Read Alladian LUK 17 Bible Online

LUK 17 - Alladian bible

LUK 17

¹Jisu bí bíkkelo luyilsuna kídídem pokai, “Tani kídíem paab imona atí kídare píídak rubong, idakkom séko bulukelok de lenyédí bulu ankí kenopene.

²Sok aména akonem paab ilík pemílo, de amide anyat lííbyang em alíílo paklík sudola siyéng asilo yoplík sunamde bíkkepe aiyado.

³Dekepe ila agíem ansu kída langka. “Noluke bírue paab iyémílo, bím noolangka.

⁴Bí nolum longelo lemkínítko paab iyémílo delokke lemkínítko nolukíng aalat sulang kula, ‘Ngo bursudungku’ emyémílo, bím maab bilangka.”

⁵Tomlíknam kídíe ruutumme poto, “Ngoluke míngkengem edíímotoika.”

⁶Jisu bí poyansukai, “Noluke míngkenge petu amí kísa ansoo dokom ‘eyum yumnem puula siyénglo duutola’ emmílo delo de nolum depe ibiyé.”

⁷“Míngkítoka, noluke akone aal gína demangkom mér kaabomnape yédung. Bíkke aríklok pííyékuem bí agí béérangem, ‘Supak aala dotola’ emyélanga?

⁸Dempenem bí, ‘Ngokke dotkéyem iruutoi, ngokke dodung tíídungem no agíe duuya poolangka, delokke méélamlo no dodo tíídope’ emmayénía?

⁹Bíkke ponampe béérang delokke ibinamem mííyum sumayénía?

¹⁰Dekepe nolukom, nolum idope políknamem iyinrongem nolu emyé, ‘Ngolu are kamana béérang kídíe, ngoluke agér ipenam petomem ngolu ito.’ ”

¹¹Supak Jisu Jirusalempe endakkuem, Samari kelang Galil rísulok gíto.

¹²Bí doolung kolo pííname, tíídgena midum iyingko kaaríksuto. Bulu donggen dola

¹³bottepe goktoola Jisume poto, “Ruutum Jisue, ngolum ayatoyika!”

¹⁴Bí bulum kaayédem pokai, “Gílangkula nolu agíe miri kídílo lengkan sutolangku.” Delo bulu gíkuname dengkaku.

¹⁵Buluke akonde agíem ipí kunamem ansuyédem, Shédíme bottepe yidge dolangkula aalat sutoku.

¹⁶Bí Jisuke alelo lebíng konídola bím koyitto delokke bí Samari amikuai.

¹⁷Jisu bí ingkíto, “Midum íying takamde dengku manía? Midum konade ingkoloda?

¹⁸Sok mipak ami sok kékonlo sékote Shédíme yidge kupe angkumanía?”

¹⁹Delokrongem Jisu bí bím poto, “Gerepla gíkalangku; nokke míngkenge nom aimotoku.”

²⁰Leko Pharisi kídíe Shédíke amonge aadíku longe edílodí pííyékune emla íngkí namem Jisu bí poyansuto, “Shédíke amode kaabe sudope aamayé,

²¹demangkom amie, ‘Sona duune’ emdo pekom imayé, delokke ‘Eena duune’ emdopekom imayé, kapeila Shédíke amode ‘Nolukíng duusudung.’ ”[19]

²²Delokrongem Jisu bí bíkkelo luyilsuna kídíem poto, “Tanike oolokke yédo longem kaalí dungai idakkom kaapang kumadí longeko píídak.

²³Amikídíe nolum, ‘Eena bí duune!’ demangkom ‘Sona bí duune!’ emyé. Buluke méélamlo dukmín gemapeka.

²⁴Legade yaarie taleng telo rego konlokke layyém rego konlo píísémnam kísape, Tanike Ue bíkke longe[20] lokom depe iyé.

²⁵Idakkom bí deddína arééyém rénggela delokke siyum siroke amiem géngko suporuyé.

²⁶Noahke yédudelo inam kísape, Tanike Oolokke longe lokom depe iyé.

²⁷Tani kídíe dola, tííla, mime laala, omum nyameng ibosula Noahke etkulo rengado deloope ito. Delokrongem puumue aato delokke bulum takam puyinto.

²⁸Lotke longe delokom sikepe ito. Tani kídíe dola tííla, paala remla, díírep morepla ito.

²⁹Idokom Lotke Sodomem gínyo rongkuem, líídor eme taleng telok pedope obomla bulum petyinto.

³⁰Tanike Ue lendí pakkuem, dekepe iyé.

³¹“Delo longedelo ekum míílonglo duune ekum aralokke ekurangem oi langkula langkupe imapeka. Dekepe aríklo yénekom atíem langkupe emla imapeka.

³²Lotke méngem míípasulangka!

³³Sékodí agí turnamem mesiisupe míídudí bí dem menyok suyé, delokke séko agí turnamem menyok suyédí bí dem bomgapyé.

³⁴Ngo nolum podung, delo yoh delo midum annyiko bisonang atello ketbosuyé, akonem laayé akonem meyé.

³⁵Mime annyiko delot íbosuyé akonem laayé akonem meyé.”[21]

³⁷“Ruutume, ingkolodí?” emla bulu íngkíto. Bí poyansuto, “Ingkolo simang kadudí delo pemí píage bííbomyé.”