Read Alladian MARK 15 Bible Online

MARK 15 - Alladian bible

MARK 15

¹Rokomope, ríne kídíe, miri kídíem dumsula, ukil kídí elang Sanhedrin Baane tabude luyin bosuto. Bulu Jisume yééla, gílenbola Pilatkíng melíkto.

²“Nua Judai kídíke rojade?” emla Pilat bí íngkíto. “ ‘E, de nokke ponamde’ ” Jisu bí emyansuto.

³Ríne kídíe bím bojéko ajéng luket líkto.

⁴Dekepe iname Pilat bí bím tatkí tokukéng, “No poyan subimayénía? Kaasutola deddíko nom bulu ajéngem tuulík dung.”

⁵Depe ilate Jisu bí atí poyan subimang, delo Pilat bí kaperui ikane emla mííto.

⁶Aran longelo amikídíe rogu bomnam pateklo duuna akonem melen dungkuai.

⁷Barabba emnam amiko ebín longelo ami petnako pateklo dungai.

⁸Ami alude aala Pilatme iyang iyangpe buluke rogunamem ibidope roguto.

⁹“Nolu Judai kídíke rojem ngom nolukíng melen límo dokunía?” emla Pilat bí tatkíto.

¹⁰Buluke nenam kootír lokmin ríne kídíe Jisume ngokkíng melíktune emla bí gakto.

¹¹Idola ríne kídíe ami mibamdem Pilat bí Barabba me meyan lendokupe luguk pogukto.

¹²“Demílo, noluke Judai kídíke roja emnam ami sim ngo kape iyékun?” emla Pilat bí bulum íngkíto.

¹³“Bím pansaatoka!” emla bulu ebínpe mankai.

¹⁴“Kapeila? Ingkona imemko bí itune?” emla Pilat bí íngkíto. Idakkom bulu “Bím pansaatoka” emla manduk yayang ibomkai.

¹⁵Miludem inyii nape, Pilat bí bulukíng Barabbame melen bitoku. Bí Jisume demngéé mopala, bím pansaadope melíkto.

¹⁶Sipaying kídíe Jisume roja dungko kebang kumyarlo gíboto, delokke sipaying alungem gokdum suto.

¹⁷Bulu líímukna egeko bíkkíng píllíkto.

¹⁸Delo bulu bím lupu luyééla “Judai kídíke roje duuyar langka!” emla luto.

¹⁹Lennyi lengumko bíkke dumpolok banggénlok itto delokke takil suklumto. Lebíng konídola bulu bím kumsuto.

²⁰Delo bulu lungil lusola bím lupala líímukna egedem laabíntoku delokke bíkke agí egem bíkkíng píllíktoku. Delokrongem bulu bím pansang kape emla gílenboto.

²¹Kureni lokke Alekjendar kelang Rupke abu, Simon emnam amiko doolung lokke en gosupe enpekolo endagai, delo bulu bím kross em joobomdope luké luyéé líkto.

²²Bulu Jisume Golgotha (depe emnamde tuklong dongko among) emnam amongkolo gíboto.

²³Delokrongem bulu kosaana alangem onggur alanglo soyél supala bím bito, idola bí dem tíímang.

²⁴Delokrongem bulu bím pansaato. Bíkke egem bulu orpan sunape, bulu mipile ingkuem paayédí dem kaape emla luturi soto.

²⁵Buluke bím pansaado de konang bajie.

²⁶Kakotlo atketnam bím aknana agomem sikepe JUDAI KÍDÍKE ROJE emla attung.

²⁷Bulu doppyona annyiko, akonem bíkke lakbík danlo akonem bíkke lakké danlo lekope pansaatung.[29]

²⁸

²⁹Bedalok gípatna kídíete bím buluke dumponge mamang kiddola sikepe lupu luyééto, “Sah! No kumkeng ekumem bénpak geyéla dem longumlok modakku,

³⁰Kross delok oilangkula agíem mopít sukítoku!”

³¹Dekepe ríne kídíete delokke ukil kídíe buluke aralo lungil lusola lukai. “Bí amiem mopít doku, idola agíe mopít sulang kumang!” emla bulu poto.

³²“Sim Messiah emnam Kristoke, Israel lokke Rojem, kross delokke oisumotoku, delomin ngolu kaala arope mííyéne” emto. Bíkkíng pansang itaksunam amikídí dete bím lupu luyééla luto.

³³Longe raadang delo gonta angumkope among tabude kaamue ito.

³⁴Angum bajidelo Jisu bí sikepe botterupe ulogokto, “Eloi, Eloi, lama Sabaktani?” depe emnamde “Ngokke Shédí, ngokke Shédí no kapeila ngom mepak sudune?”

³⁵Edílo aníndelo dakna kídí ayokone dem tattodí, bulu poto, “Tattola, bí Elijahme tomdung.”

³⁶Ami akone dugaala, onggur alanglo siipyaklok sangnyom geyéla aséklo tuulík geyéla Jisume tííyépe emla bito. “Bím petom melíkto. Kaalaju Elijah bím langkakupe oiyédí” emla akonde poto.

³⁷Agíípe ulo goggeyéla Jisu bí bínkai.

³⁸Kumkeng Ekum lokke lamgé ege donkom name teyolokke ila rumkílope bétpan sukai.

³⁹Delo sipaying ruutum, Jisuke keralo daknade bíkke ulo goknamem talla kapekísha bí sikadí dem kaala bí poto, “Berokrupe si amisi Shédíke Ookuai!”

⁴⁰Mime aneke mooteng lokke kanggap dungai. Buluke aradelok Mari Magdalini lang, aníyana Jemske delokke Josephke ane Marilang Salami.

⁴¹Galillo si mime ane kídí si bíkkíng gímín getuai delokke bíkke míínamem iguldungai. Jirusalem lope bíkkíng píímín gena mime ane kídí ekekom delo kato.

⁴²De iruu saarudí longe kuai (depe emnamde Sabbath Gíídí ayire). Yume pííyédem,

⁴³Arimathia lokke Joseph, kebang lokke amín kana memborko, agísue Shédíke yétem toyanako, miramrupe Pilatkíng gíla Jisuke simadem bidope roguto.

⁴⁴Pilat bí sikabong emnamdem talla kape remei emla mííto. Sipaying ruutumdem bí gokla Jisu bí arope sikabodí dem kobordem tatkíto.

⁴⁵Bí sipaying ruutum delok arope sikabong emnamem kénla, Josephme simadem bito.

⁴⁶Dekepe iname Joseph bí egeke rela, simadem laayipala, dem egelok yétkomto, delokrongem lííne lííreng ago kolo yuto. Delokrongem bí ago eyabem lííbyangko longkapto.

⁴⁷Mari Magdalini lang delokke Josephke ane Mari bínyi bím yukuem kaato.