Read Alladian LUK 11 Bible Online

LUK 11 - Alladian bible

LUK 11

¹Longe konem Jisu bí amongkolo kumsula duuto. Bíkke kumyin rodem, bíkkíng luyilsuna akone bíkkíng aala pokai, “Ruutume, Joan bí bíkkelo luyilsuna kídíem poyilnam kísape ngolumkom kumnamem pobitoyika.”

²Bí bulum pokai, “Noluke kumyém sikepe potoka: “ ‘Yaie,[10] nokke amíne duuyar kalangka, nokke amonge aadak langka.[11]

³Loodí mipíem ngoluke dopenamem ngolum bika.

⁴Ngoluke paab kídíem maab bilangka; kapeila ngolukom ngolum atímape ina miyongem maab bidung.[12] Delokke ngolum darkaa penalo gímo mapeka.’ ”[13]

⁵Delokrongem bí bulum poto, “Noluke akone angongko kala, bí yoh raajangem bíkkíng aala poyé, ‘Angonge, ngom lub roti angumko bisu pootola,

⁶kapeila mibolo enna ngokke angonge ngokkíng aadung, delokke ngo bím atíyang bisu penam kamang.’

⁷“Delo aralo duunade poyansuto, ‘Ngom ebínpe manbom mapeka. Eyabem íkkar tobong, delokke ngokke ome-oo kídíe bisonalo ngokkíng keddung. Ngo gerepla nom atí bilamang.’

⁸Ngo nolum podung, bíkke angonge emla bí gerepla bím donam bilang madokom, ami delokke mantí bomkolok bí gerepla angodem bíkke míínamko biyérung.

⁹“Dekepe ila nolum ngo podung; kolangka delo nom biyé; mata langka delo no paayé; piga langka delo nom eyabem siyyabiyé.

¹⁰Kapeila séko kodudí bí paadung; delokke piga nadem eyabem siyya bidung.

¹¹Abu kídí nolu séko agí uem engoko[14] koyém, tabíko bidun?

¹²Demangkom rokpíko koyém képkongko bidun?

¹³Nolu atí madokom agí ome-uem aina amanem binamem kénsudung, demílo edítko bojéyape noluke teyolo duuna Abue bím kona kídílo Deena Aidem biyéne?”

¹⁴Jisu bí agom pokénmana uyukonem monpaktoku. Uyude lenrongkuem, agom poyimana amide polenkaku, delo ami kídíe irisinyope mííto.

¹⁵Idakkom bulu ayokone pokai, “Uyu ruutum Biljebub[15] kelokmin bí uyudem monpak nadungkune.”

¹⁶Abíde bím taleng telok iyod ibidope poka darkaato.

¹⁷Jisu bí buluke mííyi míísangem kénla bulum poto, “Doolung miyode agí agí; arasulo mirupe yésumílo nyokyé, delokke erade raabyak byakmílo nyokyé.

¹⁸Soitane agí agíe mirupe bíkke doolulo ibosumílo, kape kísa atelpe tolbo sulayén? Nolu uyuem Biljebub kelokmin ngo monpak dungkune emkolo ngo sim podung.

¹⁹Supak ngo uyuem Biljebub kelok monpak dungkumílo, nolukíng yémín gena kídíe ingkolok uyuem monpak dungkune? Dekemílo, bulu nom bisarna kídíe.

²⁰Idakkom ngo uyuem Shédíke lakkénglok mondung kumílo, demílo Shédíke amonge nolukelo aadung.

²¹“Tolna ralna amie, iyan sunana bomla, agí ekumem kaabom sula ekurangem mosiido.

²²Idola bím pemílo ralyana akone aala bím ikumyém, bí ami delokke míídasunam iyan sunana atí siriem laabínla bomlangkula orsudoku.

²³“Séko ngokkíng imadudí bí ngom mirupe ine, delokke séko ngom lekope idum sumayédí de nyokpan sudung.

²⁴“Edílo paab aide tanilok lendungkudi, de mooruk amolo gígoola, duuno supeko matala delokke dem mapang madung. Delo bí podungku, ‘Ngo ngokke gírong kuko ekumdelo angkupe.’

²⁵Edílo aadung kudí, bí ekumdem deenampe delokke kampope metupe kaapadung.

²⁶Delokrongem bí gílangkula bím agíemte atí mayana uyu kínít konko aabo langkula bulu aralo gíla delo duudung. Delok ami delokke akore kerang kempemílo pakyape atímangkai.”

²⁷Jisu bí sim agom kídar sim podungem, mibam delok mimeko, “Nom olenna delokke usaana anede gérne” emla gokto.

²⁸Bí poyansuto, “Idola Shédíke agomem tatla delokke dem igena kídíde gérne.”

²⁹Mibamde bojé yayang iyédem Jisu bí pokai, “Siyum siroke ami kídí si atí maneke. Si irisinyo iyod mílílo matadung, idakkom Jonah ke kékonlo iyodyang ibimayé.

³⁰Kapeila Jonah bí Ninebi kídí legape iyodpe itodí, delok kísape Tanike Ue silo meloke ami kídíke iyodpe iyé.

³¹Sokke legape sokko danlok ranie gerepla silo meloke amiem, bottepe bisar idí longelo ajéng luketyé. Kapeila bí among kéényung lokkekai Solomonke kénnam agomem tatpe emla aato. Idakkom supak Solomon mempemílo botte yanako so dung.

³²Bottepe bisardí longelo, Ninebi ami kídíe silo meloke ami kídíem dakbo sudola bulum ajéng luketyé, kapeila bulu Jonahke ngiitom pobinamem tatla míílat sutoku, delokke supak Jonah mempemílo botte yanako si dung.

³³“Sékote meruem nyotpala, kaamangkolo mesupla, demangkom bayé aralo mena kamang. Dem penem aana takame angunem kaadope umké teyolomin bí dem meyéne.

³⁴Noluke amigde noluke amíllokke merue. Noluke amigde aimílo, noluk amíl tabudete angunrunge iyé.

³⁵Demílo nolukíng angun duunade kaamo madope mínggap langka.

³⁶Delok legape, noluke amíl tabude angun runge imílo, delo kaamona kamang, merue nolum latyém angunnam kísape, de apíípe angune iyé.”

³⁷Jisu bí bíkke agomem poyinrodem, Pharisi kone bím dotké dobosudope emla tomto; depe iname bí gíla apim dobosuto.

³⁸Depe iduem Phariside kangí toname Jisu bí domang adape, laksuk sumape inamem kaala arí anyope mííto.

³⁹Delokrongem Ruutum bí poto, “Supak demílo, nolu Pharisi kídíe ekung bati luyuem arbíndung, idokom aralo noluke paapu dopupe míínam elang atímana aapíe bíísétdung.

⁴⁰Nolu loorímana kídía! Luyuem pínade arang emte pímanía?

⁴¹Idakkom ekung aralo duuna kídíem[16] opan kídíem ortola, delomin nolukepe takamde deeyéne.

⁴²“Pharisi kídía, nolu ankí kenoyé, kapeila nolu baganlok lenna angu angu oying ogé dohom bagem bidula, aro bedangem delokke Shédíke ayangem míípamang. Kerang kesim mepak mape simmin nolu igepene.

⁴³“Pharisi kídía nolu ankí kenoyé, kapeila nolu kumkeng ekum lokke aiyalumna dungkuem mííbadung delokke dukan bojarlo míngge dola salam binamem matadung.

⁴⁴Nolu ankí kenoyé, kapeila ingkona ago teyolodí amie kénmape gídung gítok sula idudí, dekena iyod kamana ago kísana amie nolu.”

⁴⁵Ayon kénna kone bím poyan sukai, “Saare, no dekepe ngolum ponamde, ngolum lukaa luyéé dunamino!”

⁴⁶Jisu bí poyansuto, “Delokke no ayon kénna no ankí kenoyé, kapeila no ami kídíem buluke gelamanam egedem getí modung delokke no agíedan lakkéngete bulum igultope emla imang.

⁴⁷Nolu ankí kenoyé, kapeila nolu kaaluna mirikídí kepe ago píbine, delokke noluke buku kídíemin bulum petna kídíde.

⁴⁸Dekepe iname noluke buku kídí inamem noluke tolík namem nolu lengkan sudung; bulu kaaluna miri kídíem petto, delokke nolu buluke ago kídarem píto.

⁴⁹Sok legape, Shédíke kénnam sulok pokai, ‘Ngo bulum kaaluna miri kídíem delokke tomlíknam kídíem melíkbiyé; ayokonem bulu petyé delokke abídem bulu irééyé.’

⁵⁰Delokke legape tani among lendak delokke ila kaaluna miri kídílo yilíng bítnam legangem silo meloke ami kídíe ajéngem geyé,

⁵¹kumko baari lokke ila kumsuko pénsamlo Abel kelokke ilangala Jekariah kelope yilíng bítnam ajéngem geyé. Arue, ngo nolum podung, si yérumsi sok takam sokke ajéngem togeyé!

⁵²“Ayon kénna kídía nolu ankí kenopene, kapeila nolu kénnana sabiem laabínne. Nolu agíe aamape igeyéla, aana kídíem nolu itumdung.”

⁵³Jisuke gírong kudem, Pharisi kídí elang ukil kídíe bím agírupe aklenkai delokke umpe emla agom íítí bomkai.

⁵⁴Bí atíko poyémílo gaknape emla antíbomkai.