Read Alladian MARK 8 Bible Online

MARK 8 - Alladian bible

MARK 8

¹Depe iduem mibam konko dumsutoku. Bulu dopenam kamape iyédem, Jisu bí bíkkíng luyilsuna kídíem tomnín supala poto,

²“Ngo sim ami kídísim ayang míípa sudung; bulu ngokkíng yémín gename longum kokai idubong depe iname dope tíípenam kaimabong.

³Ngo bulum kenodope ekumlo melík kumílo, bulu bedalo molayimape iyé, kapeila bulu ayokone mootengko among lokkekai aadung.”

⁴Bíkkelo luyilsuna kídíe poyan sukai, “Depe idola so mootengko amoso séko bulum dobodope dopenam paala boyéne?”

⁵“Edítko lube nolu kadune?” emla Jisu bí tatkíto. “Kínítko” emla bulu pobito.

⁶Bí mibamdem amolo duudope poto. Bí lub kínítdem laala delokke yidge pala, dekedem penmík pala ami kídí delo joobidope bíkkelo luyilsuna kídídem políkto, delo bulu depe ito.

⁷Bulu engo ansoo nekekom kato; bí dekedemte yidgeto delokke luyilsuna kídídem bulum ordope lulíkto.

⁸Ami kídíde doto delokke kiidarkai. Méélamdem luyilsuna kídíde dongadem aapé kínítko penmík namem laadum sutoku.

⁹Jarpiko amie kato. Delokrongem bulum megeyéla,

¹⁰bí bíkkíng luyilsuna kídídem lekope etkudelo rengang bosu langkula Dalmanutha amolo gíto.

¹¹Pharisi kídíe aala Jisume íngkíto. Bím darkaanape, bulu taleng telok iyodko ikandope bím poto.

¹²Bí eerípe ngasadola poto, “Kapeila si yérumsi irisinyo iyod mílílo mantíkane? Ngo nolum aruem pobidung, bulum iyod atíyang ibimayé.”

¹³Delokrongem bí bulum megeyéla, etkudelo rengatoku delokke rotkonlo kootoku.

¹⁴Luyilsuna kídíde roti bommape mesuto, lub atel petomko bulu etkudelo bomto.

¹⁵“Ansulangka” emla Jisu bulum lunoobito. “Pharisi kídíke siiyém delokke Herodme an-gap sulangka.”

¹⁶Bulu lubosudola poto, “Ngolu roti bommang kolokmin sim podune.”

¹⁷Buluke lupo sunamem kénsula Jisu bí bulum íngkíto: “Nolu kapeila roti kanam kamalo pontí bosukane? Nolu supakkom kangkén tatkén manía? Nolu aapí angkam gedunía?

¹⁸Nolu amigem gedula kaasu lamanía, delokke nyorungem gedula tallamanía?

¹⁹Ngo lub pilngodem jarngo ami legape penmíkdo delo edít aapéko dongadem nolu giidum sutokune?” “Aapé íying kolang annyiko” emla bulu poto.

²⁰“Delokrongem lub kínídem jarpi legape ngokke penmík dak delo, edít aapé bíínako nolu dongadem giidum sutokune?” emla íngkíto. Bulu, “Kínítko” embito.

²¹Bí bulum, “Nolu supakkom tatkén manía?” emla luto.

²²Bulu Bethsaidalo aato, delo amieke ayoko mingmana amiko aaboto delokke Jisume bí ukkí bidope roguto.

²³Bí alaglok mingmana amidem gakla delokke doolung delokke luyulo gíboto. Bí ami delokke amiglo takil sukkatto delokke alage bíkkíng pida sudola, Jisu bí “No atíem kaapa dokunía?” emla íngkíto.

²⁴Bí kaadu sudola poto, “Ngo amiem kaadung; bulu kaaname esing duggona kísa idung.”

²⁵Lekoda Jisu bí agí alage ami delokke amiglo pitanto. Delo bíkke amige pongkaku, bíkke amige kangkaku.

²⁶Jisu bí bím ekumlo melík dolangkula poto, “Doolung delo gíku mapeka.” [12]

²⁷Jisulang delokke bíkkelo luyilsuna kídíe Kaisaria Philippi doolung kídarlo gígooto. Bedalo bí bulum, “Ami kídíe ngom séko emdune?” emla tatkíto

²⁸Bulu poyansuto, “Ayokone Baptist Joan bí emdung; ayokone Elijah emdung; delokke abíde kaaluna mirikonko emdung.”

²⁹“Idakkom nolu kape emdun” emla bí tatkíto. “Ngo séko emla míídun?” Pitor bí polenkai, “Nomin Kristo bí” [13]

³⁰Jisu bí bíkke legangem séko meteng pokan mapeka emla bulum ponoobito.

³¹Delo bí bulum Tanike Ue deddíko arééyé delokke miro kídíe, rínekídíe delokke ukil kídíe bím akla petyérung delokrongem longum méélamlo bí gerepyéku emla polenboto.

³²Bí tatbedope dem legadem poboto, delo Pitor bí bím daksup subodola lunampe ilento.

³³Depe ila Jisu bí ngengkut sudola bíkkelo luyilsuna kídíem kaasudola, Pitorme luto. “Ngokke kerasokke gígéétoku, no Soitan no” emla bí luto. “No Shédíke atíem aapílo gemape igeyéla, tani kídíke atí kídar emmin aapílo gedune,” emto.

³⁴Delokrongem bí mibamdem bíkkelo luyilsuna kídíem tomtaksula tomnín sugeyéla poto: “Séko ngokke méélamlo gípe míídudí, bí agíem mepak sugeyéla delokke agíke krossem bomsula ngokkíng gímín gepe aido.

³⁵Kapeila séko agí turnamem[14] mesing supe míídudí, bí dem menyoksuyé, idakkom séko agí turnamem ngokke legape menyok sududí bí dem paayéku.

³⁶Tani among tabuungem paadola, agíke aidem menyok sunamde ingkona aina atíko tanie paadun?

³⁷Demangkom tanie agí aid ayanpe ingkoko biladun?

³⁸Séko ngom delokke ngokke agom kídarem atímana delokke paabna yérumso annyinge emla míídudí, bíkke deena teyong kotoki kídíem aabo langkula Abuke ralnamlo bíkke aayékuem, Tanike Ue bím annyiyéku.”