Read Alladian MATI 4 Bible Online

MATI 4 - Alladian bible

MATI 4

¹Delokrongem Jisume Darkaana Uyue ikaa darkaape emla Aide mooruk amolo gíboto.

²Delo looying appi kolang yooying appiko doma tímape duurongem bí kenue ikai.

³Depe iduem Darkaanade bíkkíng aala, “No Shédíke Uemílo sim elíng kídar sim ettípe imoto” emla poto.

⁴Dem Jisu bí poyansuto, “Tanie ettíng petomlok turgemang, idola ‘Shédíke nappalok lenna agom miyong lokmin turgedune’, emla attung.”

⁵Delokrongem Darkaana Uyude bím deena taonlo gíbopala delo bím Kumkeng Ekum lokke míílong teyong yalumlo dakmodola poto,

⁶“No Shédíke Uemílo no agísue yopyi kítoku. Kapeila sikepe attung: kapeila nok alem elínglo onyam supelo: “ ‘Bí agí kotoki kídíem nokkepe políkyé, delo bulu agí alaglok gakpít bomyé.’ ”

⁷Jisu bí poyansuto, “Dooying kitabe sikepekom attung, ‘Ruutumme, nokke Shédíme no darkang mapeka.’ ”

⁸Lekoda darkaana Uyude bím kedonruna díítelo gíbodola tani amosokke yéta tabungem delokke buluke angunem lengkanto.

⁹Delo bí pokai, “No ngom lebíng koníla kummílo, sim ngo nom biyé.”

¹⁰Jisu bí poyansuto, “No Soitan no, gígéétoku! Kapeila sikepe attung, ‘Ruutumme, nokke Shédí petomme kumlangka delokke bím petom agér ibilangka!’ ”

¹¹Delo Darkaana Uyude bím megeyéla gíkaku, delo teyong kotoki kídíe aala bím igulto.

¹²Edílo Jisu bí Joanme pateklo líkto emnamem tattodí, delo bí Galillo gílat sutoku.

¹³Delo Najareth em enboola, Jebulun kelang Naptali rísulo, sine robelo duuna Kapernaumlo gíla duuto.

¹⁴De Kaaluna miri Isaiahke sikepe ponam agomem aromope emla ito:

¹⁵“Jebulun delokke Naptali among Jordan ayirlok gíla siyénglo píína bedang, Mipak kídíke Galil amolo duuna kídíe Botteruna angunem kaato. Sékobulu siko amolo duutuadí delo píange angkai.”

¹⁷Depe irong delokke ila Jisu bí “Míílat suto langku, kapeila teyong amonge anín kaabong” emla pogooto.

¹⁸Jisu bí Galil siyéng robelo gígoo dungem bíro kumsu annyiko, Simon melang bíkke bíro Andriame kaato. Bínyi siyéng delo esap kuudungai, kapeila bulu esap kuuna amipe ito.

¹⁹Jisu bí bínyim poto, “Aatola ngokkíng gímín getola, ngo nonyim amiem esaplok kuudope iyé.”

²⁰Delo bínyi menang asak esabem metola bíkkíng gímín geto.

²¹Delokke gílangala, bíro kumsu, Jebedike oo Jemslang bíkke bíro Joan bínyim bí kaato. Bínyike abu Jebedikíng bínyi lekope etkung aralo esap pomola dungai. Jisu bí bínyim tomto,

²²delo bínyi etkung demlang bínyike abudem megeyéla bíkkíng gímín geto.

²³Jisu bí Galil among takamlo gígoola, buluke kumkeng ekum kídílo ngiitom sigla, Shédíke amo lokke tatporuna agomem pogoobila, ami kídílokke takam kinam ramnamem delokke angu anguna kinam kanem ipígooto.

²⁴Bíkke pobo ibonam agomem Siria among tabuulo kényinkai; delo bíkkíng ami kídíe angu angu kina ramnem, yagorupe kinam kanem, urompe tumnem, simatnem, amíl amue sanla kinem bomato, delokke takamem bí ipítoku.

²⁵Deddína amie Galil lokke, Dekapoli lokke, Jirusalem lokke[5] Judia lokke, delokke Jordan ayirlokke bíkkíng mamín geto.