Read Alladian LUK 15 Bible Online

LUK 15 - Alladian bible

LUK 15

¹Supak kajanang ulna kídí elang paabgena kídíe bíkke agomem tatpe emla dumsuto.

²Idola Pharisi kídí elang ukil kídíe kangkipe kaadola pokai, “Si ami si paab gena kídíem toríksula bulum dorík sudung.”

³Delo Jisu bí bulum sim luyiisunam agom sim poto:

⁴“Míngkítoka, noluke akone mér sobén língkoko bomdung idola akonem nyokmoto. Bí íying konang kolang konang mér sobéndem doolulo megeyéla pangkuma tetengem nyoknadem mata kumayénía?

⁵Delokrongem dem paayé kudem, bí ashérupe bíkke gordulo joolík sula ekumlo enyéku.

⁶Delo bí bíkke angong kídíem delokke kumrí donggong kídíem tomdumsula poyé, ‘Ngom írgape ashéng bosutola; ngo nyokna mérbénuem paatungku.’

⁷Ngo nolum podung dekepe deenampe míísuna míílat sulíng kumana íying konang kolang konang amikídí dempemílo teyong amonge míílat sukuna paab gena ami atel legape ashéng bomyadung.

⁸“Demangkom nokdi íying bomna mimekone akonem menyok suto. Bí dem pangkumang tetengem, meru nyotla, ekumem pekbínla ankípe mata kumayénía?

⁹Delo bí dem paayédem, bíkke angong kídíem delokke kumrí lamgéem gokdum sula, ‘Ngom írgape ashéng bosu langka; ngo ngokke nyokna poisarem paatungku’, emyé.

¹⁰Dekepe ngo nolum pobidung, míílat sukuna paab gena amidem Shédíke teyong kotoki kídíe ashéng shébomdung.”

¹¹Jisu bí poyansula pokai, “Amiko oo annyi kanako katuai.

¹²Aníyade agí abuem pokai, ‘Yayie, ngokke ekurang tarongem ngom ortoka.’ Delo abude bíkke ekurangem annyidelo orpansuto.

¹³Ool doomang adape, aníyade bíkke ekurangem kogeyéla, mootengko amolo enla delo bíkke poisarem mínggípe yédola pitpakto.

¹⁴Bíkke pinngum surongem, delo amo tabudelo dírí kenue sengéépe ila bí pííram séémue ilento.

¹⁵Dekepe iname bí gíla delo duuna amikolo agíe hajirang yéresuto. Delo amide bím aríklo éék kídarem kaabomdope melíkto.

¹⁶Bí éék dotké bire sukolok donamem paasupe míítuai idokom sékote bím atíyang bimang.

¹⁷Bí dem kénsu yékudem posukai, ‘Edítko ngokke abulokke hajirang ami kídíe dolum yimadope paatuane, idola ngodan so kenuem pínka kosudakbong!

¹⁸Ngo gílangkula ngokke abuem poyé, Yayie, ngo nomlang Shédíme ibuuto.

¹⁹Ngo nokke ue emsu bayimang ngom nokke hajirang amikídí lokke akonpe itokui.’

²⁰Delo bí gerepla agí abudelo gítoku. “Bí píngku pename mootengko dungadape, bíkke abude bím kaala, ayang míípa sutoku; bí agí oodelo dukríksula, bím gomrík sudola mumpupto.

²¹Oode bím poto, ‘Yayie, ngo nomlang Shédíme buulínge imoto. Ngo nokke oope tosu baimang.’[18]

²²Idakkom abude agí béérang kídíem poto, ‘Menape! Aiyalumna ege galugem bím píllíkto. Bíkke lakkéng delo lakkabko bíllíkto delokke aledelo leyukko yuklíkto!

²³Ruo jiinako laala patoka. Ngolu írgape doman aranko ilape.

²⁴Kapeila si ngokke oosi situai idokom turdungku; bí nyoktuai idokom paatungku!’ Delo bulu depe ibomkai.

²⁵“Depe iduem, abíyana oode aríklo dungai. Bí ekum aníndelo pííyé kudem, miri paksong adudeke tatto.

²⁶Dekepe ila béérang kídí ayokondem bí tomla kape idunai emla íngkíto,

²⁷‘Nokke bírue píídungku’ emla bí pobito, ‘Delo nokke abue ruo jiinako patung kapeila bí uem turdope paatungku.’

²⁸“Abíyana bírode marla aralo angku pemang emla ito. Delo abude gílenla bím ngiito.

²⁹Idakkom bí agí abudem poyansuto, ‘Míngkítoka! Sim dítag kídí sim ngo nokke pakbope idung delokke nokke agomem ngo tatmape imang. Depe ilate no edílokom ngokke angong kídíem dobosudope emla bénbíl kokom bikímang.

³⁰Idola nokke ekurangem abír ajon ikolo pinnyokna nokke oosi pííyé kuname, bíkke legape no ruo jiinako pabitung!’

³¹Abude poto, ‘Ngokke ue, no agínpe ngokkíng duudung, delokke ngokke atí takamsi nokke.

³²Idakkom ngolu írgape ashébosupe aido, kapeila nokke bíro si situai idokom turdungku; bí nyoktuai idakkom paatungku.’ ”