Read Alladian MATI 28 Bible Online

MATI 28 - Alladian bible

MATI 28

¹Sabbath Gíídí méélampe, hopta kerang yalum longe lokke rokompe Magdalini Marilang akon Mari bulu ago kangkape gíto.

²Depe iduem botteruna taronko tonto, legade teyong telok Ruutumke teyong kotokiko tokla, agodelo gíla, lííbyadem kiiyapala delo duuto.

³Kaaname bí yaari kísa ido, delokke bíkke egede tapam kísa yalune ido.

⁴Sontori kídíde bím pesorunge ikane bulu dan-go sugeyéla sina kísape igeto.

⁵Teyong kotokide mime kídíem poto, “Pesomapeka, kapeila ngo kéndung, nolu pansaatonam Jisu memin matadune.

⁶Bí so duuyimang, bíkke ponam kísa pakpe bí gerep kaku. Aala bím yukuem kaato langka.

⁷Demílo nolu menape gílangkula bíkkelo luyilsuna kídíem sikepe pobi tokuka: ‘Bí sikolokke gerep kaku delokke Galillo noluke kerape gídak. Galillo nolu bím kaayé. supak ngo nolum pobito.’ ”

⁸Dekepe iname mime kídíde ago delokke menape, pesueku ashéngeku ilangala gíkaku delokke bíkkíng luyilsuna kídídelo pobi kakupe emla duktoku.

⁹Menang asak Jisu bí bulum ríksuto. “Salam” emla bí poríksuto. Bulu bíkkíng aala, bíkke alem jumdola bím kumto.

¹⁰Delo Jisu bí bulum poto, “Pesomapeka, gílangkula ngokke bíro kídíem Galillo endope poto langkaku; delo bulu ngom kaapayé.”

¹¹Mime kídíde bedalo endung adape, sontori kídí ayokone taon delo gíla ríne kídíem kape ikadí dem takam dem poyinbito.

¹²Ríne kídíde miro kídídem ríksuyédem bulu budiiko ruubosuto, bulu sipaying kídídem abalem deddínako bidola,

¹³bulu poto, “Nolu sikepe polangka, ‘bíkkelo luyilsuna kídíe yuem aala ngoluke ipnge sudungem bím laanyok bomkaku.’

¹⁴Si agom si gobonorkíng pííyém ngolu bím eetet moyé delokke nolumte duuk bimayé.”

¹⁵Dekepe iname sipaying kídíde murkongem laala buluke ponampe ito. Delokke ila si dooyisi supaklope Judai kídíke gooralo dung.

¹⁶Delokrongem íying kolang atel luyilsunade Galillo Jisuke bulum políkko díítelo gíto.

¹⁷Bulu bím kaayédem, bím kumto; idola ayoko mííne míngoto.

¹⁸Delo Jisu bí bulukíng gíla poto, “Takam teyong among kelang tani amongke ruutum inanem ngom bitung.

¹⁹Delok legape tani takamlo gíla bulum Abu kelang, Ookelang Deena Aidke amínlok baptis bila bulum luyilsuna amipe imotoka,

²⁰delokke bulum ngokke ngiitom tomnam takamem luyilla, ige molangka. Delokke berokrupe ngo nolukíng yéyin longelope duuyar mínyé.”