Read Alladian MARK 11 Bible Online

MARK 11 - Alladian bible

MARK 11

¹Bulu Jirusalem anínlo pííyédem Bethpage delokke Bethanilo Olib Díítelo aato, delo Jisu bí bíkkelo luyilsuna annyiko melíkdola,

²bulum poto, “Doolung delo gíkaala noluke kerapaklo, noluke aapeko delo tani rengkí saamanam gado ooko, ríntupe kaayé. Dem taala so buang tokuka.

³Akone nolum ‘nolu kapeila depe idune’ emyémílo ‘Ruutum bí sim míídung delokke menape sim so bomang biyéku,’ emla bím polangka.”

⁴Bulu gíla bedang luyulo gado oodem ríntupe kaato. Bulu dem laadungem,

⁵delo dakna ami ayokone, “Gado oodem taala nolu kape iyén?” emla íngkíto.

⁶Bulu Jisuke polígem pobito, delo ami kídíe bulum bomotoku.

⁷Bulu gado oodem Jisukíng bomang yékudem buluke egem teyong delo pubila delo duumoto.

⁸Deddína amie agí agí egem bedalo tambito, ayokone esing nemíng kídarem aríklok pala pubito.

⁹Méélam kerape gímín gena kídíe írgarupe gogyiito, “Ríak daklangka!” “Ngoluke abu Dabidke among amínlok aana si gérne!”

¹⁰“Ngoluke abu Dabidke yépeko amolok aana bí gérne!” “Teyong Shédíme koyit langka!”

¹¹Jisu bí Jirusalemlo aala kumkeng ekumlo gíto. Bí atí takamem kanggosuto, idola delo bí adol dubong iname, bí Bethanilo Midum íying kolang annyidem gíbosula gíto.

¹²Longe kondem bulu Bethani dem megeyéla gídakdem, Jisu bí kenue ito.

¹³Mooteng lokke tapang ane konem kaala, bí ayé kaatape aanín bomto. Bí kaaname anne petome atíyang kamang, kapeila delo tapang lokke moodí mange.

¹⁴Delo bí esiidem poto, “Sékote nokke ayém lekokom doyimayé.” Delo bíkkelo luyilsuna kídíde depe bíkke ludungem tatto.

¹⁵Jirusalemlo gíla Jisu bí kumkeng ekumlo aala delo pesikoret inakídíem monpan monran sula ito. Bí murkong poisar meko tébul demlang pekí parong kopenam meko bénsidem kuppak kupyak bila ito,

¹⁶delokke sékomete kumkeng ekum goora delok koret mopenam atí bomang momang.

¹⁷Delo bulum bí luyildola poto, “Sim sikepe atbimanía: ‘Ngokke ekumdem ami takamke kumkeng ekume emyé.’ Idola noludan sim doppyo tíísina dungkepe ibomdung.”

¹⁸Ríne kídí elang delokke ukil kídíe dem tatto delokke bím petpeko bedang mata lento, legade bulu bím pesokai, kapeila mibam tabude bíkke luyilem tatla sai emla mííto.

¹⁹Edílo yume píítodí, bulu taon delok gílenkai.

²⁰Rokompe, bulu gílenname, tapang aneko lerí lokkai sinako bulu kaato.

²¹Pitor bí míípasula Jisume poto, “Saare, kaasutola! Nokke béélíknam tapang anesi sikane!”

²²“Shédíkíng míngkesutoka” [19] Jisu bí emto.

²³“Ngo nolum aruem podung, akone sim dííte sim ‘No gíla agíe siyénglo yoplík sutola’ delokke bíkke aanglo mííne míngo kamape idakla bí ingkuem potodí depe iyérung emla arope míímílo, dem depe ibiyé.

²⁴Delok legape ngo nolum podung, nolu kumnamlok ingkuem kodudí de nolukepe iyé.

²⁵Delokke kumla dakyém, akonem nolu aklíng namko kadumílo, bím maab langka, demílomin noluke teyolo duuna Abue noluke paab kídíem maab biyéne.”[20]

²⁷Bulu Jirusalemlo aato kukéng delo Jisu bí kumkeng ekum delo gíduem, ríne kídíe, ukil kídíe delokke mirokídíe bíkkíng aato.

²⁸“Ingkona ralnamlok no sim atí kídar sim idune?” emla bulu íngkíto. “Delokke séko nom sim idope ralnam bitune?” emto.

²⁹Jisu bí poyansukai, “Ngo nolum agomko íngkídung. Ngom pobitoka delo ngo ingkona ralnamlok sim atí kídar sim idudí dem nolum pobiyé.

³⁰Joanke baptis inamde teyong telokkía ma, tani lokkía? Ngom pobika” emto.

³¹Bulu buluke aralo pokíbosudola poto, “Ngolu ‘teyong telokke’ emmílo bí ‘demílo kapeila nolu bím aro míímane’ emla íílatyéku.

³²Idola ngolu ‘tanilokke’ emmílote bulu amikídíem pesogeto, kapeila mipil miyonge Joan bí aropakpe Kaaluna miriko emla mííto.”

³³Depe iname bulu Jisume, “Ngolu kénmang” emla poyansuto. Jisu bí pokai, “Ngokom ingkona ralnamlok ngo sikesim idudí dem pobimayé.”