Read Alladian MATI 9 Bible Online

MATI 9 - Alladian bible

MATI 9

¹Méélamdem Jisu bí etkungdelok koolangkula agí doolupe entoku.

²Delo amieke ippulo dooyarna amíl olekone sina amiko bíkkíng bomabito. Delo Jisu bí buluke míngke sunamem kaala, kinadem poto, “Ue edíípe míílangka, nokke paab kídíem ayala mepakbito.”

³Sim ukil ayoko kaala buluke aralo agí agísue posuto, “Si ami si Shédíme lukaadung!”

⁴Delo Jisu bí buluke aapíem kénbom dola pokane, “Noluke aange kapeila míínyingkane?

⁵Ingkuem pobayadone, ‘Nokke paab kídíem mesambito,’ emnamdía demangkom ‘Darepla gíto’ emnamdía?

⁶Dekom tani amoso Tanike Ue paab kídíem mesam ladung dem nolu kényépe emla idung.” Delokrongem bí amíl olekone sila kina amidem “Darepla, nokke ippuem bomlangala ekumlo gíto langku” emto.

⁷Amide darepla ekumpe gítoku.

⁸Dem kaala milude pesorunge ito; delo bulu sikena ralnamem tani kídílo binamem kaala Shédíme yidgeto.

⁹Jisu bí delok gídungem, Mati emnam amiko kajanang ulko opislo duudope kaato, “Ngokkíng gímín getola” bí dem amidem emto, delo Mati bí darepla bíkkíng gímín geto.

¹⁰Jisu bí Matike ekumlo yume dobo dongo dungem, kajanang ulna kídíeke delokke “Paabgena” kídíeke aala bíkkíng lang bíkkelo luyilsuna ami kídílo dobosukai.

¹¹Pharisi kídíe dem kaayédelo, bíkkíng luyilsuna kídíem, “Kapeila noluke babude kajanang ulna kídí lolang ‘Paabgena’ ami kídílo dobosukane” emla íngkíto.

¹²Dem tatla Jisu bí poto, “Amíl ekernade daktor kaabomang, idakla kinemin kaabodune.

¹³Nolu gílangkula ‘Ngo ipagem pemílo, ayang emmin míídune’ emnam agomsok leríngem kénto langku. Kapeila yéjipe míísuna kídíem ngo tomkape emla aamang, idakla paabna kídíem tomkape emlamin aadune.”

¹⁴Delokrongem Baptist Joankelo luyilsuna kídíe aala bím sikepe tatkíto, “Ngolulang, Pharisi kídíe nyodíem domape nyodung, idakkom nokkíng luyilsuna kídíe domape nyokímang, si kape inamei?”

¹⁵Jisu bí poyansuto, “Makbode bíkke mibo kídíem duubo sudung adape kape kísa bulu ankípene? Longeko makbodem bulu kelokke laanyok díku moodíe pííyé, delomin bulu domape nyoyéne.

¹⁶“Sékote ege aníem ege akulo omtakna kamang; depe imílo omtakde bétla, de bétmík yayang imodung.

¹⁷Delokke amikídíe onggur alang aníem gíri akulo purlíkna kamang. Bulu depe imílo, gíride bukkéyé, delo onggur alangde toolenyé delokke gíride benmíkyé. Idakkom onggur alang aníem gíri anílomin medune, delomin annyide edííyéne.”

¹⁸Bí sim agom sim bulum pobidungem, ruutumkone aala, bíkke keralo peladola “Ngokke ome supak pak sikai. Idakkom aala, nokke alage ukkí bimílo, bí turyéku,” emla pokai.

¹⁹Jisu bí darepla bíkkíng luyilsuna kídíem gíbola bíkkelo gímín geto.

²⁰Dekepe idopakdem dítak íying kolang annyi kokai iyyi bíttína mimekone bíkke méélamlo aala bíkke galugem ukkíto.

²¹Bí agísue, “Ngo bíkke galugem ukkí petom dokom, ngom ipíyé,” emla posuto.

²²Jisu bí ngéngkut sudo langkula mimedem kaato. Delo “Ome, aange edíí langka, nokke míngkenge nom ipítoku” emla poto. Delok rongem mimede delokke ila kiname aikaku.

²³Jisu bí ruutum delokke ekumdelo aala, tapung mulla inakídí demlang kapla rííla inakídí dem,

²⁴bí poto, “Nolu gígéétoku. Mimeko si simang, ipdu namino” emto. Delo bulu bím ngilkaato.

²⁵Méélamdem ami kídíem gígéé morodem, bí aala mime koodem alaglo boto, delo koode gerepkaku.

²⁶De koborde delo amo delo byargongkai.

²⁷Jisu bí delokke gílen dakkuem, mingmana ami annyiko bíkkíng mamín gedola, “Dabidke Ua, ngolum ayang toyika” emla gokto. “E, Ruutum” emla bulu pokai.

²⁸Méélam dem bí ekum aradelo aatoname, migmana ami annyide bíkke ayirlo aato. Delo Jisu bí bulum, “Ngo sim ilayé emla nolu arope míídunía” emla ingkíto. “E, Ruutum” emla bínyi pokai.

²⁹Delo bínyike amigem bí ukkí bidola poto, “Noluke míngkesunam kísape de idaklangka,”

³⁰delo buluke amige migdar kaku. Jisu bí bulum “Sim séko meteng kénmo mapeka” emla pogapto.

³¹Idakkom bulu gíkakune de koborde delo amodelo gígongkai.

³²Buluke gídakkuem, urompe tumna agom polang yimanako Jisukíng bomalíkto.

³³Uromdem monpak rongkuem agom pokén yimanade polenkaku. Delo milung ami kídíe sai emla kaadola, “Israel ami aralo edílokom sikena ami kerape kangkí rumangai” emla pobosuto.

³⁴Idakkom Pharisi kídíde emkai “Urom ruutum lokmin bí urom monpak nana ralnamem paatune”

³⁵Jisu bí taon takam lola doolung-doolulo gígoola, yétalokke ngiitom tatporuna agomem pogoola delokke kina ramna mipíem ipíbito.

³⁶Mibamdem bí kaasukane, bí bulum ayang kaapasuto, depe emnamde bulu yébona kamape ina, ankí kenona mér sobén kísa ito.

³⁷Delo bíkkelo luyilsuna ami kídíem poto, “Alie alummang idola isiine anyoodung,

³⁸delok legape ali Ruutumem bíkke aam aríklo nyiipena amiem melík dope kotoka.”