Read Alladian MARK 6 Bible Online

MARK 6 - Alladian bible

MARK 6

¹Jisu bí dem megeyéla bíkkelo luyilsuna kídíem gíbosula, bíkke agí dungko taonlo gítoku.

²Sabbathde pííyédem, bí kumkeng ekumdelo ngiitom luyil bolento. Delokke agomem tatne deddína amie bím sai emla míngkai. Bulu tatkíto, “Si ami si ingkolokyi sim atí kídí sim paatone? Ingkona kénnamkoi bím bitune, bí irí sinyuemte idung!

³Si soki tébul inamangía? Bí Simon, Juda, Joseph delokke Jemske bíro Marike oomangía? Bíkke bírmede so ngolukíng yémanía?” Delo Jisume bulu lupakto.

⁴Jisu bí bulum poto, “Agí dungkolo, agíke erang aralo delokke agíke ekum erang petomlo kaaluna miriem mínggemape idung.”

⁵Bíkke alage kina ayokonlo leetanla bulum ipínam kékondelo bí irisinyo ila bitomang.

⁶Delokrongem bí buluke míngkeng pííramem kaala adí-amope mííto. Delokrongem Jisu bí luyil poyilla doolung doolunglo gígooto.

⁷Midum íying kolang annyiem bí tomdum supala, midum annyi annyipe bulum megoo líkto delokke atímana aid kídíem ikum nana ralnamem buluke teyolo bilíkto.

⁸Sikesi bíkke pogaplíkname: “Mibo engoonam legape atíyang bom mape banggén petomko bomlangka. Noluke lamkulo roti, nyogon, murkong atí bommapeka.

⁹Leyugem gedokom galuk apek gemapeka.

¹⁰Ekumkolo nolu aayém, delok taon delok gílen kumang tetengem delo duupong langka.

¹¹Among konlo nolum torík sumayémílo, noluke gídakkuem noluke ale pemugem, bulum ikarnape, pibín sulangala gílangkuka.”

¹²Bulu gígoola tani kídíe míílat sukupe aido emla pogooto.

¹³Bulu urom kídíem monpakto, deddína kina ramna amiem tél nyoola bulum ipítoku.

¹⁴Jisuke amíne gooyang goyang inamdem Herod Roja bí tatto. Ayokone sikepe podungai,[6] “Baptist Joanme sikolokke gakrep tungku, delokke dekepe ilamin bíkkíng irisinyo ralname agér gérdune.”

¹⁵Abíde pokai, “bí Elijahmin.” Ayokone pokane “Bí kerangoke kaaluna miri kísana, kaaluna miri komino.”

¹⁶Idakkom edílo Herod bí sim tattodí, bí poto, “Ngokke patunam ami Joanme sikolokke gakrep tungkunía!”

¹⁷Kapeila Herod bí agíe Joanme umdope hukum bito delokke bí bím yééla pateklo meto. Bí depe itungkom, bíkke bíro Philipke méng, bíkke méépe ikunam Herodiake legalok ito.

¹⁸Legade Joan bí sikepe ludungai, “No nokke bíro méngem laanamde ayonlokke ibaamaname!”

¹⁹Dekepe iname Herodia bí Joanme ramkikai delokke bím petpe míngkai. Idola bí depe ilamato,

²⁰kapeila Herod bí Joanme pesoto, delokke bím deena delokke yéjiina amiko emla kénla mosiituai. Herod bí Joanme tayyédem kaperui imílo aiyén emla míngasuto;[7] depe idokom bí bíkke agomem tallí dungai.

²¹Méélam yalumdem moodíe píngkai. Herod bí bíkke odí longelo aran ila yébonam migom kídí, sipaying ruutum kídí delokke Galillokke miro kídíem tomto.

²²Herodiake omede aala paksong soobiname, de Herod melang mibo kídíem ashémoto. Rojade mime koodem, “No ingkuem mííyédí, ngo nom bipe” emto.

²³Delo bí pébisudola poto, “No ingkuem koyédí ngokke among attungkon ayarem nom bipe.”

²⁴Mime koode gílangkula bíkke anedem “Ngo ingkuem komílo aiyén?” emla íngkíto. “Baptist Joanke dumpongem kotoka” bí emto.

²⁵Menape mime koode rojadelo aalangkula roguto, “Supakpak Baptist Joanke dumpongem ekungkolo ngom bika.”

²⁶Rojade airupe buulínge ituai, idokom bíkke dobo tomnam kídí keralo pébisunam legalok bí bím luyasumape ito.

²⁷Dekepe iname menape pansaa bopena amidem Joanke dumpongem teela boma dokupe bí hukum bito. Amide gíla, Joanme patek aralo patung geyéla

²⁸delokrongem bíkke dumpodem ekungkolo boma bitoku. Bí dem mime koodem bito, delokrongem mimekoode dem agí anedelo bitoku.

²⁹Dem tatla, Joankelo luyilsuna kídíde aala, bíkke simangem laala agolo yusiito.

³⁰Tomlíknam kídíde Jisume duubo sudola buluke itonam takamem delokke luyil poyil namem, Jisume pokan subitoku.

³¹Delokrongem deddína amie gídung gítokla ikolok bulu dodí tíídí koteng kamato iname bí bulum pokai, “Nolu agíe rongngamko amongkolo ngokkíng aatola delo ngolu anyongko duunosudope.”

³²Depe iname bulu agíe etkung kolok rongngamko amongkolo gílento.

³³Idakkom bulum gílendakpe kangkénna kídí takame taon mipílokke ale kootírlok dukla, delo buluke kerape pínggeto.

³⁴Jisu bí oila deddína ami kídíem kaayédem, bulum ayang míípasukai, kapeila bulu yébona kamape yételpe yésuna mér sobén kísa. Depe ila bí bulum atí takam legangem luyil poyilto.

³⁵Depe idudelo adeng kabong, delo bíkkíng luyilsuna kídíde bíkkíng aala poto, “Si mootengko amonge, delok teyolote supak yume kabong.

³⁶Ami kídí sim melíktoku bulu ayir agongke doolung kídíso gílangkula agí agí dopenamem resu dokupe.”

³⁷Idola bí poto, “Nolu bulum dopenamko bitoka.” Bulu bím poto, “De midum atel lokke poolo píínyi Hajirangem donggeyé![8] Deddípakpe rotiem ngolu ipak siakla bulum biyénía?”

³⁸“Edítko nolukelo lube kadun? Kangkítola” bí emto. Bulu kaala, “Lub pilngo kolang engo annyiko kadung” emto.

³⁹Delokrongem Jisu bí amikídí takamdem miijéb teyolo opéé opéépe duumodope bulum políkto.

⁴⁰Delo bulu íying pilngo opéé opéépe duumoto.

⁴¹Lub pilngo demlang engo annyidem laala, teyodanpe kaadu sudola, bí yidgeto delokke lub kídarem pento. Delokrongem bí dekedem amikídí keralo joobidope bíkkelo luyilsuna kídíem bito. Bí engo annyi demteng bulum takam orto.

⁴²Bulu takam dola dodarto,

⁴³delokrongem luyilsuna kídíde aapé íying kolang annyikope roti demlang enguem dongongem laadum sutoku.

⁴⁴Ami dona kídí isabe éjar pilngoko ito.

⁴⁵Jisu bí menape bíkkíng luyilsuna kídíem etkudelo renga motoku, delokke bíkke mibamdem mepan sudung kuem Bethsaidalo gígedope poto.

⁴⁶Bulum megeyéla bí dííte etpangkolo kumsukape gíto.

⁴⁷Adenge iyédem, etkude sine paatang raadalo kongkai, delo moopí delo bí petom ito.

⁴⁸Bí kaatoname luyilsuna kídíde rebadem kingéé sudung, kape ila asarde bulum mutkaasuto. Kaamo tomti romri iyédem bí bulukíng asi teyolok gímín gekai. Bí bulum gíbong pakpe iduem,

⁴⁹bulu bím uromko emla mííto. Bulu ulo gokto,

⁵⁰kapeila bulu takame bím kaala pesue ito. Depe idopagem bí bulum poto, “Miram langka! Si ngomoko. Pesomapeka.”

⁵¹Delo bí etkudelo bulukíng rengaato, delo asarde remakkaku. Bulu irisinyorupe mííto,

⁵²legade bulu lubem inamem kénsumato, buluke ainade míípatmato.

⁵³Bulu koorongem Gennesaret delo etkungem rínla meto.

⁵⁴Bulu etkudelok lenrong pakdem amikídíe Jisume kangkénto.

⁵⁵Delok ayir agong delokke ami tabunge dukkala ingkolo bím duudope tattodídelo kila ketna kídíem jongalíkto.

⁵⁶Delokrongem ingkolo bí gítodí, doolulo, taonlo demangkom doolung ayir agolo bulu dukan bojar takamlo kina kídíem joolíkto. Bulu bíkke ege galuk pagemkom bulum ukkí motoka emla roguto, delokke bím ukkína takame ekertoku.