Read Alladian LUK 16 Bible Online

LUK 16 - Alladian bible

LUK 16

¹Jisu bí bíkkelo luyilsuna kídíem poto, “Mirem amiko katuai, delo bíkke sérangem kaabomna bíkke béérangko katuai. Mirem amidem, ménéjar amide nokke sérangem inyok bomdung emla pobinako kato.

²Dekepe iname mirem amide bím tomla íngkíto, ‘Ngokke nok legangem tatnamsi kapei? Nokke pitnam isabem ngom bitola, kapeila no menejarpe ilayimayé.’

³Ménéjarde agíe míísukai, ‘Ngo supak kape imíloi aiyéne? Ngokke ruutum si ngokke agérem laabínyéku. Ngo arung koopete ralmang, delokke kogoo pete annyinge

⁴Ngo kape imíloi dem ngo kénkai, sok agér sok ngo lenyékuem, ami kídíe buluke ekumlo ngom torík suyépe.’

⁵“Depe iname bí mirem ami delokke ajéng gena mipil miyongem tomdumsuto. Bí kerang kedem tatkíto, ‘Edítko no ngokke ruutumke ajéngem gedun?’

⁶‘Olib tél tin língko píínyiko’ embito. Ménéjarde bím poto, ‘Nokke narnana kakodem laala dem língko appiko emla attola.’

⁷Delokrongem bí annyi nape nadem tatkíto; ‘Edítko nokke ajénge?’ ‘Éjar muunko gehue’ emla bí poyansuto. Ménéjarde bím poto, ‘Nokke narnana kakodem laala língko píínyikope itola.’

⁸“Ruutume míísi míírumna ménéjardem koyitto kapeila bí budiiko ito. Legape tani amosokke ami kídíde angunlo yéna ami kídíem pemílo agí legalo budii kayadung.

⁹Ngo nolum podung, tani amosokke ekurangem agí angong ngoonape inalangka, delomin, dem iyinrongem duuyarpeko ekumlo nolum torík suyéne.

¹⁰Séko bulum anyoona atolo míílík dudí bulum bojélote míídíílíkdung. Séko bulu anyongona atílo tete madudí bí bottena atílokom tetemang.

¹¹Dekepe iname nolu tani among eku sérang yébomkolo nolum míídeng líkmamílo, aro mirem pekolo séko nolum mííde líkyéne?

¹²Delokke nolum akon sérang teyolo mííde líkmamílo, noluk ekurangem séko nolum biyéne?

¹³“Ingkona béérangete ruutum annyiem agér ibolamang. Akonem bí akyé delokke akonem bí ayayé, demangkom akonlo mínggapyé delokke akonem mepakyé. No Shédí melang murkongem atelkope kumlamang.”

¹⁴Murkong míítana Pharisi kídíe, sim takam sim tatto delokke lungil lusola Jisume luto.

¹⁵Bí bulum poto, “Nolumin amikidí keralo agísuem aro aro mansuna kídíe, idakkom Shédí bí noluke aang kídíem kéndung. Tani kídí keralo bottepe míínam kídíde Shédíke keralo mepakname.

¹⁶“Joanke píímang adape, Ayon Kitab elang kaaluna miri kídíe pobito. Delokke ilangala, Shédíke yéta legang tatpona ngiitomem poyardung, delokke mipile delo ngiitom delo aayindung.

¹⁷Ayon Kitab agome kolomlok siyaying doodí kísa nakokom nyokpemílo among elang talenge nyoknamde nyokpo yaname.

¹⁸“Séko agí méngem mepak sutola delokke angukon mimeko laayé kudi bí abír ine; delokke amike mepakkunam mime konem méngpe bomkuna dekom abír ine.

¹⁹“Ege galuk arekanarung delokke kampona gela kanam remnampe loodíke yéna mirem amiko kato.

²⁰Bíkke etor eyab delo Lajar emnam tarí mílí gela magoona amiko keddungai,

²¹delokke bí mirem ami delokke pimpilem doyape mííto. Ekii kídíete aala bíkke tarí kídar dem yakla ito.

²²“Magoona amide sikai delo teyong kotoki kídíe bím Abrahamke ampelo joolíkto. Mirem amidete sila bím yuto.

²³Doorum líísam amolo bím itung sirééla ibom dungem, bí mootengoope kaadung sutoname, Abraham bí Lajarme duubosula duudope kaato.”

²⁴Dekepe iname bí Abrahamme poto, “Yayi Abraham, ngom ayatoyika delokke Lajarme bíkke lakkéngem asilo ningnyom pala ngokke ayuem reyiidope doodíem dílík motoka, kapeila ngo so mepomso mola ruimang.”

²⁵Idakkom Abraham bí poyansukai, “Ue míngíí suto langku nokke turla yédungem no aina atí kídíem paato, idola Lajar bí aimana atí kídarem paato, idokom bí supak so dupoope duudungku delokke nodan adír kolo dung.

²⁶Delokke sok takam kékonlo, nokkelang ngoluke pénsamlo eeríruna kobungko duusékdung. Si sokke nokkíng gípena kídíem, demangkom ngolukelo aapena kídíem duusékdung.”

²⁷Mirem amide poyansuto, “Demílo, Yayie, ngo nom rogudung, Lajarme ngokke abu ekumlo melíktoika,

²⁸kapeila ngokke bíro pilngoko kadung. Bulute so adírko amoso aamadope lusii motoka.”

²⁹Abraham bí poyansuto, “Bulukepe Mosilang delokke kaaluna miri kídíe kadung: bíro kídídem buluke agomem tatgap motoka.”

³⁰“Demang, Yayi Abraham”, emla bí pokai, “Sina kídí lokke akone bulukíng gíku mílomin bulu míílat suyékune.”

³¹Abraham bí bím pokai, “Bulu Mosi kelang kaaluna miri kídíke agomem tatmamílo, akone sikolokke gerep dokukom bulum luyil lamayé.”