Read Alladian MARK 2 Bible Online

MARK 2 - Alladian bible

MARK 2

¹Longko loonyi méélamlo, Jisuke Kapernaumlo lekoda aadokuem ami kídíe ekumlo bíkke enkunamem tatto.

²Dekepe iname deddína amie gídum sukane, ekumdelo eyab luyu delote dakbo supeko kaimang idope bí delo bulum dooying poboto.

³Amieke ayoko, amíl olekone sina kina amikonem midum appikone joobomla bíkkíng aato.

⁴Deddína milunge ikolok bulu Jisukíng píínín lamape iname, bulu Jisuke duutakdan teyong ekap delok arungko ruula kina amidem ketpu pakpe letyilíkto.

⁵Jisu bí buluke míngkengem kaayédelo, bí kina amidem “Ue, nokke paab kídíem mepakbito” emla poto.

⁶Depe iduem ukil kídíeke agí agíe,

⁷“Kapeilai si amisi dekepe pokane?” emla mííla delo dungai. “Bí lukaa luyéé dunamino! Shédíke kékondelo séko paab kídarem maab bilanako kadune?” emla bulu mííto.

⁸Menang asak Jisu bí bíkke aidlok dekepe buluke ainalo míínamdem kénla, bulum poto, “Nolu kapeila dekepe míídune?

⁹Ingkuemda pobaa yadone, ‘Nokke paabem mepakbito’ emnamdía ma, ‘Darepla nokke ippuem bomlangala gítolangku’ emnamdía?

¹⁰Idakkom Tanike Ue tani amoso paab kídarem maab bilanana ralnam kado emnamem nolu kéndope emla inamko.” Bí amíl olekone sina amidem poto,

¹¹“Ngo nom ludung, gerepla nokke ketpuem bomlangala ekumlo gíkaa langku.”

¹²Bí darepla, bíkke ketpuem bomlangala delokke buluke takam kangkolo ekerpe gíkaku. Si mipil miyongem sai emla míímoto delo bulu Shédíme yidgedola poto, “Ngolu sikena atíem kangkí rumangada!”

¹³Lekoteng Jisu bí sine siyéng robelo gítoku. Deddína ríkramko bíkkíng yonmín gedo, delo bí bulum dooyingem polenboto.

¹⁴Bí gímanla gídungem, Alphaike oo Lebime kajanang ulna opislo duudope kaato. “Ngokkíng gímín getola,” emla Jisu bí bím poto, delo Lebi darepla bíkkíng gímín geto.

¹⁵Jisu bí Lebike ekumlo apim doduem deddína kajanang ulna kídíe delokke “paab inakídíe” delokke bíkkíng luyilsuna kídíde bím dobo sudungai, kapeila bíkkíng gímín gena kídíe bojéko ito.

¹⁶Pharisi kídí elang ukil kídíe bím paabna kídí emlang kajanang ulna kídíem dobo sunamem kaapala, bulu bíkkíng luyilsuna kídíem íngkíto, “Kapeilai bí kajanang ulna kídí emlang paabna kídíem dobosukane?”

¹⁷Dem tayyédem, Jisu bí bulum poto, “Amíl ekernade daktor matamang, idola kina demin dem matadune. Ngo deesuna kídíem tomkape emla aamang, idola paabna kídí emmin tomkape aadune.”

¹⁸Depe iduem Joankelo luyilsuna kídí elang delokke Pharisi kídíe domape nyodungai. Ami ayoko Jisukíng aala íngkíto, “Joankelo luyilsuna kídíelang Pharisi kídíke luyilsuna kídíe domape nyodung, depe idola noluke kídísi domape nyomang, kapeila depe idun?”

¹⁹Jisu bí pobito, “Makbode bulukíng duusu dungadape bím makbo lokke mibo kídíe kapeila domape nyoyéne? Bulu bím yébosudung tetedem bulu depe ilamang.

²⁰Idakkom makbuem bulu kelokke laabín díku moodíko pííyé, delokke delo longedelo bulu domape nyoyé.

²¹“Aku egelo sékote gayin aníem omtakna kamang. Bí depe imílo, aní omtak namde akuem pubomla mangkam yape bétyé.

²²Delokke sékote aku gíri delo onggur alang aníem pílíkna kamang. Depe imílo onggur alang aníde gíridem bukkéyé, delo alangelang gíride atíyimayé. Dempenem onggur alang anídem gíri anílo pílíktoka.”

²³Sabbath nyodo longelo Jisu bí aam arík yiiralok gíto, delo bíkkelo luyilsuna kídíete gímín gekane, bulu ambengeke pílbomto.

²⁴Pharisi kídíde bím luto, “Kaasutola, Sabbath nyodo longelo ayonlokke kaaba manam atíeke bulu idune?”

²⁵Bí poyansuto, “Dabidlang bíkke angong kídíe buluke kenoduem kape ituadí dem nolu lekokom porikímanía?

²⁶Ríne ruutum Abiatharke yédudelo, bí Shédíke ekumlo aala kumlík joolík nam ettíngem doto, de ayonlokke miri kídí petomke dope namíai. Delokke bí angong kídíemte ayokonem bisuto.”

²⁷Delokrongem bí Pharisi kídíem luto, “Sabbath longede tanikepe iname idola tanide nyonam longekepe imang.

²⁸Depe iname tanike Uemin Sabbath lokke Ruutume.”