Read Alladian MATI 7 Bible Online

MATI 7 - Alladian bible

MATI 7

¹“Amiem bisar mapeka, demamílo nolumkom bisaryé.

²Noluke amiem bisarnam kísape nolumkom bisaryé, delokke noluke lugenam kísapakpe nolumkom lugeyé.

³Nolu agí amig lokke botteyana takodem kaasumape noluk bírolok amig takodem kapeila kaadune.

⁴No agí amiglo botteyana takodem getídula nokke bíruem kape kísa ‘Nok amig takodem ngo ibíntoso’ emlayéne?

⁵Aromana kídí nolu, kerape agíke amig takodem laapak supotoka, delomin nolu noluke bírolok amig takodem laabíndope kaapayéne

⁶“Deena atíem ekii kídílo bimapeka; noluke gumí dogíngem ééklo yobbi mapeka; bulu dekedem alelok tujém tuyémla iyé, delokrongem tuulat sulangkula nolum ammínkope ipelo.

⁷“Kolangka delomoko nolum biyéne; matalangka, delomoko nolu paayéne; pigatoka delomoko nolum eyabem siyya biyéne.

⁸Legade séko bulu kodudí, bulu paadung; séko matadudí bulu paadung; delokke piganem eyabem siyyabiyé.

⁹Nolu séko, ue donam komílo, elíngko binako kayéne?

¹⁰Demangkom bí engoko kodumílo, tabíko binako kayéne?

¹¹Demílo nolu kanínge idolate noluke ome-uem aina amanem binamem kéndumílo, edítko pakyape teyong telo duuna noluke Abue bím kona kídíem aina amanem biyéne!

¹²“Depeila takam legangem amie nolum kape iyém aipe míídudí, nolute bulum dekepe ilangka; de agom demoko Ayon emlang Kaaluna miri kídíke luyilem poyindune.

¹³“Ajokna luyabdelok aatoka. Kapeila luyabde bottedola bepoona bedade nyokpekolo gílíkdung, delokke alume delok gídung.

¹⁴Idakkom luyab tapétnade delokke bedang ajoknade turpekolo gílíkdung, delokke delok boséyange gídung.

¹⁵“Mena kotoki kídíem ansulangka. bulu nolukíng mér sobén egem gela aayé, idakkom aralo bulu pesonam sipyange.

¹⁶Buluke ayélok nolu bulum kangkénsuyé. Tanie taang esiilok onggur ayé kídarem delokke taanyum gooralok tapang ayém píldunía?

¹⁷Deke kísape esing aina miyode aina ayém éédung, delokke aimana esing emin aimana aayém éédune.

¹⁸Aina esiide aimana ayém éémang, delokke aimana esiidete aina ayé éémang.

¹⁹Atímape ayé ééna esing miyodem beeletla emelo romdo.

²⁰Dekepe ila buluke ayélok nolu bulum kangkénsuyé.

²¹“Ngome ‘Ruutume Ruutume’ emla goktína miyode teyong amolo píímayé, idola teyong amolo duuna ngokke Yayike míínamem inademin pííyéne.

²²Delo longedelo bosi amie ngom ‘Ruutume, Ruutume ngo nokke amínlok polupoor agomem pola delokke urom kídíem nokke amínlok monpakla delokke deddína irisinyo agérem imanía?’

²³Delo ngo bulum jonnampe poyé, ‘Edílokom nolum ngo kangkímang, atímape agér inakídí nolu gígéétoku!’

²⁴“Delok legape ngokke sim agom kídar sim tatna mipíde delokke dekedem igenade lííreng teyolo ekum mojina kísadung.

²⁵Pedonge ola, korong asie goola, delokke asare mulla ekumdem muddasuto, idokom de lííreng teyolo mokeenam legape oletmang.

²⁶“Idakkom ngokke sim agom kídar sim tatgeyéla delokke dekedem igemana miyode siiyé teyolo ekum mona mide kísane.

²⁷Pedonge ola, korong asie goola, delokke asare ekumdem munname, delo de ekumde bénletla bénmík sukai!”.

²⁸Edílo Jisu bí sim agom kídar sim poyintodí, bíkke kíbinam dooyidem mití maglínge irisinyope mííto,

²⁹Kapeila bí buluke ukil kísape pomape, ralnam kana ami kísape ngiitomem poto.