emlang atí atí inam kídarem kaasutodí, “Aropakpe bí Shédíke Oo arokuai,” emla mankai.

⁵⁵Donggendola kaana mime mílí delo iduai. Bulu Jisume igulkape emla Galillokke gímín geto.

⁵⁶Buluke aradelok Magdalini Marilang Jebedike méng delokke Joseph kelang Jemske ane Mari bulukom kato.

⁵⁷Adenge iyédem, Arimathialok agíete Jisukelo luyilsuna konpe itona Joseph emnam mirem amiko aato.

⁵⁸Pilatkíng gíla bí Jisuke simadem bidope roguto, delo Pilat bí bím dem bidope hukum bito.

⁵⁹Joseph bí simadem laala deena egekolok yéllumto,

⁶⁰delokrongem bíkke líírelok koolennam bíkke ago goníkolo yuto. Bí lííbyang byadíko ago arung dem longkap tolangala gítoku.

⁶¹Mari Magdalini lang delokke akon Maride ago rotkon delo duuduai.

⁶²Sabbath longekon delo, ríne kídíelang Pharisi kídíe Pilatkíng gíto.

⁶³Bulu pokai, “Migome, ngolu míípang tete sudung, bíkke turdung adape yadnasi ‘Longum méélamlo ngo gerepyéku’ emto.

⁶⁴Depe iname agodem longum píímang adape edíírupe mosiidope hukum bitoka. Demamílo, bíkkíng luyilsuna kídíe aala simadem laanyok geyéla delo amiem bím kiirep tungku emla pogoo bipeke. Méélampe yadpenamsi kerang kempemílo atí mayayé.”

⁶⁵“Nolu dakbom penako tomto langka” emla Pilat bí poto. “Gíkala, nolu edítko paklayédí agodem edíírupe kaabomtoka” emlíkto.

⁶⁶Depe iname bulu gílangkula lííbyadem siil tupket líkla delokke sontoriem melíkla edíípe ila meto.