Read Alladian LUK 10 Bible Online

LUK 10 - Alladian bible

LUK 10

¹Sok méélampe Ruutum bí Midum íying kínít kolang annyiko[9] melíkla, bulu bíkke gípeko taon miyolo delokke rego miyolo annyi annyipe megoolíkto.

²Bí bulum poto, “Aam gatpename deddíko, idola gatpena kídíde anyodung. Delok legape, aríklo agér gérpenem melíkdope arík Ruutumem kumlangka.

³Gílangka! Ngo nolum mérbéno kísape sipyang gooralo melíkdung.

⁴Murkong poisar, demangkom talí nyogon demangkom leyuk gema bommapeka; delokke bedu bedalo sékomete ashé lupo pomapeka.

⁵Nolu ekumkolo enayém, kerayalumpe ‘Ekumso ashénge duudak langka’ emla lubéé líklangka.

⁶Delo ashéngem míínako kayémílo, noluke ashéng lupue bíkkíng duumínyé. Demamílo ashéng lupue nolukíng aalat suyéku.

⁷Ingkuem ekumdelo bulu biyédí dola tííla duulangka, kapeila agér gérnade irem paabasune. Ekum ekumlo gígoo mapeka.

⁸Nolu taonkolo aala delokke nolum yamrík yémílo, nolum leebi namem dolangka.

⁹Delo duuna kina ramna kídíem ipílangka delokke bulum, ‘Shédíke amonge nolukelo anín dubong’ emla polangka.

¹⁰Idakkom noluke taonkolo aaduem nolum yamrík mayémílo, delo bedalo gíla sikepe polangka.

¹¹‘Noluke taon lokke ngoluke alelo gyapketna pemugemte ngolu nolum mepak nana kangkepe pibín sudung’ emla polangka. Idola sim berokpe kénlangka: ‘Shédíke amonge anín dubong.’

¹²Ngo nolum podung, delo longe delo dem taon dempemílo Sodomme ayang yayé.

¹³“Korajin! Nolu ankí kenoyé, Bethsaida! Nolu ankí kenoyé! Kapeila nolukíng ibinam irisinyo kídarem Tur lolang Sidonlo ibituamílo, bulu muun tuulumsula delokke metbu nyoolíksula kerango pekai míílat suyékuai.

¹⁴Idakkom bisardí longelo nolum pemílo Tur delokke Sidonem ayang yayé.

¹⁵Delokrongem, E, Kapernaum, nom teyong pía laasang yékune? Ma, no rumkí belokai tokyé.

¹⁶“Séko noluke agomem tatgap dudí, ngomkom tatgap bidung; séko nolum tomadudí ngomkom tomang; idakla séko ngom tomadudí ngom melíkna bímkom tomang.”

¹⁷Midum íying kínít kolang annyide ashérupe aalat sudo langkula pokai, “Ruutum, uyu kídíete nokke amínlok ngolum rogedo.”

¹⁸Bí poyansuto, “Ngo Soitanem teyong telok yaari kísape olet dakpe kaato.

¹⁹Noluke tabí kídíem delokke képkong kídarem tujém nana ralnamem delokke miru kídíke pauarem ikum nana ralnamem ngo bito; ingkuete nolum atí ilamayé.

²⁰Depe idokom, atímana uyue nolum rogekolok ashénge emla míímapeka, idakla noluke amínem teyong amolo atlíkkai emla ashé langka.”

²¹Dekepe idodem Jisu bí Deena Aidlok ashérunge idola pokai, “Among kelang talengke Ruutum, Abu nom ngo koyitdung kapeila no sim atí kídísim kénna paana kídí lokke mesupto, delokke dekedem koo aména kídílo lengkan bito. Yayie arue, si nokke mííposula iname.

²²“Takam atí kídar sim ngokke Abue ngom bilíktung. Sékokom Oode sékodí dem kénmang. Abu petome kénsudung, delokke sékote Abude sékodí dem kénmang, Oo petom elang Ue bím kényépe emla ullennam kídíe kéndung.”

²³Delokrongem bí bíkkelo luyilsuna kídídelo ngelat sulangkula pesuppe poto. “Noluke kaanam dem kaanana amig kídarde gérne.

²⁴Legadem ngo nolum pobidung, deddína kaaluna mirikídíe delokke roja kídíe noluke kaanam dem kaape emla míítuai ilate bulu dem kaapa tomang delokke noluke tatnam dem tatpe emla míítuai idakkom bulu dem tatpa tomang.”

²⁵Leko ayon kénna amikone Jisume aapí aang ikaape emla dakrepto. Bí pokai, “Saare, turyar namem paadope ngo ingkokoi iperung aidon?”

²⁶“Ayonlo ingkuem attune?” emla bí poyansuto. “Kape kísa no dem poridune?” emla íngkíto.

²⁷Amide pobikai, “Nokke Shédí Ruutumme nokke aapí aang takamlok delokke nok tolnam ralnam loklang aapí tabunglok ayalangka.” delokke “Nokke kumríem agí kísape ayalangka.”

²⁸“No pojido” emla Jisu bí poyansuto. “Depe ilangka demílo turyé.” emto.

²⁹Idakkom bí agíem aro menamem kénsupe míídola Jisume íngkíto, “Delo sékoi ngokke kumríe?”

³⁰Dem poyan sudola Jisu bí pobito, “Amikone Jirusalem lokke Jerikolo endungem dokaide bím umbomkai. Bulu bíkke ege galugem pítbínla, dempala bím sita simang idope igeyéla gínyok kaku.

³¹Miriko delok bedadelok ento, delo bí amidem kaapala, angu konlok bilgeto.

³²Dekepe Lebikone ennade bím kaasu pala bedang konlok bilgekai.

³³Idakkom Samari amikone enkane, ami dongkodelo aala, amidem kaayédem, bí kaarésue ito.

³⁴Bí bíkkíng gíla amidelokke taríem gayinlok yéngkapla, tél loklang delokke onggur alanglok pílíkto. Delokrongem bí amidem agí gadodelo joolíkla, hutelkolo aala delo ankípe bím kaabomsuto.

³⁵Longe kondem bí balnyiko laasula hutel duubom nadem bito. ‘Bím kaasu bomlangka delokke ngokke aayékuem nokke itemnam abalem ngo biyéku’ emla bí poto.

³⁶“Sok midum angum arasokke dokait alaglo olíkna ami sokkepe nokke mííname sékoda kumrípe idun?”

³⁷Ayon kénna amide poyansukai, “Bím yaasamna amide.” Jisu bí “Gílangkula dekepe itolangku” emto.

³⁸Jisulang bíkkíng luyilsuna kídíde bedalo endakkuem bí doolung kolo pííto. Delo Martha emnam mimeko agí ekumlo bím tomato.

³⁹Bíkke Mari emnam bírmeko Ruutumke alelo duula bíkke ponamem tatgap nako kadungai.

⁴⁰Idokom Martha bí bíkke iruu saarula agér ipenamem ikolok dekepe ila mínmato. Bí Jisukíng aala poto, “Ruutume, no kaasu manía, ngokke bírme ngom petom agér ipenamem melíktung. Ngom iguldope bím pobika!”

⁴¹Ruutum bí poyansuto, “Martha, Martha, no deddíko míídírsula delokke míngasula idung,

⁴²idokom no agom atelko pííramdung. Mari bí aiyanem ultung, delokke dem bíkke lokke laabín kumayé.”