Read Alladian MARK 7 Bible Online

MARK 7 - Alladian bible

MARK 7

¹Pharisi kídí elang Jirusalemlo aana ukil kídí eke dumsula Jisume dunggola delokke

²bíkkelo luyilsuna amieke “deemana” depe emnamde laksuk sumape dotké dodope kaato.

³(Pharisi kídí elang ami takam mirokídíe yébom dakbom sunam niyomlok bulu alagem laksuk sumape domangai.

⁴Bulu dukan bojarlok aayékuem laksuk sumape domangai. Delokrongem bulu deddína yébom dakbom sunam niyomem, peki bati delokke deksing[9] kídarem arbín namem igedungai.)

⁵Dekepe ila Pharisi kídí elang ukil kídíe Jisume tatkíto, “Kapeila nokkelo luyilsuna kídíe abu abíng kídíke yélot daklot niyomem megeyéla ‘deemana’ alaglok buluke dotkéyem donakane?”

⁶Bí poto, “Aromana kídí noluke legangem Isaiahke polu poor binamde pojing namkuai, kapeila sim sikepe attung, ‘Si amikídísi ngom buluke nabbél petomlok mínggedung, idokom buluke ainade ngokke lokke mootedung.

⁷Bulu ngom emmum pemin kumdune; buluke luyilde tani kídíke pobinam ayon petome.’

⁸“Nolu Shédíke ngiitom kídarem mepakla tanike yébom dakbom sunam niyomem bomgapdung.”

⁹Delo bí bulum poto, “Noluke agí yéruk dakruk niyomem igepe emla nolu Shédíke ngiitomem petpípe lenggé sunana bedang matadung;

¹⁰kapeila Mosi bí potuai, ‘Nokke ane abuem míngge langka,’ delokke séko agí abuem demangkom anem gééyédí dem petpakpe aido:

¹¹Idakkom nolu emdung tanie agí ane abuem igul lanana atíem Shédíme bimílo dem nolu Korban emdung, (depe emnamde, Shédíkíng kumlíknam amane),

¹²demílomin nolu agí ane abu legape atí ipenam kaimayéne.

¹³Dekepe iname nolu Shédíke agomem noluke yéyon dakyon niyomlok mepakdung. Delokke dekepe nolu bojéko dekena atíem idung.”

¹⁴Lekoda Jisu bí mibamdem tomnín supala poto, “Mipile ngom tatgaptola, delokke sim tatkén sutola.

¹⁵Luyulokke tani aralo aanade ingkuete bím deema momang. Dem penem tani aapí aralokke, luyulo lenna demin taniem deema modune.”[10]

¹⁷Milung dem megeyéla, ekumkolo bí aarongem, bíkkelo luyilsuna kídíe sim luyilsunam legasim íngkíto.

¹⁸“Nolu mide runge kemai” bí emto. “Tani aralo luyulok aana takamde bím ‘deemang’ molamang emnamdem nolu kénmanía?

¹⁹Kapeila de bíkke ainalo píímang idokom bíkke akii lomin píídune delokrongem de amíl sokke gídungku.” (Jisuke dekepe emnamde, donam tíínam takamde “deene.”)

²⁰Bí pongunsula pokane, “Ingkuedí tanilokke luyulo lendune demin bím ‘deemang’ modune.

²¹Kapeila tanike ainang arabelok atímana aapí mííyi míísange, mime milo belum bekam agére, pyoonam doname, níkka moka aapíe, abír ajone,

²²kaabo tatbue, míngki ramkie, menam yadname, míípe mííle, nesu posue, lukang luyééname, lukar luyare delokke mide somo aapíe lendune.

²³Si atí atímana takam si arabelok lenla taniem deemang modung.”

²⁴Jisu bí dem amodem mepala delokke Tur [11] among ayirlo gíto. Bí ekumkolo aato delokke dem séko meteng kénko sulímato, depe idokom bí dung emnamdem bí mesup sulamato.

²⁵Aropakpe bím tatpa yédem, ome urompe tumnalokke mime anekone aala bíkke alelo olíkto.

²⁶De mime anede Sirialokke Phonekialo olíknam Grik mimekuai. Bí Jisume bíkke ome delokke uromem monpak bikuika emla roguto.

²⁷“Kerape ome-oo kídíem buluke míísape domo potoka” emla bí bím poto, “Kapeila ome-oo kídílokke dotkéyem laabínla buluke ekii kídarlo binamde aimaname.”

²⁸“Ruutume, de arue,” emla bí poyansudola pokai. “Depe idokom tébul rumkílo duuna ekiiekom ome-oo kídíke dojéngem dodo.”

²⁹Delokrongem bí mimedem poto, “Sikena tatbanam agom poyan sunam legape no gíladoku; uromde nokke omedem gínyo kaku.”

³⁰Bí gílangkula ekumdelo ome dem bisonalo keddope kaato delokke uromete gíkaku.

³¹Delokrongem Jisu bí Tur delokke gílangkula Sidonlok gílangala Galil siyéng danpe toklangala Dekapoli amolo gíto.

³²Delo amieke ayoko ruubéna agom pokén yimaneke aabodola bím bíkke alage ami teyong delo leetan bidomílo emla roguto.

³³Bí amidem milung delokke langu sugeyéla, Jisu bí bíkke lakkénge ami nyorunglo sullíkto, delokke takil sukdola ami ayodem ukkíto.

³⁴Bí teyong telo kaadusudola bodope ngasaadola bím poto, “Ephphatha!” (depe emnamde “kosatlangka!”)

³⁵Depe idodelo, amidelokke nyorunge peebeng kaku, bíkke ayue beleng lenkaku delokke berok songkok polenkaku.

³⁶Jisu bí séko meteng pobimapeka emla bulum pogapto. Idokom edítko bí dekepe itodí deddíko bulu legadem polento.

³⁷Ami kídíe sai emla míínga ngayin sukai. “Bí atí takamem aidope idoku” emla bulu pokai. “Bí ruubé nemteng taddokupe ido delokke agom pokén manemteng podokupe ido,” emkai.